Շուրջ ժամ մը առաջ, ուխտագնացութենէն վերադարձի ճամբուն վրայ, ահաբեկիչներու կողմէ յարձակումի ենթարկուելով զոհուեցան Ղպտի եկեղեցւոյ պատկանող 26 հաւատացեալներ եւ ծանրօրէն վիրաւորուեցան 25 անձեր: Այս առիթով Ն.Ս.Օ.Տ.Տ. Արամ Ա. Վեհափառ Հայրապետը հետեւեալ նամակը յղեց Ղպտի Եկեղեցւոյ Պատրիարք՝ Նորին Սրբութիւն Թաուատրոս Բ.ին.-

Նորին Սրբութիւն Թաուատրոս Բ.
Ղպտի Ուղղափառ Եկեղեցւոյ Պատրիարք
Գահիրէ

Քիչ առաջ խոր ցաւով ու ընդվզումով իմացանք Ղպտի եկեղեցւոյ 26 ուխտաւոր զաւակներու դէմ գործուած ոճիրին մասին: Ահա դարձեալ ահաբեկչութիւնը կը հարուածէ մեր քոյր եկեղեցին: Խստօրէն կը դատապարտենք ահաբեկչութիւնը, որ դարձած է ներկայ ժամանակներու մեծագոյն չարիքը: Կը զգանք Ձերդ Սրբութեան խոր վիշտը. կը զգանք նաեւ ահաբեկչութեան զոհ գացած, ինչպէս նաեւ վիրաւորուած Ձեր հոգեւոր զաւակներու ընտանիքներուն ցաւը: Կը վստահեցնենք Ձեզ, որ այս դժուար օրերուն աղօթքի, եղբայրական սիրոյ ու հոգեւոր զօրակցութեան ճամբով Ձեզի հետ ենք:

Կ’աղօթենք առ Աստուած, որ երկինքի թագաւորութեան մէջ ընդունի նահատակներու հոգիները եւ անոնց ընտանիքներուն պարգեւէ Սուրբ Հոգւոյ մխիթարութիւնը: Կ’աղօթենք առ Աստուած, որ Ձերդ Սրբութիւնը հոգեպէս զօրացնէ՝ դիմագրաւելու Ղպտի եկեղեցին հարուածող ներկայ տագնապները:

Եղբայրական սիրով աղօթակից ՝
ԱՐԱՄ Ա. ԿԱԹՈՂԻԿՈՍ
ՄԵԾԻ ՏԱՆՆ ԿԻԼԻԿԻՈՅ

Անթիլիաս
26 Մայիս 2017