Ուրբաթ 15 Փետրուար 2013, երեկոյեան ժամը 6:30-ին, Մեծի Տանն Կիլիկիոյ Կաթողիկոսութեան Դպրեվանքի սաները, Լիբանանի Հայոց Թեմի Առաջնորդ` Գերշ. Տ. Գեղամ Արք. Խաչերեանի հրաւէրով, այցելեցին Պուրճ Համմուտի Ս. Քառասնից Մանկանց Եկեղեցին, ուր Մեծ Պահքի հսկումի ժամերգութիւն կատարեցին:
Բրշ. Սեբաստիա Աւ. Սրկ. Ղարախանեան քարոզեց բնաբան ունենալով շարականին հետեւեալ բառերը. ՙՇնորհէ՜ մեզի, Տէ¯ր, այս գիշեր երկնային խաղաղութիւնդ եւ սուրբ խաչիդ ամենայաղթ զօրութեամբ՝ հեռու պահէ թշնամիին պատրանքներէն՚:
Ժամերգութենէն ետք, եկեղեցւոյ սրահին մէջ, դպրեվանեցիներ եկեղեցւոյ հոգեւոր հովիւներուն, թաղականութեան եւ տիկնանց միութեան հետ սիրոյ սեղանի շուրջ հաւաքուեցան ու երգերով եւ արտասանութիւններով ճոխացուցին երեկոն:
