Ն.Ս.Օ.Տ.Տ. Արամ Ա. Կաթողիկոսի օրհնութեամբ, 22 Յունուար 2024-ին, Գերշ. Տ. Նարեկ Արք. Ալեէմէզեան Վատիկանի մէջ հանդիպում ունեցաւ Վատիկանի Պետական Քարտուղար՝ Բիեթրօ Բարոլին Քարտինալին հետ։ Յատուկ օրակարգի նիւթ դարձաւ Լիբանանը դիմագրաւող ներկայ դժուարութիւնները։ Այս ծիրէն ներս Նարեկ Արք. Քարտինալին փոխանցեց Վեհափառ Հայրապետին կարգ մը մտահոգութիգնները ու պատկերացումները։ Ան նաեւ յայտնեց, որ Լիբանանը դիմագրաւող հարցերուն գծով Նորին Սրբութիւնը վերջերս Տոհայի մէջ պաշտօնական հանդիպում ունեցած էր Քաթարի վարչապետին հետ։
Քարտինալը մօտէն ճանչնալով Հայրապետին գործունէութիւնը՝ ջերմօրէն ողջունեց միջ-եկեղեցական ու միջ-կրօնական յարաբերութիւններու, ինչպէս նաեւ Լիբանանի առնչուած դժուարութիւններու բարւոք լուծման գծով Վեհափառ Հայրապետին ճիգերը։
