Մեծայարգ
Տոքթ. Հասան Ռուհանի
Ընտրեալ Նախագահ
Իրանի Իսլամական Հանրապետութեան
Թեհրան
Ուրախութեամբ կ’ողջունենք Ձեր ընտրութիւնը որպէս նախագահ Իրանի Իսլամական Հանրապետութեան:
Արդարեւ, քաջածանօթ ենք Իրանի դիմագրաւած մարտահրաւէրներուն: Վստահաբար, պետական կառոյցներէն ներս Ձեր կուտակած երկար տարիներու հարուստ փորձառութեամբ, ինչպէս նաեւ Ձեր բարեկարգչական ծրագիրներով Իրանի Իսլամական Հանրապետութեան առջեւ պիտի բանաք դէպի առաւել բարգաւաճում ու յառաջդիմութիւն առաջնորդող նոր ճամբաներ ու հորիզոններ:
Ինչպէս գիտէք, Հայ համայնքը Իրանի մէջ երկար դարերու պատմութիւն ունի: Ան անբաժան մասն է իրանեան հայրենիքին՝ պահելով հանդերձ իր առանձին ինքնութիւնը եւ կրօնական ու համայնքային կառոյցները: Մենք լաւատեղեակ ենք Հայ համայնքին հանդէպ Ձեր ունեցած դրական ու բարիացակամ վերաբերմունքին: Վստահ ենք, որ մեր համայնքը վերանորոգ նուիրումով Ձեր առաջնորդութեամբ պիտի շարունակէ իր ամբողջական ու գործօն մասնակցութիւնը բերել Իրանի ծաղկման աշխատանքներուն:
Կ’աղօթենք առ Աստուած, որ Ձեզի շնորհէ առաւել իմաստութիւն, առողջութիւն ու կորով, Իրանի ազնիւ ժողովուրդին կողմէ Ձեզի վստահուած առաքելութեան մէջ:
ԱՐԱՄ Ա. ԿԱԹՈՂԻԿՈՍ
ՄԵԾԻ ՏԱՆՆ ԿԻԼԻԿԻՈՅ
