News

ՄԻՋԻՆ ԱՐԵՒԵԼՔԷՆ ՆԵՐՍ ԴԻՄԱԳՐԱՒԱԾ ՄԱՐՏԱՀՐԱՒԷՐՆԵՐԸ ՈՒ ՑԵՂԱՍՊԱՆՈՒԹԵԱՆ ՀԱՐԻՒՐԱՄԵԱԿԸ ԴԱՐՁԱՆ ԱՐԱՄ Ա. ԿԱԹՈՂԻԿՈՍԻ ՄԱՄԼՈՅ ԱՍՈՒԼԻՍԻ ԳԼԽԱՒՈՐ ՆԻՒԹԵՐԸ ՈՒԱՇԻՆԿԹԸՆԻ ՄԷՋ

11 September 2014

Երեքշաբթի, 9 Սեպտեմբեր 2014-ին, Ուաշինկթընի մէջ, Միջին Արեւելքի քրիստոնէութեան նուիրուած միջազգային համագումարը կը շարունակէ իր աշխատանքները, մասնակցութեամբ շուրջ 500 հոգիներու, որոնց կարգին բարձրաստիճան հոգեւորականներ, ծերակուտականներ, երեսփոխաններ, քոնկրէսի անդամներ եւ ոչ-կառավարական կազմակերպութիւններու պատկանող պատասխանատուներ: Ամերիկեան ու միջազգային տեղեկատուական օրկաններ յատուկ ուշադրութեամբ կը հետեւին համագումարի աշխատանքներուն:

 

            Համագումարին առաջին օրը, պաշտօնական մամլոյ ասուլիս մը տեղի ունեցաւ Ուաշինկթընի ազգային տեղեկատուական կեդրոնին մէջ, որուն ներկայ գտնուեցան բազմաթիւ լրատուական աղբիւրներու ներկայացուցիչներ: Սոյն մամլոյ ասուլիսին ներկայ գտնուեցաւ Ն.Ս.Օ.Տ.Տ. Արամ Ա. Կաթողիկոս եւ իր խօսքը ուղղեց, շեշտելով թէ Միջին Արեւելքէն այստեղ չենք եկած Միացեալ Նահանգներու աջակցութիւնը խնդրելու, այլ ամերիկացի ժողովուրդը տեղեակ պահելու մեր մտահոգութիւններուն շուրջ՝ շրջանի մէջ տեղի ունեցող զարգացումներու ամբողջական ու յստակ պատկերը ներկայացնելով: Երկրորդ, մենք հոս չենք եկած, այս կամ այն խմբակցութեան դէմ պայքար կազմակերպելու, այլ միասնաբար մտածելու, թէ ինչպէ՞ս կարելի է ահաբեկչութեան դէմ  պայքարիլ, զայն արմատախիլ ընելով մարդկային կեանքէն: Ահաբեկչութիւնը զանազան անուններով եւ կերպերով, տարբեր տեղեր ինքզինք կ’արտայայտէ, ան մարդկային արժէքները արհամարհող ու նոյնիսկ մարդկային գոյութեան սպառնացող չարիք մըն է, որուն դէմ պէտք է պայքարին բոլոր կրօնները ու բոլոր ազգերը, եւ միասնաբար: Երրորդ, ճիշդ չէ ըսել թէ քրիստոնեաները կը հալածուին, այլ իրականութիւնը այն է, որ խղճի ազատութիւնը ու մարդկային հիմնական իրաւունքներն են, որ այսօր կը բռնաբարուին Միջին Արեւելքէն ներս, եւ այս մտահոգութիւնը միայն քրիստոնեաներուն յատուկ չէ, այլ համամարդկային մտահոգութիւն մըն է, հետեւաբար, միջազգային համայնքը համապատասխան վերաբերում պէտք է ճշդէ: Չորրորդ, ինչ որ այսօր տեղի կ’ունենայ Միջին Արեւելքէն ներս, քրիստոնեայ-իսլամ գոյակցութեան խնդիր չէ: Երկու կրօնները երկար դարեր գոյակցած են ու պէտք է շարունակեն գոյակցիլ: Խումբ մը մարդիկ, այսօր կը փորձեն իսլամութեան ուսուցումները եւ արժէքները եղծել ու շահագործել, ի խնդիր իրենց քաղաքական նպատակներուն: Հետեւաբար մեր սպասումն է, որ Իսլամ քաղաքական ու կրօնական պատասխանատուներ, հրապարակային կեցուածք ճշդեն այս մտահոգիչ կացութեան նկատմամբ:

 

            Յիշեալ պաշտօնական ու հրապարակային մամլոյ ասուլիսէն յետոյ Վեհափառ Հայրապետը հարցազրոյցներ ունեցաւ CNN-ի, Fox News-ի, Catholic News Services-ի, LBC-ի, Noursat-ի եւ այլ ամերիկեան ու միջազգային մամլոյ ներկայացուցիչներուն հետ: Այս հարցազրոյցներուն ընթացքին Նորին Սրբութիւնը անդրադարձաւ հետեւեալ կէտերուն.- Ա.) Քրիստոնէութիւնը կը պատկանի Միջին Արեւելքին. ան կառչած կը մնայ իր արմատներուն հակառակ իր դիմագրաւած դժուարութիւններուն: Բ.) Միաստուածեան երեք կրօններու միջեւ համագործակցութիւնը հրամայական է՝ նկատի ունենալով կրօնի առանցքային տեղը ընկերութեան կեանքէն ներս: Գ.) Միջազգային համայնքը լուր մնաց Հայոց Ցեղասպանութեան ընթացքին, այսօր ան պէտք չէ անցեալի սխալները կրկնէ, անտարբեր մնալով մարդկութեան դէմ գործուած ոճիրներուն նկատմամբ: