Տ. Անանիա Ծ. Վրդ. Գուճանեան ծնած է 1 Յուլիս 1982-ին, Պէյրութ, Լիբանան։ Աւազանի անունն է Անդրանիկ։ Նախնական կրթութիւնը ստացած է Պուրճ Համուտի Ազգային Սրբոց Քառասնից Մանկանց նախակրթարանի, ապա շարունակած՝ Ազգային Լեւոն եւ Սոֆիա Յակոբեան Քոլէճի միջնակարգի բաժնին մէջ։
Մեծի Տանն Կիլիկիոյ Կաթողիկոսութեան Դպրեվանք ընդունուած է 1995-ի Հոկտեմբերին։ Աւարտելով Դպրեվանքի Ժառանգաւորաց բաժնի հնգամեայ ուսումը՝ անցած է Ընծայարանի բաժին եւ առաջին տարուան աւարտին, 2 Յունիս 2002-ին, ձեռնադրուած է սարկաւագ, ձեռամբ Տ. Տիրայր Եպս. Փանոսեանի։
Կուսակրօն քահանայ ձեռնադրուած ու օծուած է 7 Յունիս 2004-ին, ձեռամբ Թեհրանի Հայոց Թեմի առաջնորդ Տ. Սեպուհ Արք. Սարգիսեանի, եւ վերակոչուած՝ Տ. ԱՆԱՆԻԱ ԱԲԵՂԱՅ։
2005-ին հոգեւոր առաքելութեամբ մեկնած է Ատրպատականի Հայոց Թեմ՝ ստանձնելով Ուրմիոյ հայ գաղութին հոգեւոր հովուութիւնը, ուր երեք տարի ծառայելէ ետք վերադարձած է Մայրավանք եւ ստանձնած վանական զանազան պատասխանատուութիւններ։
2009-ին դարձեալ հոգեւոր առաքելութեամբ գործուղղուած է Սպահանի Հայոց Թեմ՝ այս անգամ ստանձնելով Շահինշահրի հոգեւոր տեսչութիւնը։
Վարդապետական գաւազան կրելու իշխանութիւն ստացած է 5 Դեկտեմբեր 2010-ին, ձեռամբ Տ. Կոմիտաս Արք. Օհանեանի՝ աւարտաճառ ներկայացնելով «Հայ Դատը եւ Մեծի Տանն Կիլիկիոյ Կաթողիկոսութիւնը» թեման։ Որպէս գնահատանք հայր սուրբին բարւոք ծառայութեան, Արամ Ա. Կաթողիկոսին օրհնութեամբ, 2012-ին ստացած է լանջախաչ կրելու իրաւունք. իսկ ծայրագոյն վարդապետութեան իշխանութիւն ստացած է 22 Մայիս 2016-ին, ձեռամբ Լիբանանի Հայոց Թեմի առաջնորդ Տ. Շահէ Եպս. Փանոսեանի, աւարտաճառ ներկայացնելով «Սահակ Բ. Կաթողիկոսի Նամակները»։
Սպահանի Հայոց Թեմին մէջ 8 տարի ծառայելէ ետք վերադարձած է Անթիլիասի Մայրավանք եւ նշանակուած՝ Լիբանանի Հայոց Թեմի առաջնորդի օգնական եւ քարոզիչ։
2020 թուականէն մինչեւ վախճանումը հայր սուրբը հոգեւոր տեսուչը եղած է Պէքայի շրջանին։
ՅԻՇԱՏԱԿՆ ԱՐԴԱՐՈՑ ՕՐՀՆՈՒԹԵԱՄԲ ԵՂԻՑԻ։
