19 Փետրվարի, 2017

ՀՈԳԵՀԱՆԳԻՍՏ ԵՐՋԱՆԿԱՅԻՇԱՏԱԿ ՀԱՅՐԱՊԵՏՆԵՐՈՒ ԵՒ ԼՈՒՍԱՀՈԳԻ ՄԻԱԲԱՆ ՀԱՅՐԵՐՈՒ ՀԱՄԱՐ

Մեծի Տանն Կիլիկիոյ Կաթողիկոսութիւնը, իր դարաւոր պատմութեան ընթացքին ունեցաւ բազմաթիւ անձնուէր հայրապետներ եւ անձնուրաց հոգեւորականներ, որոնք թէ՛ եկեղեցական, թէ՛ մշակութային եւ թէ՛ ազգային գանձանակին մէջ ձգեցին իրենց լուման՝ ի խնդիր Հայ ժողովուրդի բարգաւաճման ու ծաղկման: Այսօր նոյն այդ ծառայութեան առաքելութիւնն է որ կը շարունակէ Մեծի Տանն Կիլիկիոյ Կաթողիկսութիւնը՝ յաղթական հոգեւորականներուն պէս որպէս յաջորդ պատրաստելով Աստուծոյ, եկեղեցւոյ, հայ ժողովուրդին ու մեր հայրենիքին ծառայութեան լծուած սպասաւորներ:

 

Երջանկայիշատակ հայրապետներու եւ լուսահոգի Միաբաններու տարած անսակարկ ծառայութեան առ յերախտագիտութիւն, Մեծի Տանն Կիլիկիոյ Կաթողիկոսութիւնը աւանդութիւն դարձուցած է ամէն տարի Փետրուար ամսուն կատարել Հոգեհանգստեան յատուկ պաշտօն՝ Անթիլիասի Մայրավանքին եւ աթոռոյս բոլոր թեմերու եկեղեցիներէն ներս:

 

Արդարեւ, Կիրակի, 19 Փետրուար 2017-ի առաւօտուն, կատարուեցաւ «Հանդիսաւոր հոգեհանգիստ վասն հոգւոցն հանգուցեալ հայրապետացն սրբոյ Աթոռոյս եւ համայն միաբանից Ուխտին Մեծի Տանն Կիլիկիոյ Կաթողիկոսութեան»: Անթիլիասի Ս. Գրիգոր Լուսաւորիչ Մայր Տաճարին կից գտնուող «Զարեհեան Յուշարձան-Դամբարան»ին մէջ, Ն.Ս.Օ.Տ.Տ. Արամ Ա. Վեհափառ Հայրապետը նախագահեց հոգեհանգստեան արարողութեան:

 

Հաւաքական սոյն հոգեհանգիստը առիթ հանդիսացաւ նախնիներու անձնուէր օրինակին հետեւելով շարունակելու Մեծի Տանն Կիլիկիոյ կաթողիկոսութեան անսակարկ ծառայական առաքելութիւնը, ի սպաս հայ եկեղեցւոյ ու հայ ազգին:

More News