29 Դեկտեմբերի, 2014

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ Կ’ԱՅՑԵԼԷ ԱԶՈՒՆԻԷԻ ԱԶԳԱՅԻՆ ԲՈՒԺԱՐԱՆԸ

         Ն.Ս.Օ.Տ.Տ. Արամ Ա. Կաթողիկոս, Նոր Տարուան եւ Ս. Ծննդեան տօներուն նախօրեակին կատարած ազգային ընկերային ծառայութիւն մատուցող հաստատութիւններու այցելութիւնները շարունակելով, Երկուշաբթի, 29 Դեկտեմբեր 2014-ի առաւօտուն, այցելեց Ազունիէի Ազգային Բուժարանը, միաբան հայրերու ընկերակցութեամբ:

 

            Վեհափառ Հայրապետը նախ տեսակցութիւն ունեցաւ Ազգ. Բուժարանի խնամակալութեան, տնօրէնութեան եւ պատասխանատու բժիշկներուն հետ: Նորին Սրբութիւնը գնահատեց անոնց տարած ազգային ու մարդասիրական ծառայութիւնը եւ քաջալերեց, որ շարունակեն իրենց առաքելութիւնը:

 

            Ապա, Վեհափառ Հայրապետը հանդիպեցաւ հիւանդներուն ու պատսպարեալ ծերունիներուն հետ: Ան վստահեցուց պապիկներն ու մամիկները, որ իրենք զիրենք ապահով պէտք է զգան, որովհետեւ ազգը իրենց բոլոր բժշկական կարիքներուն կը հասնի: Նորին Սրբութիւնը նուէրներ բաշխելով օրհնեց զիրենք: Իսկ միաբան հայրերը Աստուածայայտնութեան նուիրուած շարականներու երգեցողութեամբ, Ս. Ծննդեան հոգեւոր պահ մը ստեղծեցին՝ մեր Տիրոջ եւ Փրկիչին աւետաբեր լոյսով ջերմացնելով ծերունիներուն հոգիները:

More News