Հանդիպումը առիթ մը հանդիսացաւ, առաջին հերթին, անդրադառնալու քրիստոնէական աշխարհը յուզող ընդհանրական հարցերու ու մարտահրաւէրներու շուրջ։ Ապա Վեհափառ Հայրապետը ներկաներուն պարզեց Միջին Արեւելքի քրիստոնէութեան ներկայ իրավիճակը՝ լուսարձակի տակ բերելով յատկապէս քրիստոնեայ եկեղեցիներու միջեւ ներքին գործակցութիւնը ամրացնելու, Արեւմտեան եկեղեցիներուն հետ յարաբերութիւնները աւելի սերտացնելու եւ քրիստոնէական վկայութեան նոր թափ տալու անհրաժեշտութիւնը։ Այս ծիրէն ներս Նորին Սրբութիւնը նաեւ շեշտեց Աւստրալիոյ եւ Միջին Արեւելքի եկեղեցական խորհուրդներու միջեւ փոխադարձ այցելութիւններու ճամբով գործակցութիւնը ծաւալելու հրամայականը։