News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԸՆԴՈՒՆԵՑ Հ.Յ.Դ. ԲԻՒՐՈՅԻ ԵՒ ԿԵԴՐՈՆԱԿԱՆ ԿՈՄԻՏԷԻ ՆԵՐԿԱՅԱՑՈՒՑԻՉՆԵՐԸ ԵՒ ԼԻԲԱՆԱՆԻ ԿԱՌԱՎԱՐՈՒԹԵԱՆ ՀԱՅ ՆԱԽԱՐԱՐՈՒՀԻՆ

18 June 2020

Հինգշաբթի, 18 Յունիս 2020-ին, Ն.Ս.Օ.Տ.Տ. Արամ Ա. Վեհափառ Հայրապետը Պիքֆայայի Սուրբ Աստուածածին Վանքի Վեհարանին մէջ հանդիպում մը ունեցաւ Հայ Յեղափոխական Դաշնակցութեան Բիւրոյի անդամ Յակոբ Խաչերեանին եւ Լիբանանի Կեդրոնական Կոմիտէի ներկայացուցիչ երեսփոխան Յակոբ Բագրատունիին հետ:

Հանդիպման ընթացքին քննարկուեցան ընդհանրապէս Հայաստանի կացութեան, Հայաստան-Սփիւռք յարաբերութեան եւ մասնաւորաբար Լիբանանի հայութեան առնչուած հարցեր:

Այսօր Վեհափառ Հայրապետին նաեւ այցելեց Լիբանանի կառավարութեան նախարարուհի Վարդինէ Օհանեան-Գէորգեան: Նախարարուհին զեկոյց մը տուաւ Հայրապետին կառավարութեան աշխատանքներու ծրագիրներուն շուրջ: Նորին Սրբութիւնը իր գնահատանքը յայտնեց նախարարուհիին, որ իր գործօն մասնակցութիւնը կը բերէ կառավարութեան աշխատանքներուն եւ անհրաժեշտութեան պարագային կը պաշտպանէ Լիբանանի հայութեան իրաւունքները: