Հինգշաբթի, 5 Նոյեմբեր 2015-ի առաւօտուն, Գահիրէի մէջ հանդիպում մը տեղի ունեցաւ Ն.Ս.Օ.Տ.Տ. Արամ Ա. Կաթողիկոսի և Ղպտի եկեղեցւոյ հոգեւոր պետ՝ Նորին Ամենապատուութիւն Թաւատրոս Բ. Պատրիարքի միջեւ։ Հանդիպման ներկայ էր նաեւ Ղպտի եկեղեցւոյ Միջ-Եկեղեցական յարաբերութեանց պատասխանատու՝ Մետրոպոլիտ Անպա Պիշոյ։
Եղբայրական սիրոյ մթնոլորտին մէջ տեղի ունեցած այս հանդիպումը առիթ մը հանդիսացաւ երկու հոգեւոր պետերուն քննարկելու Հայ և Ղպտի Եկեղեցիներու գործակցութիւնը, ինչպէս նաեւ Միջին-Արեւելքի Եկեղեցիներու միջեւ գործակցութեան լայն կարելիութիւններ ստեղծելու միջոցները։ Նաեւ ընդհանուր արժեւորում մը կատարուեցաւ Միջին-Արեւելքի Եկեղեցիներու Խորհուրդին Գործադիր Վարչութեան Ժողովին և յառաջիկայ ծրագիրներուն։
Գահիրէի մէջ տեղի ունեցած Մ.Ա.Ե.Խ. Գործադիր Վարչութեան Ժողովը իր եզրափակիչ նիստին ընդհանուր յայտարարութիւն մը կատարեց, որուն մէջ նաեւ յիշուեցաւ Հայոց Ցեղասպանութեան 100-ամեակը։
Յայտնենք, որ Միջին-Արեւելքի Եկեղեցիներու Խորհուրդի ընդհանուր համաժողովը տեղի պիտի ունենայ յառաջիկայ Սեպտեմբերին, Ամմանի մէջ (Յորդանան)։
