Ուրբաթ, 22 Հոկտեմբեր 2021-ին, Ն.Ս.Օ.Տ.Տ. Արամ Ա. Վեհափառ Հայրապետ Անթիլիասի Մայրավանքին մէջ ընդունեց Արժանթինի դեսպան Մորիսիոյ Ալիսի այցելութիւնը:
Դեսպանին այցելութեան հիմնական նպատակը Արժանթինի պետութեան անունով Նորին Սրբութեան շնորհակալութիւն յայտնել էր՝ Ֆրանսիս Պապին նուիրուած յատուկ հատորի մը մէջ յօդուածի ճամբով Հայրապետին կատարած մասնակցութեան համար։ Դեսպանը Միացեալ Նահանգներու մէջ կրօնա-փիլիսոփայական նիւթերու դասախօս եղած ըլլալով` հանդիպման առանցքը դարձան ներկայ ընկերութեան կեանքին մէջ կրօնի դերակատարութեան, ընդհանրապէս միջկրօնական երկխօսութեան ու գործակցութեան հարցերը: Քննարկումի նիւթ դարձան նաեւ Լիբանանի այժմու կացութեան առնչուած խնդիրները:
