Շաբաթ, 18 Յունիս 2022-ի առաւօտուն, Պիքֆայայի Ս. Աստուածածին Վանքի Վեհարանին մէջ, Ն.Ս.Օ.Տ.Տ. Արամ Ա. Վեհափառ Հայրապետը ընդունեց այցելութիւնը Համազգայինի նորընտիր վարչութեան, գլխաւորութեամբ Զաքար Քէշիշեանի:
Ողջունելով նոր կեդրոնական վարչութեան ընտրութիւնը՝ Նորին Ս. Օծութիւնը իր բարձր գնահատանքը յայտնեց Համազգայինի համահայկական դերակատարութեան, կրթական ու մշակութային մարզերէն ներս: Որեւէ ժամանակէ աւելի մենք կարիքը ունինք մեր մշակութային արժէքներու առաւել հարստացման ու ամրապնդման մեր ժողովուրդի կեանքէն ներս, շեշտեց Վեհափառ Հայրապետը: Նորընտիր վարչութիւնը հակիրճ զեկոյց մը տուաւ Հայրապետին Համազգայինի յառաջիկայ ծրագիրներուն մասին: Վեհափառ Հայրապետը, իր կարգին, վերահաստատեց Մեծի Տանն Կիլիկիոյ Կաթողիկոսութեան ամբողջական զօրակցութիւնը Համազգայինի աշխատանքներուն:
