Please follow the instructions to view this page in Armenian
ՄԻՋ-ԵԿԵՂԵՑԱԿԱՆ ԼՈՒՐԵՐ
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ԵԿԵՂԵՑԻՆԵՐՈՒ ՀԱՄԱՇԽԱՐՀԱՅԻՆ ԽՈՐՀՈՒՐԴԻ ՔՐԻՍՏՈՆԵԱՅ-ԻՍԼԱՄ ԵՐԿԽՕՍՈՒԹԵԱՆ ՄԻՋԱԶԳԱՅԻՆ ՀԱՄԱԳՈՒՄԱՐԻՆ ԹԵՀՐԱՆԻ ՄԷՋ
12/14/2008
13-14 Դեկտեմբեր 2008, Թեհրանի մէջ, քրիստոնեայ-իսլամ երկխօսութեան միջազգային համագումար մը տեղի ունեցաւ Եկեղեցիներու Համաշխարհային Խորհուրդի Իսլամ-Քրիստոնեայ Յարաբերութիւններու Բաժանմունքին եւ Իրանի Իսլամական Մշակոյթի եւ Միջազգային Հաղորդակցութեան Կազմակերպութեան Միջ-կրօնական Երկխօսութեան Կեդրոնին մասնակցութեամբ:
Եկեղեցիներու Համաշխարհային Խորհուրդի պատուիրակութիւնը գլխաւորեց Գերշ. Տ. Սեպուհ Արք. Սարգիսեան (Առաջնորդ Թեհրանի Հայոց):
Համագումարի դասախօսութիւններուն առանցքը կազմեց տարբեր կրօններու հետեւորդներուն միջեւ համակեցութիւնը: Սեպուհ Սրբազան դասախօսեց ՙՀայերը Իրանի մէջ - քրիստոնեայ-իսլամ համատեղ կեցութեան տիպար օրինակ՚ նիւթին շուրջ:
14 Դեկտեմբերին, նոյն կեդրոնէն ներս, Սեպուհ Սրբազան մասնակցեցաւ ուրիշ միջազգային համագումարի մըն ալ, որուն գլխաւոր թեման էր ՙՔաղաք եւ երկխօսութիւն՚ը:
Յայտնենք, որ Ե.Հ.Խ.-ին եւ Իրանի Իսլամական Հանրապետութեան Կրօնական Երկխօսութեանց Բաժանմունքին միջեւ երկխօսութիւնը ու գործակցութիւնը սկսաւ, Վեհափառ Հայրապետին նախաձեռնութեամբ շուրջ տասը տարիներ առաջ եւ տարին անգամ մը հանդիպում տեղի կ’ունենայ հերթաբար Ժընեւի եւ Թեհրանի մէջ: Այս ծիրէն ներս շուրջ չորս տարիներ առաջ նախկին Նախագահ Խաթեմի այցելեց Ժընեւի Ե.Հ.Խ.-ի կեդրոնը եւ դասախօսութիւն տուաւ:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ԵԿԵՂԵՑԱԿԱՆ ԸՆՏԱՆԻՔՆԵՐՈՒ ՔԱՐՏՈՒՂԱՐՆԵՐՈՒ ՏԱՐԵԿԱՆ ԺՈՂՈՎԻՆ
10/22/2008
21-22 Հոկտեմբեր 2008, Եկեղեցիներու Համաշխարհային Խորհուրդի Ժընեւի կեդրոնատեղիին մէջ, գումարուեցաւ Եկեղեցական Ընտանիքներու Քարտուղարներու տարեկան ժողովը, որուն մասնակցեցաւ Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու):
Այս ժողովը առիթ կ’ընծայէ եկեղեցական ընտանիքներու պատասխանատուներուն միասնաբար քննարկելու միջ-եկեղեցական յարաբերութիւններուն առնչուած հարցերը եւ իրարու հետ բաժնեկցելու համաքրիստոնէական մտահոգութիւնները:
Ժողովին միւս մասնակիցներն էին Ռուս Ուղղափառ, Հռոմէական Կաթոլիկ, Անկլիքան, Լուտերական, Բարեկարգեալ, Մեթոտիսթ, Բողոքական եւ Ազատ եկեղեցական ընտանիքները:
Նարեկ Սրբազան իր զեկոյցին մէջ անդրադարձաւ վերջին տարուան ընթացքին Արեւելեան Ուղղափառ Եկեղեցիներու ունեցած պաշտօնական աստուածաբանական երկխօսութիւններուն եւ միջ-եկեղեցական ու միջ-կրօնական յարաբերութիւններու մասնայատկութիւններուն:
Ժողովի օրակարգին մաս կազմեցին քրիստոնեայ-իսլամ երկխօսութիւնը եւ Եկեղեցիներու Համաշխարհային Խորհուրդին հետ յարաբերութիւնները:
ՀԱՅ ԵԿԵՂԵՑՒՈՅ ՄԱՍՆԱԿՑՈՒԹԻՒՆԸ
ԵԿԵՂԵՑԻՆԵՐՈՒ ՀԱՄԱՇԽԱՐՀԱՅԻՆ ԽՈՐՀՈՒՐԴԻ
ԳՈՐԾԱԴԻՐ ՎԱՐՉՈՒԹԵԱՆ ԺՈՂՈՎԻՆ
09/26/2008
22-26 Սեպտեմբեր 2008, Լուպէքի մէջ (Գերմանիա), գումարուեցաւ Եկեղեցիներու Համաշխարհային Խորհուրդի Գործադիր Վարչութեան ժողովը, որ տարին երկու անգամ կը գումարուի եւ հաշուետու է Կեդրոնական Վարչութեան:
Յանուն Հայ Եկեղեցւոյ, այս ժողովին մասնակցեցան Ս. Էջմիածնի Ամենայն Հայոց Կաթողիկոսութենէն՝ Գերշ. Տ. Վիգէն Արք. Այքազեան եւ Մեծի Տանն Կիլիկիոյ Կաթողիկոսութենէն՝ Գերշ. Տ. Նարեկ Եպս. Ալեէմէզեան:
Ժողովի օրակարգի գլխաւոր հարցերն էին.- Ընդհանուր Քարտուղարի զեկոյց եւ պաշտօնավարութեան միամեայ երկարաձգում, Նախագահներու արժեւորման տեղեկագիրի ընդունում, 2009-2010ի պիւտճէի քննարկում, ծրագիրներու ներկայացում, պաշտօնէութեան աշխատանքի գնահատում եւ ընկերա-քաղաքական հրատապ հարցերու գծով Խորհուրդի դիրքորոշում:
Ժողովը որոշեց Ընդհանուր Քարտուղար Դոկտ. Սէմ Գոպիայի պաշտօնավարութիւնը երկարաձգել մինչեւ 31 Դեկտեմբեր 2009: Իսկ Խորհուրդի պաշտօնէութեան մէջ ներառնել Մեծի Տանն Կիլիկիոյ Կաթողիկոսութեան ներկայացուցած թեկնածու Գարլա Խիժոյեանը, անոր վստահելով ՙարդարութիւն, ընկերային ծառայութիւն եւ ստեղծագործութեան հանդէպ պատասխանատուութիւն՚ ծրագիրի քարտուղարուհիի պաշտօնը:
Երկուշաբթի, 22 Սեպտեմբերին, Նարեկ Սրբազան այցելեց Լուպէքի Լուտերական Եկեղեցւոյ գաղթականներու հարցերով զբաղող կեդրոնատեղին եւ հանդիպում մը ունեցաւ պատասխանատուներուն հետ: Իր խօսքին մէջ, Սրբազանը անդրադարձաւ Հայկական Ցեղասպանութեան եւ ըսաւ.- ՙ1915ի Ցեղասպանութենէն վերապրածներու թոռ եմ ես: Ցեղասպանութեան հաւաքական վիշտը մինչեւ այսօր մեր մէջ կրելը կը պարտաւորէ բոլոր հայերս որ հաւաքական ճիգով հետամուտ ըլլանք արդարութեան հետապնդման եւ Հայկական Ցեղասպանութեան ճանաչման, որպէսզի այլ ցեղասպանութիւններ տեղի չունենան՚:
Երեքշաբթի, 23 Սեպտեմբերին, Նարեկ Սրբազան Արամ Ա. Կաթողիկոսի ողջոյնները փոխանցեց Գերմանիոյ Աւետարանական Եկեղեցիներու Պետ Ոլֆկանկ Հիւպըր Եպիսկոպոսին ու Խորհուրդի նախկին Ընդհանուր Քարտուղարներ Դոկտ. Ֆիլիփ Փոթըրին եւ Դոկտ. Գոնրատ Ռայզըրին, որոնք անդրադարձան Վեհափառ Հայրապետի միջ-եկեղեցական երկարամեայ վաստակին եւ Խորհուրդի ատենապետութեան շրջանին արձանագրուած իրագործումներուն:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՆԵՐԿԱՅԱՑՈՒՑԻՉ ՏԻԿ. ԹԵՆԻ ՓԻՐՐԻ-ՍԻՄՈՆԵԱՆ ՀԱՅ ԺՈՂՈՎՈՒՐԴԻ ԻՐԱՒՈՒՆՔԸ Կ’ԱՐԾԱՐԾԷ ՄԻՋ-ԵԿԵՂԵՑԱԿԱՆ ՀԱՄԱԳՈՒՄԱՐԻ ՄԸ ԸՆԹԱՑՔԻՆ
09/14/2008
Պաղեստին-Իսրայէլ Ֆօրիւմի գործունէութեան ծիրէն ներս, Եկեղեցիներու Համաշխարհային Խորհուրդին եւ Զուիցերիոյ Բարեկարգեալ Եկեղեցիներուն կազմակերպութեամբ, 10-14 Սեպտեմբեր 2008-ին Պերնի մէջ տեղի ունեցաւ Միջազգային Աստուածաբանական Համագումար մը՝ ՙ’Խոստացուած Հողամաս’ Նոր Տեսակէտներ՝ Իսրայէլեան եւ Պաղեստինեան Տագնապին եւ Ներկայ Ժամանակներուն Հողամասի Համար Տարուած Պայքարին գծով՚ նիւթին շուրջ: Աշխարհի բոլոր ցամաքամասերէն եկած 85 աստուածաբաններ հրաւիրուած էին այս ժողովին քննարկելու համար հողամասի սեփականութեան հասկացողութիւնը Աստուածաշունչին մէջ: Քննարկումներու ընթացքին յառաջ եկան զանազան հակասական տեսակէտներ՝ անդրադառնալով Հրէայ ժողովուրդին կողմէ Աստուածաշունչը յատուկ պայմաններու տակ կարդացուելուն եւ բացատրուելուն ձեւին:
Հողամասի Աստուածաշունչի հասկացողութիւնը աւելի ամբողջական կերպով ուսումնասիրելու նպատակով, ժողովականներու խումբ մը՝ Մեծի Տանն Կիլիկիոյ Կաթողիկոսութեան ներկայացուցիչ Տիկին Թենի Փիրրի-Սիմոնեանի նախագահութեամբ, քննարկեց Պրազիլի, Պաղեստինի եւ Հարաւային Ափրիկէի երեք պարագաները՝ իբրեւ նոր ժամանակներու հողամասի համար տարուած պայքարներ: Տիկին Թենի իր բացման խօսքին մէջ յիշեցուց ներկաներուն, որ ՙխոստացուած հողամաս՚ հասկացողութիւնը պայմանական է Աստուածաշունչին մէջ: Ան կարեւորութեամբ շեշտեց արդարութեան, խաղաղութեան ու համարատուութեան սկզբունքներու կարեւորութիւնը եւ այս ծիրէն ներս, ան յիշեց Հայկական Ցեղասպանութիւնը, անոր ուրացումը Թուրքիոյ կողմէ եւ Հայ ժողովուրդի հողային պահանջքը:
ԱՐԱՄ Ա. ՎԵՀԱՓԱՌ ՀԱՅՐԱՊԵՏԻՆ ՆԵՐԿԱՅԱՑՈՒՑԻՉԻՆ ՀԱՆԴԻՊՈՒՄԸ ԱՒԵՏԱՐԱՆԱԿԱՆ ԵԿԵՂԵՑԻՆԵՐՈՒ ԸՆԴՀԱՆՈՒՐ ՏՆՕՐԷՆԻՆ ՀԵՏ
08/28/2008
Հինգշաբթի, 28 Օգոստոս 2008, Վանգուվըրի մէջ (Գանատա), Ն.Ս.Օ.Տ.Տ. Արամ Ա. Կաթողիկոսի ներկայացուցիչ՝ Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու) այցելեց Աւետարանական Եկեղեցիներու Միջազգային Ընկերակցութեան կեդրոնատեղին եւ հանդիպում մը ունեցաւ Ընդհանուր Տնօրէն Դոկտ. Ճէֆ Թանիգլիֆի հետ:
Մէկ ժամ տեւած զրոյցի ընթացքին արծարծուեցան միջ-եկեղեցական եւ միջ-կրօնական հարցեր: Ընդհանուր Տնօրէնը մասնաւոր հետաքրքրութիւն ցոյց տուաւ Միջին Արեւելքի մէջ քրիստոնէական վկայութեան եւ Մեծի Տանն Կիլիկիոյ Կաթողիկոսութեան բազմաբնոյթ առաքելութեան հանդէպ:
Յայտնենք թէ Աւետարանական Եկեղեցիներու Միջազգային Ընկերակցութիւնը հիմնադրուած է 1846ին եւ այսօր 127 երկիրներու մէջ կը համադրէ Աւետարանական Եկեղեցիներու գործունէութիւնը:
ԱՄԵՐԻԿԱՅԻ ՄԻԱՑԵԱԼ ՆԱՀԱՆԳՆԵՐՈՒ ԵԿԵՂԵՑԻՆԵՐՈՒ ԽՈՐՀՈՒՐԴԻ ՊԱՏՈՒԻՐԱԿՈՒԹԻՒՆԸ ԱՆԹԻԼԻԱՍԻ ՄԷՋ
08/01/2008
Ուրբաթ, 1 Օգոստոս 2008, Անթիլիասի Մայրավանք այցելեց Ամերիկայի Միացեալ Նահանգներու Եկեղեցիներու Խորհուրդի եռանդամ պատուիրակութիւնը, որուն մաս կը կազմէին Գերշ. Տ. Վիգէն Արք. Այքազեան, Դոկտ. Մայքըլ Գինըմըն եւ Դոկտ. Փիթըր Մաքարի:
Պատուիրակութեան կ՜ընկերանար Միջին Արեւելքի Եկեղեցիներու Խորհուրդի Ընդհ. Քարտուղար Կրկես Սալեհը՝ երկու օգնականներով:
Յանուն Ն.Ս.Օ.Տ.Տ. Արամ Ա. Վեհափառ Հայրապետին պատուիրակութիւնը ընդունեց միջ-եկեղեցական յարաբերութիւններու վարիչ Գերշ. Տ. Նարեկ Եպս. Ալեէմէզեան, կողքին ունենալով միջ-եկեղեցական յարաբերութիւններու յանձնախումբի ատենապետուհի Դոկտ. Նորա Պայրագտարեան-Գապագեանը, իսլամ-քրիստոնեայ երկխօսութեան յանձնախումբի անդամ Դոկտ. Ժան Սալմանեանը եւ Միջին Արեւելքի Եկեղեցիներու Խորհուրդի ընկերային ծառայութեան բաժանմունքի տնօրէնուհի Տիկ. Սեդա Խտըշեանը:
Հանդիպումին ընթացքին հիւրերը պարզեցին իրենց Լիբանան տուած այցելութեան դրդապատճառները: Ապա, զրոյց տեղի ունեցաւ Լիբանանի կրօնական եւ քաղաքական կացութեան մասին՝ մասնաւորաբար շեշտը դնելով իսլամ-քրիստոնեայ յարաբերութիւններուն վրայ:
Լիբանանի ներ-համայնքային դրուածքին անդրադառնալով, Կաթողիկոսութեանս ներկայացուցիչները ընդգծեցին Հայ Եկեղեցւոյ ունեցած առանցքային դերակատարութիւնը եւ հայ գաղութի աշխոյժ ներկայութիւնը լիբանանեան կեանքի բոլոր բնագաւառներէն ներս:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ՄԻՋԻՆ ԱՐԵՒԵԼՔԻ ԵԿԵՂԵՑԻՆԵՐՈՒ ԽՈՐՀՈՒՐԴԻ ԿԱՆԱՆՑ ԲԱԺԱՆՄՈՒՆՔԻ ՀԱՄԱԳՈՒՄԱՐԻՆ
07/26/2008
Շաբաթ, 26 Յուլիս 2008, Պիքֆայայի Անտոնեան Մայրապետներու Վանքին մէջ, տեղի ունեցաւ Միջին Արեւելքի Եկեղեցիներու Խորհուրդի Կանանց Բաժանմունքի կազմակերպած միօրեայ համագումարը, որուն թեման էր ՙդիմագրաւում տնային վայրագութեան՚:
Մեծի Տանն Կիլիկիոյ Կաթողիկոսութեան կողմէ համագումարին իր մասնակցութիւնը բերաւ Երէցկին Մանիա Միսիրեան:
Համագումարը ընդգրկեց աղօթքի պահեր, դասախօսութիւններ եւ լիակատար քննարկման նիստեր:
ՆԱՐԵԿ ԵՊԻՍԿՈՊՈՍԻ ՏԵՍԱԿՑՈՒԹԻՒՆԸ ՔԵՆԹԸՐՊԸՐԻԻ ԱՐՔԵՊԻՍԿՈՊՈՍԻՆ ՀԵՏ ԱՆԿԼԻՔԱՆՆԵՐՈՒ
ԵՊԻՍԿՈՊՈՍԱԿԱՆ ԺՈՂՈՎԻ ԸՆԹԱՑՔԻՆ
07/29/2008
Երեքշաբթի, 29 Յուլիս 2008ի երեկոյեան, Անկլիքան Եկեղեցւոյ Ընտանիքի Հոգեւոր Պետ եւ Քենթըրպըրիի Արքեպիսկոպոս Ռօուըն Ուիլիըմզ պաշտօնական ընթրիքով մը պատուեց եպիսկոպոսական ժողովին մասնակցող միջ-եկեղեցական հիւրերը:
Այս առթիւ, Նարեկ Սրբազան անգամ մը եւս Արքեպիսկոպոսին փոխանցեց Ն.Ս.Օ.Տ.Տ. Արամ Ա. Կաթողիկոսի եղբայրական ողջոյնները եւ իր տպաւորութիւնները բաժնեց շուրջ տասը օրերու ընթացքին իր ժողովական մասնակցութեան գծով:
