Պոլսոյ «Ս. Վարդանանց Դպրաց Դաս Երգչախումբ»ը այս օրերուն կը գտնուի Լիբանան, «Համազգային»ի Լիբանանի Շրջանային Վարչութեան հրաւէրով: Կիրակի, 5 Հոկտեմբեր 2014-ի առաւօտուն, երգչախումբը այցելեց Անթիլիաս եւ կատարեց Ս. Գրիգոր Լուսաւորիչ Մայր Տաճարի պատարագի երգեցողութիւնը, ղեկավարութեամբ Բրշ. Ատրուշան Սրկ. Հալաճեանի:
Պատարագէն ետք, երգչախումբը ներկայ գտնուեցաւ Մեծի Տանն Կիլիկիոյ Կաթողիկոսութեան Դպրեվանքի 85-րդ տարեշրջանի ուսումնական-կրթական բացման հանդէսին:
Հանդիսութեան աւարտին, Ն.Ս.Օ.Տ.Տ. Արամ Ա. Կաթողիկոս գնահատելով «Ս. Վարդանանց Դպրաց Դաս Երգչախումբ»ի ղեկավար՝ Բրշ. Ատրուշան Սրկ. Հալաճեանի երկար տարիներու ծառայութիւնն ու վաստակը հայ երաժշտութեան մարզէն ներս, զինք պարգեւատրեց Մեծի Տանն Կիլիկիոյ Կաթողիկոսութեան «Ս. Մեսրոպ Մաշտոց»ի շքանշանով:
Ապա, աւելի քան 50 հոգիներէ բաղկացած երգչախումբն ու վարչութեան անդամները, առաջնորդութեամբ երգչախումբի նախագահ Գերպ. Տ. Թաթուլ Ծ. Վրդ. Անուշեանի, Վեհափառ Հայրապետին ճաշի հիւրերը եղան:
