News

Արամ Ա. Կաթողիկոս Թռչնոց Բոյնի մանուկներուն հետ դիմաւորեց Նոր Տարին

23 December 2013

Նոր Տարուան եւ Սուրբ Ծննդեան տօներու նախօրեակին, Երկուշաբթի 23 Դեկտեմբեր 2013-ին, Ն.Ս.Օ.Տ.Տ. Արամ Ա. Վեհափառ Հայրապետը միաբան հայրերու ընկերացութեամբ այցելեց Թռչնոց Բոյն, ուր դիմաւորուեցաւ Գայանեան Քոյրերուն, Տնօրէնութեան ու Խնամակալութեան անդամներուն կողմէ։ Ապա, Նորին Սրբութիւնը աշակերտութեան հետ ժամանակ անցուց, լսեց անոնց նոր տարուան ու Սուրբ Ծննդեան յատուկ երգերն ու արտասանութիւնները եւ անոնց նուէրներ բաժնեց։

 

Յայտնենք, Թռչնոց Բոյնը կը վայելէ Մեծի Տանն Կիլիկիոյ Կաթողիկոսութեան հոգածութիւնը եւ Վեհափառ Հայրապետին յատուկ խնամքը։ Թռչնոց Բոյնը Սփիւռքի այն միակ հաստատութիւնն է, ուր անօգնական եւ աղքատ ընտանիքներու զաւակներ կը պատսպարուին, ուսում ու կրթութիւն կը ստանան, ապագային բարենպաստ կեանքի պայմաններ ունենալու ի խնդիր։