Սրբազանը նաեւ առանձին տեսակցութիւն մը ունեցաւ Վատիկանի միջ-եկեղեցական յարաբերութիւններու բաժանմունքի նախագահ Կարտինալ Ուըլթըր Գասպարի հետ եւ հաղորդեց Վեհափառ Հայրապետին ողջոյնները:
Երկուշաբթի, 28 Յուլիսէն Չորեքշաբթի, 30 Յուլիս, Անկլիքան Եկեղեցւոյ Ընտանիքի եպիսկոպոսական ժողովը իր աշխատանքները շարունակեց Քենթըրպըրիի մէջ: Խմբական քննարկումներու ընթացքին շեշտը դրուեցաւ միջ-կրօնական յարաբերութիւններու եւ աւետարանչութեան վրայ: Իսկ լիակատար նիստերը առաւելաբար յատկացուեցան ժողովին կողմէ հրապարակուելիք յայտարարութեան շուրջ համախոհութիւն ապահովելու միտող առաջարկներուն եւ նկատողութիւններուն:
Նարեկ Սրբազան անդրադարձաւ Միջին Արեւելքի մէջ քրիստոնեայ-իսլամ դարաւոր համակեցութեան եւ այդ շրջագիծէն ներս պարզուող մարտահրաւէրներուն: Հայ Եկեղեցւոյ ներքին աւետարանչութեան եւ առաքելութեան օրինակը նշելով, Սրբազանը կարեւոր նկատեց եկեղեցւոյ կեանքն ու վկայութիւնը ըմբռնել ընտանեկան սրբութեան եւ աւետարանական բարոյական սկզբունքներուն հրամայականէն թելադրուած:
ԱՆԿԼԻՔԱՆՆԵՐՈՒ ԵՊԻՍԿՈՊՈՍԱԿԱՆ ԺՈՂՈՎԻՆ ՄԱՍՆԱԿՑՈՂՆԵՐԸ ԿԸ ՀԻՒՐԸՆԿԱԼՈՒԻՆ
ԱՆԳԼԻՈՅ ԹԱԳՈՒՀԻԻՆ ԿՈՂՄԷ
07/24/2008
Հինգշաբթի, 24 Յուլիս 2008ի երեկոյեան, Լոնտոնի Պաքինկըմ պալատին մէջ, Անկլիքան Եկեղեցւոյ Ընտանիքի եպիսկոպոսական ժողովին մասնակցող աւելի քան 1500 անձեր հիւրընկալուեցան Անգլիոյ Էլիզապէթ թագուհիին կողմէ:
Առաւօտեան, ժողովականներ եւ հիւրեր Լոնտոնի մէջ մասնակցեցան Անկլիքան Եկեղեցւոյ Ընտանիքի Հոգեւոր Պետ եւ Քենթըրպըրիի Արքեպիսկոպոս Ռօուըն Ուիլիըմզի գլխաւորած վկայութեան քայլարշաւին, որուն նպատակն էր աշխարհի քաղաքական ղեկավարներուն ուշադրութիւնը հրաւիրել աղքատութեան յաղթահարման վրայ:
Կէսօրին, անոնք այցելեցին Անկլիքան Եկեղեցւոյ արքեպիսկոպոսարանը՝ Լամպըթ պալատ, ուր հանդիպում մը ունեցան Անգլիոյ վարչապետ Կորտըն Պրաունի հետ եւ Արքեպիսկոպոսին ճաշի հիւրը եղան:
Երկուշաբթիէն Շաբաթ, 21-26 Յուլիս, եպիսկոպոսական ժողովը իր աշխատանքները շարունակեց առաւօտեան եւ երեկոյեան ժամերգութիւններով, աստուածաշնչական սերտողութիւններով, խմբական քննարկումներով եւ լիակատար նիստերով:
Աստուածաշնչական սերտողութիւնները ընդգրկեցին Յովհաննու Աւետարանը: Խմբական քննարկումներու նիւթերն էին՝ եպիսկոպոսը եւ անկլիքան ինքնութիւնը, եպիսկոպոսը որպէս աւետարանի քարոզիչ, եպիսկոպոսը որպէս ընկերային արդարութեան պաշտպան, եպիսկոպոսն ու միջ-եկեղեցական շարժումը եւ եպիսկոպոսն ու բնապահպանութիւնը: Իսկ լիակատար նիստերու թեմաներն էին՝ աւետարանչութիւնը 21րդ դարուն եւ առաքելութիւն, ընկերային արդարութիւն ու աւետարանչութիւն:
Նարեկ Սրբազան թէ՜ գործօն մասնակցութիւն բերաւ ժողովական աշխատանքներուն եւ թէ՜ հանդիպումներ ունեցաւ զանազան Եկեղեցիներ եւ միջ-եկեղեցական կազմակերպութիւններ ներկայացնող հիւրերուն հետ:
Իր պատկանած խմբակի գաղթականներու յատկացուած քննարկման ընթացքին, Սրբազանը անդրադարձաւ Հայկական Ցեղասպանութեան ու Հայ Դատին եւ ընդգծեց արդարութեան հրամայականը հայ ժողովուրդի իրաւունքներու ձեռքբերման համար: Իսկ անդրադառնալով Միջին Արեւելքին, շեշտեց մնայուն խաղաղութեան հաստատումը տարածաշրջանէն ներս՝ քրիստոնէութեան ներկայութեան եւ ազդեցիկ վկայութեան համար:
ՀԱՅ ԵԿԵՂԵՑՒՈՅ ՄԱՍՆԱԿՑՈՒԹԻՒՆԸ ԱՆԿԼԻՔԱՆՆՆԵՐՈՒ ԵՊԻՍԿՈՊՈՍԱԿԱՆ ԺՈՂՈՎԻՆ ԱՆԳԼԻՈՅ ՄԷՋ
07/19/2008
Շաբաթ, 19 Յուլիս 2008, Անգլիոյ Քենթըրպըրի քաղաքին մէջ, բացումը կատարուեցաւ Անկլիքան Եկեղեցւոյ Ընտանիքի տասը տարին անգամ մը գումարուող եպիսկոպոսական ժողովին (Lambeth Conference):
