1958 թուականին, հիմքը դրուեցաւ Ամերիկայի Միացեալ Նահանգներու Ազգային թեմին: Եկեղեցիներու թիւը աւելի սեղմ ըլլալով, թեմը իր մէջ կը ներառէր Միացեալ Նահանգներու եւ Գանատայի բոլոր եկեղեցիները: Տարիներու ընթացքին, եկեղեցիներու թիւի բարձրացումով, Ամերիկայի Միացեալ Նահանգներու թեմը բաժնուեցաւ երկուքի ՝ Արեւելեան եւ Արեւմտեան:
Տարիները սահեցան, նոր շրջաններու մէջ նոր եկեղեցիներ կառուցուեցան, եւ 2002 թուականին, Ա.Մ.Ն. Արեւելեան թեմը անգամ մը եւս բաժնուեցաւ երկուքի եւ հիմնուեցաւ Գանատայի հայոց թեմը: Նոյն շրջանին, Ն.Ս.Օ.Տ.Տ. Արամ Ա. Կաթողիկոսը Գանատայի հայոց թեմի Կաթողիկոսական փոխանորդ նշանակեց՝ Տ. Խաժակ Եպս. Յակոբեանը, որ 2004 թուականին ընտրուեցաւ իբրեւ առաջնորդ:
11 Մայիս 2006-ին, Սէյնթ Գաթրինզի մէջ, թեմին Ազգային երեսփոխանական ժողովի կողմէ Տ. Խաժակ Արք. Յակոբեան երկրորդ շրջանի մը համար վերընտրուեցաւ, իսկ 8 Մայիս 2010-ին, Թորոնթոյի մէջ, Ազգ. երեսփոխանական ժողովի կողմէ՝ երրորդ անգամ ըլլալով։
10 Մայիս 2014-ին, Խաժակ Արք.-ը հանգստեան կոչուեցաւ: Նոյն շրջանին, Ազգային Երեսփոխանական 56/13-րդ ժողովը տեղի ունեցաւ Մոնթրէալի մէջ եւ առաջնորդ ընտրեց՝ Տ. Մեղրիկ Եպս. Բարիքեանը:
2016-ին, Գանատայի հայոց թեմի Ազգային երեսփոխանական ժողովը առաջնորդ ընտրեց Գերշ. Տ. Բաբգէն Արք. Չարեանը, որ թեմը կ՚առաջնորդէ մինչեւ օրս։
Հետեւեալ Եկեղեցիները կը գտնուին Գանատայի հայոց թեմի հովանիին ներգոյ.
- Սուրբ Յակոբ Առաջնորդարանիստ մայր եկեղեցի, Մոնթրէալ
- Սուրբ Աստուածածին եկեղեցի, Թորոնթօ
- Սուրբ Նշան եկեղեցի, Գէմպրիճ
- Սուրբ Գրիգոր Լուսաւորիչ եկեղեցի, Վանգուվըր
- Սուրբ Գէորգ եկեղեցի, Լաւալ
- Սուրբ Պօղոս եկեղեցի, Սէյնթ Գաթրինզ
- Սուրբ Վարդան եկեղեցի, Ուինիփեկ
- Սուրբ Ստեփանոս եկեղեցի, Ուինզըր
Կայք՝ www.armenianprelacy.ca
