Հինգշաբթի, 17 Փետրուար 2022-ին, Ն.Ս.Օ.Տ.Տ. Արամ Ա. Վեհափառ Հայրապետը ընդունեց այցելութիւնը Խաչեր Մարկոսեանին, ընկերակցութեամբ իր քրոջ եւ Ազգային Կեդրոնական Վարչութեան Ատենադպիր Սեդա Խտըշեանին:
Այս առիթով Խաչեր Մարկոսեան երկար տարիներու իր սեփականութիւնը եղող եւ Լիբանանի քաղաքացիական պատերազմի ընթացքին արուեստագէտ Փօլ Կիրակոսեանէն գնած, մայրութիւնը ներկայացնող պատկերը նուիրեց Վեհափառ Հայրապետին: Նորին Սուրբ Օծութիւնը, իր կարգին, յիշեալ պատկերը փոխանցեց Կաթողիկոսարանի «Կիլիկիա» թանգարանին, ուր ան զետեղուեցաւ նկարներու յատուկ ցուցասրահին մէջ:
