Շաբաթ, 20 Նոյեմբեր 2021-ին, Ն.Ս.Օ.Տ.Տ. Արամ Ա. Վեհափառ Հայրապետը իր աշխատանքային օրակարգը ամբողջութեամբ յատկացուցած էր միաբանական յանձնախումբերու հետ հանդիպումներու:
Առաջին հերթին, Նորին Սրբութիւնը նախագահեց ծիսական կեանքի բարելաւման նուիրուած յանձնախումբի հաւաքին, ապա նորանշանակ տնօրէն ժողովին, որմէ ետք հինգ նորընծայ աբեղաներու հանդիպումին:
Յիշեալ հանդիպումներուն նպատակն էր Անթիլիասի Մայրավանքի ներքին վանական կեանքի առաւել կազմակերպումը, իր բոլոր մարզերէն ներս, եւ միաբան հայրերու աշխատանքներուն առաւել աշխուժացումը: Այս գծով, Հայրապետը անհրաժեշտ թելադրութիւնները կատարեց, իր հայրական օրհնութիւնը տուաւ եւ գնահատեց միաբան հայրերու աշխատանքը:
