News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ՄՕՏԷՆ ԿԸ ՀԵՏԵՒԻ ՍՈՒՐԻՈՅ ՀԱՅՈՒԹԵԱՆ ՎԵՐԱԿԱՆԳՆՈՒՄԻ ԱՇԽԱՏԱՆՔՆԵՐՈՒՆ

23 July 2014

Քանի մը օրեր առաջ Անթիլիասի Մայրավանք այցելեց Բերիոյ Հայոց Թեմի առաջնորդ Գերշ. Տ. Շահան Արք. Սարգիսեան: Առաջնորդ Սրբազանը մանրամասնօրէն զեկուցեց Վեհափառ Հայրապետին ընդհանրապէս Սուրիոյ ու յատկապէս Հալէպի, Դամասկոսի, Ճէզիրէի, Լաթաքիոյ ու Քէսապի մէջ կայք հաստատած հայորդիներուն դիմագրաւած դժուարութիւններուն ու մտահոգութիւններուն մասին: Ան նաեւ տեղեակ պահեց Նորին Սրբութիւնը հոգեւոր ու համայնքային պատասխանատուներուն եւ Սուրիոյ Շտապ Օգնութեան եւ Վերականգնումի Մարմինին կողմէ կատարուած աշխատանքներուն մասին:

Վեհափառ Հայրապետը բարձրօրէն գնահատեց պատասխանատու մարմիններուն կատարած աշխատանքները, մեր ժողովուրդին իրաւունքներուն տէր կանգնելու եւ անոր կարիքներուն օգտակար ըլլալու իրենց նուիրեալ ծառայութիւնը:

Յայտնենք, որ առաջնորդ Սրբազանը այսօր, Չորեքշաբթի, 23 Յուլիս 2014-ին, Մայրավանքէն մեկնեցաւ Թարթուս, քահանայ հայրերու ու ազգային իշխանութեան ներկայացուցիչներու ընկերակցութեամբ, յաջորդաբար այցելելու Լաթաքիա, Քէսապ եւ այլ շրջաններ: Յառաջիկայ Կիրակի, 27 Յուլիս 2014-ին, Շահան Սրբազան պիտի կատարէ Գարատուրանի (Քէսապ) Ս. Աստուածածին եկեղեցւոյ խորանին վերաօծումը, ուր Վարդավառի տօնին առթիւ Ս. եւ անմահ Պատարագ պիտի մատուցուի:

Իր կատարած այցելութիւններուն ընթացքին, Սրբազան Հայրը հաւատացեալ մեր ժողովուրդին պիտի փոխանցէ, Ն.Ս.Օ.Տ.Տ. Արամ Ա. Վեհափառ Հայրապետին օրհնութիւններն ու անվերապահ զօրակցութիւնը: Առաջնորդ Սրբազանը մօտէն տեղեակ պիտի դառնայ տեղափոխուած մեր ժողովուրդի զաւակներուն դժուարութիւններուն ու կարիքներուն, որպէսզի համապատասխան անհրաժեշտ միջոցներն ու օժանդակութիւնները տնօրինուին: