Երեքշաբթի գիշեր, Ն.Ս.Օ.Տ.Տ. Արամ Ա. Վեհափառ Հայրապետը ընդունեց պաշտօնական այցելութեամբ Լիբանան գտնուող Հայաստանի Պաշտպանութեան Նախարար Զօրավար Սէյրան Օհանեանը։ Հանդիպման ներկայ էին նաեւ Լիբանանի մօտ Հայաստանի Դեսպանը և Նախարարին ընկերացող զինուորական պատուիրակութիւնը։
Պաշտպանութեան Նախարարը Վեհափառ Հայրապետին պարզեց իր այցելութեան նպատակը. և իր ունեցած հանդիպումները Լիբանանի պետական պատասխանատուներուն և Լիբանանի հայ գաղութին հետ։ Նորին Սրբութիւնը իր կարգին բարձր գնահատեց Հայաստանի և Արցախի հայոց բանակներուն մարտունակ ոգին և իր ամբողջական զօրակցութիւնը յայտնեց հայոց բանակին, զայն նկատելով Հայաստանի ու Արցախի հզօրութեան ու հայ ժողովուրդի արժանապատուութեան պաշտպանութեան ամուր երաշխիքը։
Ապա, Նախարար Օհանեան և իր գլխաւորած պատուիրակութիւնը ընթրիքի հիւրը եղան Վեհափառ Հայրապետին։ Մեկնելէ առաջ, անոնք այցելեցին Նահատակաց Յուշամատուռը և իրենց յարգանքը ընծայեցին Հայոց Ցեղասպանութեան նահատակներուն։