News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԸՆԴՈՒՆԵՑ ՓԱՂԱՆԳԱՒՈՐ ԿՈՒՍԱԿՑՈՒԹԵԱՆ ԸՆԴՀԱՆՈՒՐ ՔԱՐՏՈՒՂԱՐԸ

24 January 2019

Հինգշաբթի, 24 Յունուար 2019-ի առաւօտեան, Ն.Ս.Օ.Տ.Տ. Արամ Ա. Վեհափառ Հայրապետը իր գրասենեակին մէջ ընդունեց Փաղանգաւոր կուսակցութեան ընդհանուր քարտուղար Նազար Նաճարեանը։ Այցելութեան նպատակն էր Վեհափառ Հայրապետին տեսակէտը ունենալ Փաղանգաւոր կուսակցութեան եւ Հայ Յեղափոխական Դաշնակցութեան միացեալ ճիգերով Լիբանանի Խորհրդարանին ներկայացնելիք Ապրիլ 24-ին առնչուած բանաձեւի մը շուրջ։ Յիշեալ բանաձեւին նպատակն է Ապրիլ 24-ը հռչակել Հայոց Ցեղասպանութեան եւ քրիստոնեայ փոքրամասնութիւններու դէմ Օսմանեան թուրք կայսրութեան կողմէ կատարուած ջարդերու յիշատակին ազգային օր։

 

Նորին Սրբութիւնը գնահատելով ողջունեց յիշեալ լախաձեռնութիւնը եւ առաջարկուելիք բանաձեւին գծով կարգ մը թելադրութիւններ կատարեց։ Հանդիպումը նաեւ առիթ հանդիսացաւ անդրադարձ կատարելու Լիբանանի ներկայ կացութեան։