News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍԻՆ ՇՆՈՐՀԱՒՈՐԱԿԱՆ ՆԱՄԱԿԸ ԱՐՑԱԽԻ ՆԱԽԱԳԱՀԻՆ ՀԱՆՐԱՊԵՏՈՒԹԵԱՆ ԱՆԿԱԽՈՒԹԵԱՆ ՏՕՆԻՆ ԱՌԻԹՈՎ

02 September 2020

Մեծայարգ
Տիար Արայիկ Յարութիւնեան
Արցախի Հանրապետութեան Նախագահ

 

Մեծի Տանն Կիլիկիոյ Կաթողիկոսութեան Անթիլիասի Մայրավանքէն Հայրապետական օրհնութեամբ, քրիստոնէական ջերմ սիրով եւ ազգային վառ ապրումներով կ՚ողջունենք Ձեզ:

 

2 Սեպտեմբեր թուականը ողջ հայութեան համար ցնծութեան օր է: Արդարեւ, 29 տարիներ առաջ Արցախի մեր սիրելի ժողովուրդը իմաստութիւնը ու քաջութիւնը ունեցաւ իր պատմական հայրենիքին մաս կազմող Արցախի հողին վրայ իր անկախութիւնը վերահաստատելու: Արցախի անկախութեան հռչակումը մեր ժողովուրդի հաւաքական հաւատքին ու ամուր վճռակամութեան շօշափելի արտայայտութիւնն էր:

 

Անցնող 29 տարիներուն Արցախը դարձաւ ոչ միայն Արցախի հայութեան, այլ համայն հայութեան ուշադրութեան կիզակէտը: Մեր ազգի զաւակները մասնակից դարձան, Արցախի հայութեան կողքին, Արցախի հզօրացման ձգտող այլազան ու բազմազան ծրագիրներու իրագործման:

 

Արցախի անկախութեան նշումը ուրախութեան ու հպարտութեան կողքին նաեւ պէտք է դառնայ յիշեցումի օր մեր ժողովուրդին համար: Արդ, հայոց բանակին կողքին ըլլալը, Արցախի զարգացման գործօն մասնակցութիւն բերելը, Արցախի իրաւաքաղաքական իրաւունքները պաշտպանելը պէտք է շարունակէ մնալ իւրաքանչիւր հայու սրբազան պարտաւորութիւնը:

 

Մեծի Տանն Կիլիկիոյ Կաթողիկոսութիւնը միշտ կը մնայ Արցախի մեր ժողովուրդին ու պետութեան կողքին՝ վերանորոգ նուիրումով իր ներդռումը կատարելով Արցախի հզօրացման աշխատանքներուն:

 

Այս առիթով, մեր Հայրական սէրը ու Հայրապետական օրհնութիւնը կը փոխանցենք Ձեզի, պարոն նախագահ, Ձեր գլխաւորած կառավարութեան, Արցախի սահմանները տիւ ու գիշեր պաշտպանող հայոց արի բանակին եւ մեր ժողովուրդի սիրելի զաւակներուն: Թող Աստուած իր երկնային հովանիին ներքեւ պահէ, պահպանէ ու հզօրացնէ Արցախի Հանրապետութիւնը:


Աղօթարար՝

ԱՐԱՄ Ա. ԿԱԹՈՂԻԿՈՍ
ՄԵԾԻ ՏԱՆՆ ԿԻԼԻԿԻՈՅ

Անթիլիաս, Լիբանան
2 Սեպտեմբեր 2020