Հայ Եկեղեցին իր հայրապետական երկու Ս. Աթոռներով կը մասնակցի այս ժողովին: Ս. Էջմիածնի Ամենայն Հայոց Կաթողիկոսութիւնը ներկայացուց Գերշ. Տ. Նաթան Եպս. Յովհաննիսեան (Առաջնորդ Անգլիոյ): Մեծի Տանն Կիլիկիոյ Կաթողիկոսութիւնը ներկայացուց Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու):
Յետ միջօրէին, Նարեկ Սրբազան հանդիպում մը ունեցաւ Անկլիքան Եկեղեցւոյ Ընտանիքի Հոգեւոր Պետ եւ Քենթըրպըրիի Արքեպիսկոպոս Ռօուըն Ուիլիըմզի հետ եւ փոխանցեց Ն.Ս.Օ.Տ.Տ. Արամ Ա. Կաթողիկոսի եղբայրական ողջոյնները: Արքեպիսկոպոսը ուրախութեամբ վերյիշեց Սեպտեմբեր 2007ին Անթիլիաս տուած այցելութիւնը եւ սիրով փոխադարձեց Վեհափառ Հայրապետի ողջոյններուն:
Երեկոյեան ժամերգութեան աւարտին, Ռօուըն Արքեպիսկոպոս անկլիքան 650 եպիսկոպոսներուն եւ աւելի քան 1000 հիւրերուն պաշտօնապէս ներկայացուց զանազան Եկեղեցիներէ եկած 75 միջ-եկեղեցական մասնակցողները, որոնք տեղ գրաւեցին բեմին վրայ:
Կիրակի, 20 Յուլիսի առաւօտուն, բոլոր ժողովականները ներկայ գտնուեցան Քենթըրպըրիի մայր տաճարին մէջ մատուցուած սուրբ պատարագին:
Երեկոյեան, Ռօուըն Արքեպիսկոպոս կարդաց իր պատգամը՝ շեշտը դնելով Անկլիքան Եկեղեցւոյ Ընտանիքին դիմագրաւած դժուարութիւններուն եւ մարտահրաւէրներուն վրայ ու կոչ ուղղեց համախմբուելու վերանորոգութեան, փոխադարձ վստահութեան եւ առաքելութեան հրամայականներուն շուրջ:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ՙԿՐՕՆՆԵՐ ԽԱՂԱՂՈՒԹԵԱՆ ՀԱՄԱՐ՚
ՄԻՋԱԶԳԱՅԻՆ ԿԱԶՄԱԿԵՐՊՈՒԹԵԱՆ ԺՈՂՈՎԻՆ
07/15/2008
ՙԿրօններ Խաղաղութեան Համար՚ Միջազգային Կազմակերպութեան Միջին Արեւելքի ու Հիւսիսային Ափրիկէի բաժանմունքին ժողովը գումարուեցաւ Եգիպտոսի մէջ 14-15 Յուլիս 2008-ին: Ն.Ս.Օ.Տ.Տ. Արամ Ա. Վեհափառ Հայրապետը, սոյն Միջազգային Կազմակերպութեան նախագահներէն մին ըլլալով, յատուկ հրաւէր ստացած էր վերոյիշեալ ժողովին մասնակցելու: Սակայն Նորին Սրբութիւնը այս շրջանին բազմազբաղ ըլլալուն պատճառաւ, սոյն ժողովին ներկայ գտնուեցաւ եւ իր գործօն մասնակցութիւնը բերաւ Դոկտ. Ժան Սալմանեան:
Ժողովին մասնակցեցան զանազան երկիրներէ եկած Իսլամ եւ Քրիստոնեայ կրօնական եւ աշխարհական բարձրաստիճան անձնաւորութիւններ, դեսպաններ եւ պետական ներկայացուցիչներ որոնք պատասխանատու դերեր ստանձնած են երկխօսութեան հետ առնչութիւն ունեցող կառոյցներէ ներս: Օրակարգի վրայ դրուած բազմաթիւ քննելի հարցերու շարքին յատուկ շեշտ դրուեցաւ իսլամ եւ քրիստոնեայ կրօնները իրար շաղկապող հասարակական կէտերուն վրայ, զանոնք նկատելով որպէս երաշխիք խաղաղութեան եւ ժողովուրդներու միջեւ եղբայրական յարաբերութեան:
Ներկաները մանրամասնօրէն քննեցին եւ վաւերացուցին սոյն Միջազգային Կազմակերպութեան Միջին Արեւելքի եւ Հիւսիսային Ափրիկէի բաժանմունքին կանոնագրութիւնը, ինչպէս նաեւ յառաջիկային իրագործուելիք ծրագիրները:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ԵԿԵՂԵՑԻՆԵՐՈՒ ՀԱՄԱՇԽԱՐՀԱՅԻՆ ԽՈՐՀՈՒՐԴԻ ԸՆԴՀԱՆՈՒՐ ՔԱՐՏՈՒՂԱՐԻ ՈՐՈՆՄԱՆ ՅԱՆՁՆԱԽՈՒՄԲԻ ԺՈՂՈՎԻՆ
07/11/2008
9-11 Յուլիս 2008, Գերմանիոյ Հոֆկայզմար քաղաքին մէջ, գումարուեցաւ Եկեղեցիներու Համաշխարհային Խորհուրդի Ընդհ. Քարտուղարի Որոնման Յանձնախումբին ժողովը, որուն մասնակցեցաւ անդամ Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու):
Ժողովականներ նախ վերահասու դարձան ԵՀԽ-ի անդամ Եկեղեցիներու եւ զանազան միջ-եկեղեցական կազմակերպութիւններու մտահոգութիւններուն, լսեցին ԵՀԽ-ի նախագահներու պատրաստած արժեւորման զեկոյցն ու Որոնման Յանձնախումբի կարգ մը անդամներուն ԵՀԽ-ի պաշտօնէութեան հետ ունեցած հանդիպումներուն տեղեկագիրը: Ապա, վերախմբագրեցին ԵՀԽ-ի նոր Ընդհ. Քարտուղարի աշխատանքին բնութագիրն ու պաշտօնին դիմումնագիրը եւ պատրաստեցին Սեպտեմբեր 2008ին գումարուելիք ԵՀԽ-ի Գործադիր Վարչութեան ներկայացուելիք տեղեկատուութիւնը:
Յայտնենք, թէ ԵՀԽ-ի նորընտիր Ընդհ. Քարտուղարը իր պաշտօնը պիտի ստանձնէ 1 Յունուար 2010ին:
ՀԱՅ ԵԿԵՂԵՑՒՈՅ ՄԱՍՆԱԿՑՈՒԹԻՒՆԸ ԱՐԵՒԵԼԵԱՆ ՈՒՂՂԱՓԱՌ
ԵԿԵՂԵՑԻՆԵՐՈՒ ԵՒ ԿԱԹՈԼԻԿ ԵԿԵՂԵՑՒՈՅ ԱՍՏՈՒԱԾԱԲԱՆԱԿԱՆ ԵՐԿԽՕՍՈՒԹԵԱՆ ՏԵՂԵԿԱԳՐԻ ԽՄԲԱԳՐՄԱՆ ԵՆԹԱՅԱՆՁՆԱԽՈՒՄԲԻ ԺՈՂՈՎԻՆ
06/26/2008
24-26 Յունիս 2008, Հռոմի մէջ, տեղի ունեցաւ Կաթոլիկ Եկեղեցւոյ եւ Արեւելեան Ուղղափառ Եկեղեցիներու աստուածաբանական պաշտօնական երկխօսութեան յանձնախումբի տեղեկագրի խմբագրման ենթայանձնախումբի ժողովը, որուն մասնակցեցան չորս Արեւելեան Ուղղափառ եւ չորս Կաթոլիկ աստուածաբաններ:
Հայ Եկեղեցին ներկայացուցին Գերշ. Տ. Եզնիկ Արք. Պետրոսեան (Ս. Էջմիածնի Ամենայն Հայոց Կաթողիկոսութիւն - Վարիչ Միջ-եկեղեցական Յարաբերութիւններու) եւ Գերշ. Տ. Նարեկ Եպս. Ալեէմէզեան (Մեծի Տանն Կիլիկիոյ Կաթողիկոսութիւն - Վարիչ Միջ-եկեղեցական Յարաբերութիւններու):
Ենթայանձնախումբը նկատի ունենալէ ետք Յունուար 2008-ին յանձնախումբին կատարած նշումները եւ 2003-2007 թուականներուն քննարկուած նիւթերը, վերախմբագրեց եկեղեցաբանութեան բաժինը ընդգրկող իր տեղեկագիրը, որ պիտի ներկայացուի յանձնախումբի 2009-ի ժողովին:
Ն.Ս.Օ.Տ.Տ. Արամ Ա. Վեհափառ Հայրապետին յանձնարարութեամբ, Նարեկ Սրբազան նաեւ կարեւոր հանդիպումներ ունեցաւ Վատիկանի զանազան բաժանմունքներու պատասխանատուներուն հետ:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ԱՒՍՏՐԻՈՅ ԱՐՏԱՔԻՆ ԳՈՐԾՈՑ ՆԱԽԱՐԱՐՈՒԹԵԱՆ ԿԱԶՄԱԿԵՐՊԱԾ ՄԻՋ-ԿՐՕՆԱԿԱՆ ԺՈՂՈՎԻՆ
06/02/2008
Տոքթ. Ուրսուլա Փլասնիքի հրաւէրով, 20 իսլամ եւ քրիստոնեայ կին աստուածաբաններ, պատմագէտներ, ընկերաբաններ եւ փիլիսոփաներ, եկած Եւրոպայէն, Միջին Արեւելքէն, Արաբական Ծոցի երկիրներէն, հիւսիսային Ափրիկէէն, հանդիպեցան 23-25 Յունիսին Վիեննայի մէջ: Ժողովին նպատակն էր Արտաքին Գործոց նախարարութեան ներկայացնել առաջարկներ, որոնք պիտի նպաստեն կրօնքներու եւ քաղաքակրթութիւններու միջեւ տեղի ունեցող երկխօսութիւններուն: Արտաքին Գործոց նախարարութիւնը այս առաջարկները պիտի ներկայացնէ, յառաջիկայ աշնան իր կազմակերպելիք միջազգային միջ-կրօնական եւ միջ-մշակութային համագումարին, նուիրուած՝ Միջին Արեւելքի եւ Եւրոպայի:
Յանուն Մեծի Տանն Կիլիկիոյ Կաթողիկոսութեան, սոյն ժողովին մասնակցեցաւ Տիկ. Թենի-Փիրի Սիմոնեան, Կաթողիկոսութեան միջ-եկեղեցական յարաբերութեանց յանձնախումբի փոխ-ատենապետուհի, եւ տնօրէնուհի ՙԵւրոպական միջ-կրօնական կիներու ուսուցման Ծրագիր՚ի: Ան մաս կը կազմէր այն ընկերաբաններուն, որոնք իրենց աշխատանքներով կամուրջ կը հանդիսանային Միջին Արեւելքի եւ Եւրոպայի միջեւ:
ՙԵւրոպական միջ-կրօնական կիներու ուսուցման Ծրագիր՚ը (European project for inter-religious learning for women) սկսած էր Եկեղեցիներու Համաշխարհային Խորհուրդին կողմէ, Ն.Ս.Օ.Տ.Տ. Արամ Ա. Կաթողիկոսի Ատենապետութեան շրջանին: Նոյն ծրագրին մասնակիցները 2004 թուին հանդիպում մը ունեցած էին Անթիլիասի Մայրավանքին մէջ, եւ Վեհափառ Հայրապետը իր պատգամը ուղղած էր ժողովին:
Աւստրիոյ մայրաքաղաք Վիեննայի մէջ գումարուած ժողովի աւարտին, Տիկ. Թենի Փիրի Սիմոնեան առանձին հանդիպում մը ունեցաւ նախարարուհիին գրասենեակի պատասխանատու տիկնոջ հետ: Ան տիկինը տեղեակ պահեց Հայկական Ցեղասպանութեան ճանաչման գծով իրենց տարած աշխատանքներուն մասին, եւ փափաք յայտնեց շարունակելու այդ աշխատանքները սոյն ժողովի ծիրէն ներս:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԻՒՆԸ ԿԸ ՄԱՍՆԱԿՑԻ
ԱՆԿԼԻՔԱՆ ԵԿԵՂԵՑՒՈՅ ԿԱԶՄԱԿԵՐՊԱԾ ՀԱՄԱԳՈՒՄԱՐԻՆ
06/02/2008
Յունիս 2, 2008, Քէնթըրպըրիի Արքեպիսկոպոս Րօուըն Ուիլիըմզի նախաձեռնութեամբ, Լոնտոնի մէջ տեղի ունեցաւ տարբեր եկեղեցիներու ներկայացուցիչներու եւ աստուածաբաններու հանդիպում մը: Հանդիպման նպատակն էր նախ ուսումնասիրել շուրջ չորս ամիսներ առաջ, խումբ մը իսլամ կրօնապետներու կողմէ ստորագրուած ու քրիստոնեայ հոգեւոր պետերուն ուղղուած գործակցութեան հրաւէրը, եւ ապա հաւաքական պատասխան մը տալ:
Յանուն Մեծի Տանն Կիլիկիոյ Կաթողիկոսութեան սոյն համագումարին իր մասնակցութիւնը բերաւ Կաթողիկոսարանի միջ-եկեղեցական յանձնախումբի փոխ ատենապետուհի Տիկ. Թենի Փիրի Սիմոնեան: Յիշեալ համագումարէն անկախ, Տիկին Սիմոնեան հանդիպում մը ունեցաւ Արքեպիսկոպոսին հետ, փոխանցելով Ն.Ս.Օ.Տ.Տ. Արամ Ա. Կաթողիկոսի եղբայրական ողջոյնները:
Յայտնենք որ իսլամ կրօնապետներու ստորագրած նոյն նամակէն, իր ժամանակին Վեհափառ Հայրապետը եւս ստացած ըլլալով, համապարփակ պատասխան մը ուղղած էր Յորդանանի մայրաքաղաք Ամմանի մէջ իր կեդրոնը ունեցող իսլամական կազմակերպութեան:
ՀԱՅ ԵԿԵՂԵՑՒՈՅ ՄԱՍՆԱԿՑՈՒԹԻՒՆԸ ԵԿԵՂԵՑԻՆԵՐՈՒ ՀԱՄԱՇԽԱՐՀԱՅԻՆ ԽՈՐՀՈՒՐԴԻ ՄԻՋ-ԵԿԵՂԵՑԱԿԱՆ ՅԱՐԱԲԵՐՈՒԹԻՒՆՆԵՐՈՒ ՊԱՏԱՍԽԱՆԱՏՈՒՆԵՐՈՒ ԺՈՂՈՎԻՆ
05/22/2008
20-22 Մայիս 2008, Եկեղեցիներու Համաշխարհային Խորհուրդի Ժընեւի միջ-եկեղեցական կազմաւորման հաստատութեան մէջ, գումարուեցաւ ԵՀԽ-ի անդամ Եկեղեցիներու միջ-եկեղեցական պատասխանատուներու ժողովը, որուն յանուն Հայ Եկեղեցւոյ մասնակցեցան Գերշ. Տ. Նարեկ Եպս. Ալեէմէզեան (Վարիչ Մեծի Տանն Կիլիկիոյ Կաթողիկոսութեան Միջ-եկեղեցական Յարաբերութիւններու) եւ Հոգշ. Տ. Յովակիմ Վրդ. Մանուկեան (Վարիչի Օգնական Ս. Էջմիածնի Ամենայն Հայոց Կաթողիկոսութեան Միջ-եկեղեցական Յարաբերութիւններու Գրասենեակի):
Ժողովին ներկայ էին Ասիոյ, Ափրիկէի, Եւրոպայի, Լատին Ամերիկայի, Հիւսիսային Ամերիկայի եւ Միջին Արեւելքի զանազան Եկեղեցիներէն 40 հոգեւորական եւ աշխարհական ներկայացուցիչներ:
Քննարկուեցան օրակարգի հետեւեալ կէտերը.- Իւրաքանչիւր Եկեղեցւոյ միջ-եկեղեցական գործունէութեան գլխաւոր երեսները, ԵՀԽ-ի յայտագիրներու տնօրէններու զեկոյցները, ԵՀԽ-ի Երիտասարդական Բաժանմունքի աշխատանքները, միջ-եկեղեցական յարաբերութիւններն ու Եկեղեցիներու վկայութիւնը համաշխարհայնացած ընկերութիւններու մէջ, Եկեղեցիներու միութեան հրամայականը, միջ-կրօնական յարաբերութիւններու կենսականութիւնը, Միջին Արեւելքի իրավիճակը եւ վայրագութեան յաղթահարման անհրաժեշտութիւնը, կենսոլորտային հարցեր, գաղթականութիւնը որպէս միջազգային երեւոյթ եւ քրիստոնէական առաքելութեան ու աւետարանչութեան ըմբռնողութիւնը այսօր:
Նարեկ Սրբազան ներկայացուց Մեծի Տանն Կիլիկիոյ Կաթողիկոսութեան միջ-եկեղեցական եւ միջ-կրօնական գործունէութիւններու բազմաթիւ երեսները ու հանդիպումներ ունեցաւ զանազան Եկեղեցիներու ներկայացուցիչներուն հետ՝ յատկապէս բացատրելով Լիբանանի դիմագրաւած ներկայ ընկերա-քաղաքական մարտահրաւէրները:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ՏՈՀԱՅԻ ԿՐՕՆՆԵՐՈՒ ԵՐԿԽՕՍՈՒԹԵԱՆ 6-ՐԴ ՄԻՋԱԶԳԱՅԻՆ ՀԱՄԱԳՈՒՄԱՐԻՆ
05/15/2008
13-15 Մայիս 2008-ին, Քաթարի մայրաքաղաք Տոհայի մէջ գումարուեցաւ Կրօններու Երխօսութեան 6-րդ միջազգային համագումարը, Քաթարի Էմիրին հովանաւորութեամբ եւ մասնակցութեամբ աւելի քան երկու հարիւր հրաւիրեալներու, որոնք եկած էին երեսուն տարբեր երկիրներէ: Համագումարը կազմակերպուած էր Տոհայի միջ-կրօնական երկխօսութեան կեդրոնին կողմէ:
Սոյն համագումարին նաեւ հրաւիրուած էր նաեւ Մեծի Տանն Կիլիկիոյ Կաթողիկոսութիւնը, զոր ներկայացուց Թեհրանի Հայոց Թեմի առաջնորդ Գերշ. Տ. Սեպուհ Արք. Սարգիսեան: Համագումարին գլխաւոր նիւթն էր՝ ՙԿրօնական արժէքները՝ խաղաղութեան եւ յարգալից կեանքի հեռանկարով՚:
Երկու օրերու վրայ տարածուած աշխատանքով, համագումարին մասնակիցները լսեցին զեկուցումներ, վերոյիշեալ թեմային շուրջ, որոնք ներկայացուեցան հրեայ, քրիստոնեայ եւ իսլամ զեկուցաբերներու կողմէ: Դասախօսութիւններու կարգին, աշխատանքային երեք խմբաւորումներով քննարկուեցան խաղաղութեան, փոխադարձ յարգանքի, վայրագութեան, մարդկային իրաւունքներու հետ առնչուած հարցեր:
Համագումարի աշխատանքներուն իր գործօն մասնակցութիւնը բերաւ Սեպուհ Սրբազան, միաժամանակ ան հանդիպումներ ունեցաւ տարբեր երկիրներէ ժամանած պատուիրակութիւններու ներկայացուցիչներուն հետ, անոնց յայտնելով Մեծի Տանն Կիլիկիոյ Կաթողիկոսութեան դրական դերակատարութիւնը միջ-կրօնական երկխօսութեանց զարգացման ու արդիւնաւորման աշխատանքին մէջ: Սրբազանը նաեւ անդրադարձաւ Կիլիկեան Ս. Աթոռի գահակալ Ն.Ս.Օ.Տ.Տ. Արամ Ա. Կաթողիկոսի, այս գծով ցարդ կատարած նախաձեռնութիւններուն, յատկապէս քրիստոնեայ-իսլամ երկխօսութեան ծիրէն ներս, թէ՜ Լիբանանի մէջ, եւ թէ միջազգային գետնի վրայ:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ԵԿԵՂԵՑԻՆԵՐՈՒ ՀԱՄԱՇԽԱՐՀԱՅԻՆ ԽՈՐՀՈՒՐԴԻ ԵՒ ԵԿԵՂԵՑԱԿԱՆ ԸՆՏԱՆԻՔՆԵՐՈՒ ԺՈՂՈՎԻՆ
05/15/2008
13-15 Մայիս 2008, Եկեղեցիներու Համաշխարհային Խորհուրդի Ժընեւի կեդրոնատեղիին մէջ, Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու) ատենապետեց Եկեղեցիներու Համաշխարհային Խորհուրդի եւ Եկեղեցական Ընտանիքներու Քարտուղարներու Խորհրդակցական Յանձնաժողովի երկրորդ ժողովին: Յանձնաժողովին նպատակն է ԵՀԽ-ի եւ Եկեղեցական Ընտանիքներու միջեւ եղող գործակցութեան առաւել սերտացումը:
Ժողովին մասնակցեցան Ռուս Ուղղափառ, Հռոմէական Կաթոլիկ, Անկլիքան, Լուտերական, Բարեկարգեալ, Մեթոտիսթ եւ Բողոքական այլ Եկեղեցական Ընտանիքներու պաշտօնական ներկայացուցիչներ:
Նարեկ Սրբազան իր բացման խօսքին մէջ ընդգծեց այս ժողովին մասնայատկութիւնը որպէս շրջանային եւ համաշխարհային միջ-եկեղեցական յարաբերութիւններու հանդիպման օղակ ու կարեւորեց համագործակցութեան եւ միացեալ կեցուածքի հրամայականները բոլոր Եկեղեցիները շահագրգռող հարցերուն մէջ:
Ապա, ժողովը քննարկեց օրակարգի հետեւեալ կէտերը.- Միջ-եկեղեցական շարժումը 21րդ դարուն, Միջ-կրօնական յարաբերութիւններ եւ Քրիստոնեայ-Իսլամ երկխօսութիւն, Աստուածաբանական երկխօսութիւններ, 2010ի եւ 2015ի միջ-եկեղեցական համաժողովներ, Եկեղեցիներու Համաշխարհային Խորհուրդի ծրագիրներուն մէջ Եկեղեցական Ընտանիքներու մասնակցութիւն:
Որոշուեցաւ Յանձնաժողովի յաջորդ ժողովը գումարել Յունիս 2009ին, Ժընեւի մէջ:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ
ՆԵՐԿԱՅԱՑՈՒՑԻՉՆԵՐԸ ԳԱՀԻՐԷԻ ՄԷՋ
05/03/2008
Մեծի Տանն Կիլիկիոյ Կաթողիկոսութիւնը ներկայացնող երկու Սրբազան հայրեր՝ Գերշ. Տ. Սեպուհ Արք. Սարգիսեան, առաջնորդ Թեհրանի Հայոց Թեմի, եւ Գերշ. Տ. Նարեկ Եպս. Ալեէմէզեան, վարիչ միջ-եկեղեցական յարաբերութեանց բաժանմունքի, մասնակցեցան Գահիրէի Ղպտի Պատրիարքանին մէջ տեղի ունեցող երեք եկեղեցիները ներկայացնող յանձնախումբի ժողովին:
Ինչպէս ծանօթ է, Ն.Ս.Օ.Տ.Տ. Արամ Ա. Կաթողիկոսի նախաձեռնութեամբ, 12 տարիներ առաջ հիմնուած էր միջ-եկեղեցական գործակցութեան յիշեալ կառոյցը, որ կ’առաջադրէր քով-քովի բերել Միջին Արեւելքի մէջ իրենց կեդրոնը ունեցող Ուղղափառ երեք եկեղեցիները՝ Ղպտի, Ասորի եւ հայ, իրենց