News

Ն.Ս.Օ.Տ.Տ. Արամ Ա. Կաթողիկոս Հանրապետութեան Միւֆթիին կը շեշտէ միասնականութեան ամրապնդման հրամայականը

23 March 2013

Շաբաթ 23 Մարտ 2013-ի առաւօտուն, Ն.Ս.Օ.Տ.Տ. Արամ Ա. Վեհափառ Հայրապետը ներկայացնող պատուիրակութիւն մը բաղկացած՝ Հոգշ. Տ. Մասիս Ծ. Վրդ. Չօպուեանէ եւ Դոկտ. ժան Սալմանեանէ, այցելեցին Լիբանանի Հանրապետութեան Միւֆթի Քապպանիի: Հանդիպման ընթացքին Միւֆթին պատուիրակութեան պարզեց մանրամասնութիւնները Տար էլ Ֆաթուայի առնչուած վերջին իրադարձութիւններուն ու յատկապէս երկու շէյխերուն դէմ կատարուած յարձակումներուն: Պատուիրակութիւնը նախ փոխանցելով Վեհափառ Հայրապետին մտահոգութիւնը դատապարտեց կրօնականներուն դէմ եղած նման արարքները, շեշտեց կրօնական կեդրոններու, արժէքներու ու անձներու նկատմամբ յարգանք ցուցաբերելու հրամայականը, ինչպէս նաեւ ներքին միասնականութեան ամրապնդման ճամբով հեռու մնալու համայնքային թէ քաղաքական զգայնութիւններ յառաջացնող փորձերէ: