News

“Անհրաժեշտ է Լիբանան հաստատուած սուրիահայ ընտանիքներու կարիքներուն յատուկ ուշադրութիւն ընծայել՝՝ Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ

19 December 2013

Հինգշաբթի 19 Դեկտեմբեր 2013 առաւօտ, Վեհափառ Հայրապետը իր գրասենեակին մէջ ընդունեց Գարակէօզեան Հիմնարկութեան տնօրէն՝ Տիար Սերոբ Օհանեանը:  Տնօրէնը լայն տեղեկութիւններ տուաւ Վեհափառ Հայրապետին Հիմնարկութեան ներկայ գործունէութեան մասին, յատկապէս շեշտելով սուրիահայ ընտանիքներու գծով կատարուած ծառայութիւնը:

Տնօրէնին տուած տեղեկութիւններուն համաձայն, Լիբանան հաստատուած 1350 սուրիահայ ընտանիքներ արձանագրուած են իրենց մօտ եւ Գարակէօզեան Հիմարկութիւնը կը փորձէ զանազան ձեւերով օգտակար հանդիսանալ անոնց: Նորին Սրբութիւնը լսելէ ետք տրուած զեկոյցը, իր գնահատանքը յայտնեց Գարակէօզեան Հիմնարկութեան ու նաեւ այն բոլոր բարեսիրական կառոյցներուն, որոնք իրենց կարելին կը կատարեն օժանդակելու սուրիահայ մեր զաւակներուն: «Սուրիոյ մեր եղբայրներուն ու քոյրերուն օժանդակութիւնը պէտք է մեր ազգին համար դառնայ առաջնահերթութիւն՝ ո՛չ միայն Լիբանանի, այլ նաեւ մեր բոլոր գաղութներուն մէջ: Վերջին երկու տարիներու ընթացքին հսկայ դժուարութիւններու դիմաց կը գտնուի սուրիահայութիւնը. հետեւաբար, վերանորոգ թափով պէտք է շարունակել մեր օժանդակութիւնը սուրիահայութեան վերականգնումի աշխատանքներուն» շեշտեց Վեհափառ Հայրապետը: