News

Իրանի դեսպանը Ն.Ս.Օ.Տ.Տ. Արամ Ա. Կաթողիկոսին կը պարզէ իր երկրին կեցուածքը Սուրիոյ գծով

05 September 2013

Այս առաւօտ Ն.Ս.Օ.Տ.Տ. Արամ Ա. Կաթողիկոս Պիքֆայայի վանքին մէջ ընդունեց այցելութիւնը Լիբանանի մօտ Իրանի դեսպան Ղատանֆար Ապատիին: Դեսպանին կ’ընկերանար դեսպանատան քաղաքական բաժանմունքի պատասխանատուն: Այցելութեան նպատակն էր Վեհափառ Հայրապետին պարզել ընդհանրապէս Սուրիոյ տագնապին եւ յատկապէս վերջին օրերուն արագ զարգացում ստացած ամերիկեան զոնուորական միջամտութեան գծով Իրանի տեսակէտը:

 

Շուրջ ժամ մը տեւող հանդիպման ընթացքին դեսպանը ընդհանուր ակնարկ մը նետեց Իրանի որդեգրած կեցուածքի զանազան փուլերուն ու ծալքերուն: Ան ըսաւ, որ օրին Սուրիոյ հարցին քաղաքական լուծում տալու իրենց յանձնառութիւնը փոխանցած էին արեւմտեան երկիրներուն: Ան նաեւ յայտնեց, որ զինուորական միջամտութիւն Սուրիայէն ներս ամբողջ Միջին Արեւելքը կրնայ վտանգաւոր ու աննախատեսելի կացութիւններու դիմաց դնել: Ապա դեսպանը խնդրեց Վեհափառ Հայրապետէն որ արեւմտեան եկեղեցիներուն հետ իր ունեցած կապերուն ճամբով շեշտէ շրջանը զինուորական բախումներէ հեռու պահելու անհրաժեշտութիւնը:

           

Վեհափառ Հայրապետը եւս իր կարգին ընդգծեց Սուրիոյ ներքին տագնապին քաղաքական լուծում տալու հրամայականը՝ մասնակցութեամբ բոլոր կողմերուն, ինչպէս նաեւ քրիստոնեայ համայնքներուն: Այս առիթով Վեահափառը նաեւ իր խոր մտահոգութիւնը յայտնեց յատկապէս Հալէպի գծով: Ան ըսաւ, որ փաստօրէն քրիստոնեայ համայնքները հակադիր կողմերու միջեւ կը գտնուին, քաղաքը պաշարուած է եւ ժողովուրդը իրենց առօրեայ կարիքներուն կապուած լուրջ դժուարութիւններու դիմաց են: Հետեւաբար, անհրաժեշտ է առաջնահերթ կարեւորութիւն ընծայել Հալէպին, բախումներէ հեռու պահելով ժողովուրդը, շեշտեց Վեհափառ Հայրապետը: