News

«ՀԱԿԱՌԱԿ ԱՌԿԱՅ ՏԱԳՆԱՊԻՆ ՈՒ ԱՆՈՐ ՊԱՏՃԱՌԱԾ ՎՆԱՍՆԵՐՈՒՆ, ՍՈՒՐԻԱՀԱՅՈՒԹԻՒՆԸ ԱՄՐՕՐԷՆ ԿԱՌՉԱԾ ԿԸ ՄՆԱՅ ԻՐ ԱՐՄԱՏՆԵՐՈՒՆ ՈՒ ԱԶԳԱՅԻՆ ԱՐԺԷՔՆԵՐՈՒՆ» Ն.Ս.Օ.Տ.Տ. Արամ Ա. Կաթողիկոս

21 July 2014

Կիրակի, 20 Յուլիս 2014-ին, Ս. եւ անմահ Պատարագէն ետք, Ն.Ս.Օ.Տ.Տ. Արամ Ա. Կաթողիկոս, Վեհարանի դահլիճին մէջ, «Ս. Մեսրոպ Մաշտոց»ի շքանշանին արժանացուց սուրիահայ գաղութի մշակութային ու ազգային կեանքին մէջ ներդրում ունեցող ազգայիններէն Օրդ. Հուրի Ազէզեանը (Հալէպ) եւ Տիար Յակոբ Ադամեանը (Լաթաքիա): Հանդիսութեան ներկայ էին մտաւորականներ, կրթական-մշակութային միութիւններու ներկայացուցիչներ եւ մեծարեալներուն մօտիկ ազգայիններ: Բերիոյ Հայոց Թեմի առաջնորդ Գերշ. Տ. Շահան Արք. Սարգիսեան ներկայացուց պարգեւատրեալ Օրդ. Հուրի Ազէզեանի մտաւորական, ազգային եւ կրթական վաստակը. իսկ Տիար Ժիրայր Դանիէլեան խօսեցաւ պարգեւատրեալ Տիար Յակոբ Ադամեանի գրական ու մշակութային ներդրումին մասին:

Վեհափառ Հայրապետը, անդրադառնալով սուրիական տագնապին պատճառով սուրիահայ գաղութի դիմագրաւած դժուարութիւններուն՝ ըսաւ. «Սուրիոյ մեր գաղութը Օսմանեան պետութեան կողմէ ծրագրուած ու գործադրուած Հայոց Ցեղասպանութեան արհաւիրքը տեսաւ ու գոյատեւեց: Հայոց Ցեղասպանութենէն ետք, մեր ժողովուրդի զաւակները վերակազմակերպեցին ու ծաղկեցուցին իրենց եկեղեցական ու համայնքային կեանքը՝ դառնալով սուրիական ընկերութեան անբաժան մէկ մասը: Իրենց արաբ եղբայրներուն կողքին, անոնք կարեւոր ներդրում ունեցան ու կը շարունակեն ունենալ Սուրիոյ վերելքին մէջ: Այսօր, քաջատեղեակ ենք սուրիական հայրենիքէն ներս տիրող իրավիճակին: Սակայն, հակառակ առկայ տագնապին ու անոր պատճառած վնասներուն, սուրիահայութիւնը ամրօրէն կառչած կը մնայ իր արմատներուն ու ազգային արժէքներուն»:

Ապա, Վեհափառ Հայրապետը իր գնահատանքը յայտնեց Սուրիոյ հայութեան հոգեւոր ու համայնքային ղեկավարութիւններուն, բարեսիրական միութեանց եւ Հայաստանի ու Սփիւռքի այն բոլոր գաղութներուն, հոգեւոր, պետական ու համայնքային պատասխանատուներուն եւ ազգայիններուն, որոնք կը շարունակեն զօրավիգ կանգնիլ Սուրիոյ հայութեան: Ապա, Նորին Սրբութիւնը շեշտեց. «Սուրիոյ հայութեան վերականգնումը հրամայական անհրաժեշտութիւն է. եւ սա համազգային խնդիր է, ինչպէս յաճախ յիշեցուցած ենք: Արդ, Մեր սպասումն է, որ այս յանձնառութեամբ մեր ժողովուրդի զաւակները գործնապէս մասնակից դառնան Սուրիոյ հայութեան վերականգնումի աշխատանքին»:

Իր խօսքի աւարտին, Վեհափառ Հայրապետը գնահատեց Օրդ. Հուրի Ազէզեանը եւ Տիար Յակոբ Ադամեանը, Սուրիոյ հայութեան ազգային-եկեղեցական ու մշակութային կեանքին իրենց բերած նպաստին համար եւ «Ս. Մեսրոպ Մաշտոց»ի շքանշանով պարգեւատրեց զիրենք: Ապա, պարգեւատրեալները յաջորդաբար իրենց սրտի երախտագիտութեան խօսքերը արտայայտեցին Նորին Սրբութեան: