Մեծի Տանն Կիլիկիոյ Կաթողիկոսութեան միաբանութիւնը, ինչպէս Ն.Ս.Օ.Տ.Տ. Արամ Ա. Կաթողիկոս յաճախ կը շեշտէ, ինքզինք կ՚իրագործէ գերազանցօրէն որպէս ծառայութիւն հայ եկեղեցւոյ ու ժողովուրդին։ Այս գիտակցութենէն մղուած Դպրեվանքը կը գործէ եւ միաբան հայրեր հաւատարիմ իրենց կոչումին կը ծառայեն Անթիլիասի Մայրավանքէն ներս ու թեմերուն մէջ։
Վերջին շրջանին միաբանութեան ծառայական դաշտէն ներս հետեւեալ նշանակումները կատարուեցան Վեհափառ Հայրապետին կողմէ.-
— Հոգշ. Տ. Հրանդ Վրդ. Թահանեան։ Վանգուվըրի աստուածաբանական համալսարանին մէջ ուսումը աւարտելով՝ ստացաւ մագիստրոսի (MATS) վկայական եւ վերադարձաւ Մայրավանք։ Նորին Սրբութիւնը զինք նշանակեց Կաթողիկոսարանի միջ-եկեղեցական յարաբերութեանց վարիչ։ Հայր Սուրբը միաժամանակ պիտի դասաւանդէ Դպրեվանքէն ներս։
— Հոգշ. Տ. Յովհաննէս Վրդ. Սաղտըճեան։ Գանատայի հայոց թեմէն ներս իր հովուական ծառայութեան աւարտին, հայր սուրբը վերադարձաւ Անթիլիասի Մայրավանք։ Ընդառաջելով Յունաստանի հայոց թեմի առաջնորդ՝ Գերշ. Տ. Գեղամ Արք. Խաչերեանի խնդրանքին, Վեհափառ Հայրապետը հայր սուրբին նշանակեց հիւսիսային Յունաստանի հոգեւոր հովիւ։
— Հոգշ. Տ. Զարեհ Վրդ. Սարգիսեան։ Իր համալսարանական ուսումը աւարտելէ ետք հայր սուրբը վերադարձաւ Մայրավանք։ Ան նախ Զուիցերիոյ էքիւմէնիք (ecumenic) հաստատութեան մէջ հետեւեցաւ միջ-եկեղեցական ու աստուածաբանական դասընթացքներու եւ ապա Ամերիկայի Միացեալ Նահանգներու Holy Cross Դպրեվանքին մէջ՝ ստանալով մագիստրոսի աստիճան։ Նորին Սրբութիւնը հայր սուրբը նշանակեց Կաթողիկոսարանի Երիտասարդական Բաժանմունքի վարիչ, միաժամանակ պիտի դասաւանդէ Դպրեվանքէն ներս եւ իր մասնակցութիւնը բերէ միջ-եկեղեցական ժողովներուն։
— Հոգշ. Տ. Պսակ Աբղ. Թէփիրճեան։ Ծառայելէ ետք որպէս պատասխանատու հայոց ցեղասպանութեան որբերու «Արամ Պէզիքեան» թանգարանին, Վեհափառ Հայրապետին տնօրինումով հայր սուրբը մեկնեցաւ Հռոմ՝ աստուածաբանական ուսումը շարունակելու համար։
