Հինգշաբթի, 15 Յունիս 2023-ին, Թորոնթոյի մէջ, Ն.Ս.Օ.Տ.Տ. Արամ Ա. Վեհափառ Հայրապետը ընդունեց այցելութիւնը Ռամկավար Ազատական Կուսակցութեան (Ռ.Ա.Կ.) Կեդրոնական Վարչութեան ատենապետ Մայք Խարապեանին:
Շուրջ մէկ ժամ տեւած հանդիպման ընթացքին Խարապեան Վեհափառ Հայրապետին զեկուցեց վերջերս Հայաստանի մէջ իր ունեցած հանդիպումներուն մասին՝ պարզելով Հայաստանի դիմագրաւած ներքին եւ արտաքին մարտահրաւէրները: Հանդիպումը առիթ հանդիսացաւ նաեւ անդրադարձ կատարելու Հայաստան-Արցախ-Սփիւռք գործակցութեան ներկայ հանգրուանին:
Հայրապետը շեշտեց մեր ժամանակակից պատմութեան ներկայ հանգրուանին համախմբուելու անհրաժեշտութիւնը՝ յատկապէս Արցախի ինքնավարութիւնը պաշտպանելու հրամայականին գծով: Այս ուղղութեամբ Նորին Սրբութիւնը կենսական նկատեց Սփիւռքին եւ մասնաւորաբար Հնչակեան, Հ.Յ.Դ. Եւ Ռամկավար կուսակցութեանց դերը Սփիւռքի շրջագծէն ներս:
