News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԽՈՐՀՐԴԱԿՑՈՒԹԻՒՆՆԵՐ Կ՛ՈՒՆԵՆԱՅ ՀՈԳԵՒՈՐ ՊԵՏԵՐՈՒ ՀԵՏ, ԺԸՆԵՒ 2 ԺՈՂՈՎԻ ՆԱԽՕՐԵԱԿԻՆ

11 January 2014

Անցնող մի քանի օրերու ընթացքին Վեհափառ Հայրապետը յաջորդաբար հանդիպումներ ու հեռաձայնային խօսակցութիւններ ունեցաւ Լիբանանի ու Սուրիոյ կացութեան հետ աղերս ունեցող հարցերու ու քրիստոնեայ համայնքներուն դիմագրաւած մտահոգութիւններուն շուրջ, Ժընեւ 2 համագումարի լոյսին տակ:

 

ՀԱՆԴԻՊՈՒՄ ԶԱՔՔԱ ՊԱՏՐԻԱՐՔԻՆ ՀԵՏ

Հինգշաբթի գիշեր Վեհափառ Հայրապետը այցելեց Ասորի եկեղեցւոյ հոգեւոր պետ Զաքքա Պատրիարքին, Դրան Եպսիկոսոպոս Նարեկ Արքեպիսկոպոսի ընկերակցութեամբ: Պատրիարքին հետ Վեհափառ Հայրապետին ունեցած խօսակցութիւնները առաւելաբար կեդրոնացան Սուրիոյ կացութեան ու մանաւանդ քրիստոնեայ համայնքներու դիմագրաւած դժուարութիւններուն: Հանդիպման ընթացքին նաեւ արծարծուեցան Լիբանանի ներքին կացութեան հետ կապ ունեցող հարցեր:

 

ՀԵՌԱՁԱՅՆԱՅԻՆ ԽՕՍԱԿՑՈՒԹԻՒՆ ԵԱԶԸՃԻ ՊԱՏՐԻԱՐՔԻՆ ՀԵՏ

Անցնող շաբթուան ընթացքին Վեհափառ Հայրապետին եւ Յոյն Օրթոտոքս եկեղեցւոյ Պատրիարքին միջեւ երկու առիթներով հեռաձայնային խօսակցութիւն տեղի ունեցաւ: Եազըճի Պատրիարքին նստավայրը կը գտնուի Դամասկոսի մէջ: Երկու հոգեւոր պետերու խորհրդակցութիւններու լուսարձակը Սուրիոյ ներքին կացութիւնն էր ու յատկապէս՝ քրիստոնէական միութիւնը ամրապնդելու ու քրիստոնեայ–իսլամ համակեցութիւնը աւելի խորացնելու կարելիութիւններու քննարկումը, Սուրիոյ պատմութեան ներկայ դժուար հանգրուանին:

 

ՀԱՆԴԻՊՈՒՄ ՌԱՅԻ ՊԱՏՐԻԱՐՔԻՆ ՀԵՏ

Ուրբաթ գիշեր Մարոնի եկեղեցւոյ հոգեւոր պետ Ռայի Պատրիարքը հրաւիրեց Վեհափառ Հայրապետը ներկայ գտնուելու կարճ այցելութեամբ Լիբանան գտնուող Սանտրի Կարտինալին ի պատիւ տրուած ճաշկերոյթին: Յիշեալ ճաշկերոյթին ներկայ եղան կաթոլիկ պատրիարքներն ու եպիսկոպոսները: Սանտրի կարտինալը, որ նախագահն է Արեւելեան Կաթոլիկ Եկեղեցիներու Բաժանմունքին Վատիկանի մէջ, իր խօսքին մէջ դրուատիքով անդրադարձաւ Վեհափառ Հայրապետին ու Մեծի Տանն Կիլիկիոյ Կաթողիկոսութեան ունեցած սերտ յարաբերութեան Վատիկանի հետ: 

Ընթրիքէն յետոյ Վեհափառ Հայրապետը ու Ռայի Պատրիարքը առանձին հանդիպում մը ունեցան: Պատրիարքը տեղեակ պահեց Վեհափառ Հայրապետը նոյն օրը Հըզպալայի ներկայացուցչներուն հետ իր ունեցած հանդիպման արդիւնքներուն, ինչպէս նաեւ վերջին օրերուն կառավարութեան կազմութեան գծով Պքերքէի տարած աշխատանքներու մասին: Վեհափառ Հայրապետը իր կարգին Պատրիարքին հետ բաժնեց այն մտահոգութիւններն ու սպասումները, որոնք փոխանցուած էին իրեն վերջին օրերուն Անթիլիասի Մայրավանքը այցելած քաղաքական ու համայնքային պատասխանատուներուն կողմէ: Հանդիպման ընթացքին նաեւ ակնարկութիւններ կատարուեցան կառավարութեան կազմութեան, յառաջիկայ նախագահական ընտրութեան եւ Ժընեւ 2 ժողովի մասին:

Երեք պատրիարքներն ալ Վեհափառ Հայրապետին յայտնեցին որ Միջին Արեւելքէն ներս քրիստոնեայ համայնքներուն դիմագրաւած ներկայ կացութեան լոյսին տակ անհրաժեշտ է որ մնայուն խորհրդակցութիւն տեղի ունենայ հոգեւոր պետերու միջեւ: