News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ Կ’ԱՅՑԵԼԷ ԱԶՈՒՆԻԷԻ ԱԶԳԱՅԻՆ ԲՈՒԺԱՐԱՆ

30 December 2016
 
 
Ն.Ս.Օ.Տ.Տ. Արամ Ա. Կաթողիկոս, Նոր Տարուան եւ Ս. Ծննդեան բարեբեր տօներուն նախօրեակին իր կատարած կատարած այցելութիւններու ծիրէն ներս, Ուրբաթ, 30 Դեկտեմբեր 2016-ի առաւօտուն, ընկերակցութեամբ խումբ մը Միաբան Հայրերու, այցելեց Ազունիէի Ազգային Բուժարան:
Վեհափառ Հայրապետը դիմաւորուելէ ետք Ազգային Բուժարանի խնամակալութեան, տնօրէնութեան եւ պատասխանատու բժիշկներուն կողմէ, անոնց հետ կարճ հանդիպում մը ունեցաւ: Նորին Սրբութիւնը բարձր գնահատեց անոնց տարած ընկերային ու մարդասիրական ծառայութիւնները եւ քաջալերեց զանոնք, որ նոյն նուիրումով շարունակեն իրենց վստահուած առաքելութիւնը:
Ապա, Վեհափառ Հայրապետը հանդիպում ու մտերմիկ զրոյց ունեցաւ բուժարանի բնակիչներուն՝ պատսպարեալ ծերունիներուն հետ: Վեհափառ Հայրապետը իր օրհնութեան խօսքին ընդմէջէն խրախուսեց զանոնք, հաւաստիացնելով, թէ Եկեղեցին եւ ազգը միշտ պատրաստ են հայ տարեցին կողքին ըլլալու:
Նորին Սրբութիւնը իր ողջոյնին մէջ մասնաւորեց. «Չենք կրնար Եկեղեցին բաժնել ընկերային ծառայութենէն: Ծառայութիւնը իր բոլոր երեսներով անքակտելի մասը կը կազմէ մեր Եկեղեցւոյ սրբազան առաքելութեան: Մեծի Տանն Կիլիկիոյ Կաթողիկոսութիւնը իր ծաւալած բազում գործունէութեանց կողքին յատուկ ուշադրութիւն կը դարձնէ կարիքաւոր ծերունիին եւ բոլոր անոնց, որոնք կարօտ են ընկերային խնամքի: Բոլոր հայ տարեցները արժանի են գնահատանքի եւ գուրգուրանքի: Ես կ'աղօթեմ առ բարձրեալն Աստուած, որ իր երկնային Սուրբ ուժովը սփոփէ ձեզ, զօրացնէ ձեզ՝ ձեր հաւատքին մէջ եւ առաջնորդէ ձեզ՝ առողջութեամբ եւ իմաստութեամբ»:
Այս առիթով, Վեհափառ Հայրապետին ընկերացող Միաբան Հայրերը Աստուածայայտնութեան նուիրուած շարականներու երգեցողութեամբ, Ս. Ծննդեան յատուկ հոգեւոր պահ մը ստեղծեցին: Ապա Վեհափառ Հայրապետը «հիւանդաց բժշկութեան» աղօթքով օրհնեց տարեց ու հիւանդ պատսպարեալները:
Աւարտին, Վեհափառ Հայրապետը խնամակալ մարմնի անդամներուն ընկերակցութեամբ այցելեց բուժարանի վերանորոգուած յարկաբաժինները:
Յայտնենք, որ Մեծի Տանն Կիլիկիոյ Կաթողիկոսութիւնը հովանաւորն է Ազգային Բուժարանի գործունէութեանց:
2016 թուականը «Ծառայութեան Տարի» հռչակուած էր Վեհափառ Հայրապետին կողմէ: Ծառայութեան Տարուան նուիրուած բազմաթիւ ձեռնարկները, որոնք իրագործուեցան Լիբանանի եւ մեր բոլոր թեմերէն ներս, իրենց պսակումը ունեցան Հռչակողին՝ Արամ Ա. Կաթողիկոսի ծառայական այցելութեամբ դէպի Ազգային Բուժարան: