News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍԻ ՀԱՆԴԻՊՈՒՄՆԵՐԸ

03 June 2021

Անցնող օրերու ընթացքին, Պիքֆայայի Սուրբ Աստուածածին Վանքին մէջ Ն.Ս.Օ.Տ.Տ. Արամ Ա. Վեհափառ Հայրապետին այլ այցելութիւններու շարքին՝ հետեւեալ  պատասխանատու հոգեւորականներն ու ազգայինները այցելեցին.-

 

ա) Ատրպատականի Հայոց Թեմի առաջնորդ Գերշ. Տ. Գրիգոր Արք. Չիֆթճեան: Առաջնորդ սրբազանը զեկուցեց Վեհափառ Հայրապետին թեմին գործունէութեան ու դիմագրաւած մարտահրաւէրներուն մասին։

 

բ) Քուէյթի եւ Շրջակայից Թեմի Կաթողիկոսական Փոխանորդ Հոգշ. Տ. Պետրոս Վրդ. Մանուէլեան, ընկերակցութեամբ Քուէյթի ազգայիններէն Ռուբէն Աւշարեանին: Հայր սուրբը թեմի աշխատանքներուն մասին զեկոյց մը տուաւ Նորին Սրբութեան:

 

գ) Ճէզիրէի Հայոց Առաջնորդական Փոխանորդ Հոգշ. Տ. Լեւոն Վրդ. Եղիայեան: Հայր սուրբը տեղեակ պահեց Վեհափառ Հայրապետը շրջանին ընդհանուր կացութեան եւ յատկապէս Գամիշլիի եւ շրջակայից հայ համայնքներու կարիքներուն մասին:

 

դ) Նորին Սրբութիւնը յատուկ նամակ մը յղեց Սուրիոյ նորընտիր նախագահ Պաշշար Ալ Ասատին՝ շնորհաւորելով իր վերընտրութիւնը, միաժամանակ իր ջերմ շնորհակալութիւնը յայտնելով Սուրիոյ հայութեան նկատմամբ իր ցուցաբերած հոգածութեան համար:

 

ե) Հայ Կաթողիկէ համայնքէն Հալէպի Հայ Կաթողիկէ համայնքի առաջնորդ եւ Պատրիարքական Տեղապահ Գերապայծառ Տ. Պետրոս Արք. Միրիաթեան եւ Պատրիարքական Փոխանորդ Գերապայծառ Տ. Գէորգ Եպս. Ասատուրեան: Անոնք Վեհափառ Հայրապետին շնորհակալութիւն յայտնեցին, որ անձամբ ներկայ գտնուած էր Երջանկայիշատակ Հոգեւոր Տիրոջ թաղման արարողութեան: