Մեծի Տանն Կիլիկիոյ Կաթողիկոսութեան «Խաչիկ Պապիկեան Հրատարակչական Հիմնադրամ»-ի 16-րդ հրատարակութեան արժանացած է Խաչատուր Ռոստոմ Ստեփանեանի «Հայաստանում Խորհրդային Իշխանութեան Հաստատման Հիմնահարցը Սփիւռքահայ Հասարակական-Քաղաքական Մտքի Գնահատմամբ (1920-1930 թթ.)» աշխատասիրութիւնը։
Գիրքին գիտական խմբագիրն է ակադեմիկոս Աշոտ Մելքոնեան, իսկ խմբագիրը՝ պատմաբան Երուանդ Փամպուքեան։
Երեք գլուխներու մէջ ծաւալած գիտաշխատութիւնը կ՚արժեւորէ Հայաստանի խորհրդայնացումը, Փետրուարեան ապստամբութեան եւ խորհրդային իշխանութեան վերջնահաստատման հիմնախնդիրը եւ խորհրդային Հայաստանի կարգավիճակի խնդիրը՝ սփիւռքահայ հասարակական-քաղաքական միտքի շրջանակներուն մէջ։
Շուրջ 400 էջերէ բաղկացած գործին նպատակը պատմագիտականէն անդին նաե՛ւ ներկայացնել եւ վերլուծել է Սփիւռքի գնահատականները Հայաստանի խորհրդայնացման գործընթացին վերաբերեալ, որոնց համար հեղինակը օգտագործած է աւելի քան 400 հայկական եւ օտար աղբիւրներ։
Յայտնենք, որ գիրքը կարելի է գտնել նաեւ առցանց՝ այցելելով Կաթողիկոսարանի գրատան պաշտօնական կայքէջը.- www.ciliciabookstore.com։