News

Մեծի Տանն Կիլիկիոյ Կաթողիկոսութիւնը միշտ կը մնայ սուրիահայութեան կողքին՚ Ն.Ս.Օ.Տ.Տ. Արամ Ա. Կաթողիկոս

10 March 2013

Կիրակի 10 Մարտ 2013, առաւօտեան Սուրբ եւ Անմահ Պատարագէն ետք, Վեհափառ Հայրապետը իր մօտ հրաւրեց Լիբանան ժամանակաւորապէս հաստատուած Սուրիահայերէն խումբ մը: Վեհափառ Հայրապետը մօտէն հետաքրքրուեցաւ անոնց կեցութեան ու գործին, ինչպէս նաեւ զաւակներուն կրթական կեանքին առնչուած հարցերով: Ան հրաւիրեց ներկաները, որ արտայայտուին իրենց ունեցած դժուարութիւններուն, մտահոգութիւններուն ու կարիքներուն մասին:

 

Լսելէ ետք Սուրիահայերուն մտահգոութիւնները, Վեհափառ Հայրապետը շեշտեց հետեւեալ կէտերը.–

 

«ա) Սուրիոյ տագնապին առաջին իսկ օրէն Մեծի Տանն Կիլիկիոյ Կաթողիկոսութիւնը իր Ազգ. Կեդրոնական Վարչութեամբ, միաբանութեամբ ու թեմերով եղաւ Սուրիահայութեան կողքին: Մեր Սուրբ Աթոռը միշտ պիտի մնայ այդպէս: Հանգանակութիւններ կազմակերպեցինք, որոշ գումար փոխանցեցինք. այս ընթացքը պիտի շարունակուի այնքան ատեն որ Սուրիահայ մեր ժողովուրդը լուրջ կարիքներու դիմաց է:

 

«բ) Մեր բարձր գնահատանքը կը յայտնենք մեր թեմերուն, գաղութներուն, անհատ ազգայիններուն, որոնք սիրով ընդառաջեցին Սուրիահայութեան օժանդակելու Մեր կոչին: Այս առիթով նաեւ Մեր գնահատանքը ու շնորհակալութիւնը կ’ուզենք յայտնել Հայաստանի պետութեան ու Ամենայն Հայոց Կաթողիկոսութեան, անոնց կատարած օժանդակութեան համար: Սուրիահայ գաղութը յատուկ կարեւորութիւն ունեցող գաղութ է մեր ժողովուրդի կեանքէն ներս: Հետեւաբար, Մեր սպասումն է, որ օժանդակութիւնը Սուրիահայութեան վերանորոգ թափով շարունակուի:

 

«գ) Ինչպէս յաճախ շեշտած ենք, Սուրիահայութեան ներքին միասնականութեան ամրապնդումը հրամայական է: Միասին ըլլալը, միասին խորհրդակցիլը ու միասնաբար ծառայելը մեր ժողովուրդին առաջնահերթ տեղ պէտք է գրաւէ մեր կեանքէն ներս: Առանց խտրութեան հարկ է օժանդակել Սուրիոյ զանազան շրջաններուն մէջ կայք հաստատած ու յատկապէս աջակցութեան կարիք ունեցող մեր ժողովուրդի զաւակներուն: Գոհունակութեամբ կը հաստատենք, որ ա՛յս ոգիով կը գործեն մեր մարմինները Սուրիոյ մէջ:

 

«դ) Սուրիահայութեան վերականգնումը համազգային առաջնահերթութիւն է: Վստահ ենք, որ այս գիտակցութեամբ պիտի շարունակեն գործել մեր ժողովուրդին բոլոր զաւակներն ու մեր կառոյցները: Հայաստանի թէ Լիբանանի մէջ պայմաններու բերումով հաստատուած մեր ժողովուրդի զաւակները վստահաբար պիտի վերադառնան իրենց տուներուն ու գործերուն Սուրիոյ մէջ, անմիջապէս որ ապահովութիւնը վերահաստատուի»:

 

Ապա Վեհափառ Հայրապետը իր գնահատանքը յայտնեց Լիբանանահայութեան, որ իր կարելին կը կատարէ օգտակար ըլլալու Լիբանան ապաստանած Սուրիահայ ընտանիքներուն: