Այս առաւօտ Ն.Ս.Օ.Տ.Տ. Արամ Ա. Վեհափառ Հայրապետը մեկնեցաւ Գահիրէ մասնակցելու Միջին Արեւելքի Արեւելեան Ուղղափառ Եկեղեցիներու հոգեւոր պետերու հանդիպումին։ Շուրջ 15 տարիներ առաջ ընթացք ստացած Միջին Արեւելքի հոգեւոր պետերու հանդիպման պիտի մասնակցին Վեհափառ Հայրապետը, Ղպտի եկեղեցւոյ Թաուատրոս Բ. Պատրիարքը և Ասորի եկեղեցւոյ Իգնատիոս Աֆրամ Բ. Պատրիարքը։
Յիշեալ հանդիպումէն օր մը առաջ պիտի հանդիպի հոգեւոր պետերուն կողմէ ճշդուած Գործադիր Յանձնախումբը, որուն Մեծի Տանն Կիլիկիոյ Կաթողիկոսութեան կողմէ մաս կը կազմեն Գերշ. Տ. Սեպուհ Արք. Սարգիսեան, Առաջնորդ Թեհրանի Հայոց Թեմին, և Գերպ. Տ. Յուսիկ Ծ. Վրդ. Մարտիրոսեան վարիչ Կաթողիկոսարանի Միջ-եկեղեցական յարաբերութեանց։
