News

ԶԱՆԱԶԱՆ ԵՐԿԻՐՆԵՐԷ ՈՒԽՏԱՒՈՐՆԵՐ ԱՆԹԻԼԻԱՍԻ ՄԱՅՐԱՎԱՆՔԷՆ ՆԵՐՍ

10 September 2019

Յաճախակի առիթներով, նոյնիսկ առօրեայ դրութեամբ, հայ թէ օտար հիւրեր եւ ուխտաւորներ կ'այցելեն թէ՛ Անթիլիասի Մայրավանքը եւ թէ՛ Պիքֆայայի Ս. Աստուածածին վանքը: Անոնք մօտէն կը ծանօթանան Մեծի Տանն Կիլիկիոյ Կաթողիկոսութեան առաքելութեան զանզան բնագաւառներուն:

 

Երէկ, Անթիլիասի մայրավանք այցելեցին Տանիմարքայէն խումբ մը Լուտերական եկեղեցւոյ պատկանող հոգեւոր հովիւներ, ապա ուղղուեցան «Թռչնոց Բոյն»: Յայտնենք, որ Մեծի Տանն Կիլիկիոյ Կաթողիկոսութեան եւ Տանիմարքայի Լուտերական եկեղեցւոյ միջեւ պատմական կապեր գոյութիւն ունին: Յիշեալ եկեղեցւոյ պատկանող բարեսիրական կազմակերպութեան կողմէ հիմնուած էր «Թռչնոց Բոյն» որբանոցը, ուր իրենց քրիստոնէական ու հայեցի կրթութիւնը ստացան ցեղասպանութենէ վերապրած հայ որբեր:

 

Նոյն օրը, Վեհափառ Հայրապետը ընդունեց հիւրեր Լոս Անճելոսէն, Նիւ Եորքէն եւ Պոսթոնէն, որոնք եկած էին յատկապէս մասնակից դառնալու յառաջիկայ Շաբաթ ու Կիրակի օրերը Այնճարի մէջ տեղի ունենալիք «Այնճարի հիմնադրութեան 80-ամեակ»ի հանդիսութիւններուն:

 

Այսօր, Վեհափառ Հայրապետը նաեւ ընդունեց այցելութիւնը մեծաւորուհի քոյր Արուսեակի գլխաւորութեամբ Հայաստանէն ժամանած ուխտաւորներու խումբի մը: Ողջունելէ ետք հիւրերու ներկայութիւնը, Վեհափառ Հայրապետը յատկապէս շեշտեց մեր ժողովուրդի կարիքաւորներուն ծառայելու եւ Հայաստանի ու Սփիւռքի միջեւ նոյնազգի գիտակցութեամբ մեր միասնականութիւնը ամրապնդելու հրամայականը: