11 Հունվարի, 2021

«ԽԱՉԻԿ ՊԱՊԻԿԵԱՆ» ՀԻՄՆԱԴՐԱՄԻ ՅԱՆՁՆԱԽՈՒՄԲԸ ԿԸ ՔՆՆԱՐԿԷ ՆՈՐ ՈՒՍՈՒՄՆԱՍԻՐՈՒԹԻՒՆՆԵՐՈՒ ՀՐԱՏԱՐԱԿՈՒԹԻՒՆԸ

Մեծի Տանն Կիլիկիոյ Կաթողիկոսութեան «Խաչիկ Պապիկեան» հիմնադրամի յանձնախումբի հերթական նիստը տեղի ունեցաւ Երկուշաբթի, 11 Յունուար 2021-ին, Անթիլիասի Մայրավանքին մէջ, նախագահութեամբ Ն.Ս.Օ.Տ.Տ. Արամ Ա. Վեհափառ Հայրապետին եւ ատենապետութեամբ Երուանդ Փամպուքեանին։ Ներկայ էին յանձնախումբի անդամներ փրոֆ. Աշոտ Մելքոնեան, Շահան Գանտահարեան եւ Խաչիկ Տէտէեան։

 

Ժողովը լսեց զեկուցումներ անցեալ տարուան ընթացքին լոյս տեսած հրատարակութիւններու մասին, որմէ ետք քննեց անգլերէն, արաբերէն եւ հայերէն լեզուներով պատմաքաղաքական բնոյթ ունեցող եւ յանձնախումբին ներկայացուած տարբեր աշխատասիրութիւնները հրատարակելու նպատակայարմարութիւնը։

 

Նկատի ունենալով, որ Վեհափառ Հայրապետը 2021-ը հռչակած է «Արցախի Տարի», յանձնախումբը կոչ կ՚ուղղէ Հայաստանի թէ Սփիւռքի գիտական շրջանակներուն, ներկայացնելու Արցախի վերաբերող պատմաքաղաքական եւ իրաւագիտական գիտաշխատութիւններ։

 

Նշենք, որ մօտ օրէն հրատարակութեան կը յանձնուի Հայաստանի Ա. Հանրապետութեան 100-ամեակին առիթով Անթիլիաս Մայրավանքին մէջ կայացած գիտաժողովին ներկայացուած զեկուցումներու հաւաքածոն։

More News