News

ԼԵՀԱՍՏԱՆԻ ԴԵՍՊԱՆԸ ԱՅՑԵԼԵՑ Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍԻՆ

16 August 2021

Շաբաթ, 14 Օգոստոս 2021-ի առաւօտուն, Լիբանանի մօտ Լեհաստանի դեսպան Փրիմիսլաօ Նիսիոլովսկի այցելեց Ն.Ս.Օ.Տ.Տ. Արամ Ա. Վեհափառ Հայրապետին: Դեսպանին կ՚ընկերանային դեսպանատան հիւպատոսը, Լեհաստանի մշակութային նախարարութեան տնօրէնուհին եւ Լեհաստանի հայկական գաղութի ներկայացուցիչ Մաթէ Պօղոսովիչ:

 

Հանդիպումը առիթ հանդիսացաւ անդրադարձ կատարելու Լիբանանի եւ Լեհաստանի յարաբերութեան, ինչպէս նաեւ՝ Լեհաստանի եւ Հայաստանի, Լեհաստանի հայկական գաղութի ներկայ իրավիճակին եւ մշակոյթի նախարարութեան ծրագիրներուն յատկապէս Լիբանանէն ներս։

 

Վեհափառ Հայրապետը անհրաժեշտ բացատրութիւններ տուաւ հայ եկեղեցւոյ առաքելութեան, Լիբանանի հայ գաղութին եւ Արցախի վերջին պատերազմին գծով՝ շեշտելով լեհ եւ հայ ժողովուրդի պատմական յարաբերութիւնը: