News

ՍՐԲԱՆԿԱՐՉՈՒԹԵԱՆ ԴԱՍԸՆԹԱՑՔ «ԿԻԼԻԿԻԱ» ԹԱՆԳԱՐԱՆԷՆ ՆԵՐՍ

20 September 2014

Բարձր հովանաւորութեամբ Ն.Ս.Օ.Տ.Տ. Արամ Ա. Վեհափառ Հայրապետին, «Կիլիկիա» Թանգարանը իր սրահէն ներս, կազմակերպեց սրբանկարչութեան խտացեալ դասընթացք մը, դասախօս ունենալով՝ Հ. Յովսէփ Վրդ. Աշգարեանը: Հինգ օրերու վրայ տարածուած դասընթացքին մասնակցեցան շուրջ քսանհինգ արուեստասէրներ, որոնց շարքին էին նաեւ Դպրեվանեցիներ եւ միաբան հայրեր:

            Իւրաքանչիւր օր մօտաւոր երկու ժամուան ընթացքին մասնակիցները լսեցին հայ սրբանկարչութեան պատմութեան, աստուածաբանական խորհրդանիշներու եւ սրբանկար պատրաստելու սկզբնական մեթոտներու մասին: Դասախօսութեան կողքին, Հայր Յովսէփը մասնակիցներուն սորվեցուց սրբանկարչութիւն գծելու դիւրին եւ ճիշդ ձեւերը՝ անոնց տալով գծելու վարժութիւններ:

            Երկուշաբթի, 16 Սեպտեմբեր 2014-ին, Վեհափառ Հայրապետը Պիքֆայայի Վեհարանին մէջ ընդունեց Հայր Յովսէփը եւ լսելով դասընթացքին մասին զեկուցումները գնահատեց նախաձեռնութիւնը եւ դասախօս Հայր Սուրբին նուիրական աշխատանքը: Նորին Սրբութիւնը շեշտեց, որ հայ սրբանկարչութիւնը պէտք է զարգանայ մեր մշակոյթի եւ արուեստի կեանքին մէջ, այդ պատճառով նման նախաձեռնութեան մը կրկնութիւնը կարեւոր նկատեց:

            Հանդիպումի ժամանակ, Հայր Յովսէփը Վեհափառ Հայրապետին նուիրեց երկու սրբապատկերներ՝ Ս. Թադէոս եւ Ս. Բարթողիմէոս առաքեալներուն սրբապատկերները: Իսկ Վեհափառ Հայրապետը, «Կիլիկիա» թանգարանի կողմէ պատրաստուած շնորհակալական յուշատախտակ մը յանձնեց Հայր Սուրբին: Ան իր կարգին, շնորհակալութիւն յայտնեց, որ առիթը ստեղծուած է իրեն համար դասաւանդել Կաթողիկոսարանէն ներս:

            Սրբանկարչութեան դասընթացքի վերջին օրը, մասնակիցներուն բաժնուեցան սրբապատկեր գծելու պարտականութիւններ, որպէսզի կարելի ըլլայ պատրաստուելու երկրորդ հանգրուանին, սրբապատկերը ներկելու դասընթացքին, որ շատ հաւանաբար տեղի ունենայ Մեծ Պահոց առաջին շաբաթներուն: