Չորեքշաբթի, 15 Ապրիլ 2015-ին, Յունաց Տիեզերական Պատրիարքութեան պատրիարքարանին մէջ, Կոստանդնուպոլիս, տեղի ունեցաւ Ուղղափառ եկեղեցիներուն (Քաղկեդոնական եւ Ոչ-քաղկեդոնական) Մնայուն յանձնախումբին եւ Աստուածաշունչի Միացեալ Ընկերութեանց (UBS)՝ Եկեղեցիներու Յարաբերութեան յանձնախումբին միօրեայ հանդիպումը: Սոյն ժողովին, յանուն Մեծի Տանն Կիլիկիոյ Կաթողիկոսութեան իր մասնակցութիւնը բերաւ Թեհրանի Հայոց Թեմի Առաջնորդական Փոխանորդ՝ Գերշ. Տ. Մակար եպս. Աշգարեան:
Հանդիպման հիմնական նպատակն էր քննութեան ենթարկել եւ վերջնական ձեւի բերել նախապէս խմբագրուած ուղեգիծը (memorandum): Ուղեգիծը կը ներկայացնէ այն խորհրդակցութեան արդիւնքը, որ տեղի ունեցած է Ուղղափառ եկեղեցիներուն եւ Աստուածաշունչի Միացեալ Ընկերութեանց միջեւ՝ փոխադարձ յանձնառութեամբ շարունակելու բոլոր այն աշխատանքները, որոնք կապ ունին Աստուածաշունչի թարգմանութեան, հրատարակութեան եւ բաշխումին: Ժողովականները որոշ փոփոխութիւններ ու սրբագրութիւններ կատարելէ ետք յոյս յայտնեցին, որ ուղեգիը պիտի ծառայէ իր նպատակին ու պտղաբեր արդիւնք տայ:
