22-23 Յունուար 2024-ին, Ժապալ Ալիի (Ա.Մ.Է.) կաթոլիկ եկեղեցւոյ մէջ տեղի ունեցաւ Ծոցի Եկեղեցիներու Խորհուրդի համաժողովը, որուն յանուն Մեծի Տանն Կիլիկիոյ Կաթողիկոսութեան մասնակցեցաւ Քուէյթի Եւ Շրջակայից Հայոց Թեմի կաթողիկոսական փոխանորդ Գերպ. Տ. Պետրոս Ծ. Վրդ. Մանուէլեան։
Յիշենք, որ Ծոցի Եկեղեցիներու Խորհուրդին անդամ են Կիլիկիոյ Կաթողիկոսութեան երկու թեմերը՝ Քուէյթի եւ Շրջակայից Հայոց Թեմն ու Արաբական Միացեալ Էմիրութեանց, Քաթարի Եւ Շրջակայից Հայոց Թեմը:
Յայտնենք, թէ համագումարին առաջին օրը, Ն.Ս.Օ.Տ.Տ. Արամ Ա. Վեհափառ Հայրապետը այցելեց համագումարի կեդրոնավայր եւ դասախօսեց՝ հինգ կէտերու մէջ ամփոփելով միջ-եկեղեցական շարժումին իմաստն ու նպատակը։
Նշենք, թէ համաժողովը Ծոցի Եկեղեցիներու Խորհուրդի յառաջիկայ երկու տարուան համար ընտրեց նոր գործադիր մարմին մը, որուն անդամ ընտրուեցաւ նաեւ Արաբական Միացեալ Էմիրութեանց, Քաթարի Եւ Շրջակայից Հայոց Թեմի առաջնորդ Գերշ. Տ. Մեսրոպ Եպս. Սարգիսեան:
