News

Զուիցերիոյ Բողոքական եկեղեցիներու Նախագահ՝ Տոքթ Կոթֆրիտ Լոխըր Անթիլիասի մէջ

23 April 2013

ՙՇՆՈՐՀԱԿԱԼՈՒԹԻՒՆ ԶՈՒԻՑԵՐԻՈՅ՝ ՀԱՅ ԺՈՂՈՎՈՒՐԴԻՆ ՆԿԱՏՄԱՄԲ ԻՐ ՑՈՒՑԱԲԵՐԱԾ ԶՕՐԱԿՑՈՒԹԵԱՆ ՀԱՄԱՐ՚

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ

 

 ՙԶՈՒԻՑԵՐԻԱՆ ՊԻՏԻ ՇԱՐՈՒՆԱԿԷ ՄՆԱԼ ՀԱՅ ԺՈՂՈՎՈՒՐԴԻ ԿՈՂՔԻՆ՚

ԴՈԿՏ. Կ. ԼՕԽԸՐ

 

Զուիցերիոյ Բողոքական եկեղեցիներու Նախագահին՝ Տոքթ Կոթֆրիտ Լոխըրին ի պատիւ տրուած ընդունելութեան խօսք առնելով, Ն.Ս.Օ.Տ.Տ. Արամ Ա. Կաթողիկոս անդրադարձաւ Զուիցերիոյ Բողոքական եկեղեցիներու եւ Մեծի Տանն Կիլիկիոյ Կաթողիկոսութեան պատմական յարաբերութիւններուն: Վեհափառ Հայրապետը յատկապէս ըսաւ. ՙՄեր ժողովուրդը ու եկեղեցին խոր երախտագիտութեամբ կը յիշէ այն զօրակցութիւնը զոր ցոյց տուիք հայ ժողովուրդին Ցեղասպանութենէն յետոյ՝ մեր ժամանակակից պատմութեան մէկ ճակատագրական հանգրուանին: Հանգանակութիւններ կազմակերպեցիք գաղթական հայ ժողովուրդի տառապող զաւակներուն համար, ծերանոց ու կուրանոց հիմնեցիք Սուրիոյ, Լիբանանի ու Յունաստանի մէջ, կարիքաւոր աշակերտներուն կրթանպաստ յատկացուցիք, որպէսզի ինքզինք վերակազմակերպէ մեր ժողովուրդը՚: Շարունակելով իր խօսքը Վեհափառ Հայրապետը ըսաւ. ՙՀայ եկեղեցւոյ ու Զուիցերիոյ Բողոքական եկեղեցիներու միջեւ միջ-եկեղեցական սերտ գործակցութիւն եղած է ու կը շարունակուի աստուածաբանական երկխօսութեան, Արմենօֆասի գործունէութեան եւ այլ ճամբաներով:՚ Այս ծիրէն ներս Վեհափառ Հայրապետը յիշեց Մեծի Տանն Կիլիկիոյ Կաթողիկոսութեան եւ հայ աւետարանական եկեղեցիներու միջեւ շարուակուող գործակցութինը, յատկապէս Ազունիէի բուժարանի եւ ծերանոցի ու կուրանոցի ճամբով:

 

Ապա Վեհափառ Հայրապետը անդրադառնալով Հայ Դատի գծով Զուիցերիոյ զօրակցութեան, ըսաւ. ՙՁեր այցելութիւնը մեր Սուրբ Աթոռին կը զուգադիպի Ապրիլ 24-ին, մեր նահատակներու ոգեկոչման նախօրեակին: Արդարեւ, թէ՜ Զուիցերիոյ պետութիւնը եւ թէ եկեղեցիները ո՜չ միայն ճանչցած են Ցեղասպանութիւնը, այլ ամէն առիթով իրենց զօրակցութիւնը կը յայտնեն հայ ժողովուրդի արդար դատին: Հայ ժողովուրդի դատը արդարութեան դատ է: Եկեղեցին չի՜ կրնար անտարբեր մնալ մարդկային իրաւունքներու բռնաբարման նկատմամբ եւ Զուիցերիոյ եկեղեցիները անտարբեր չմնացին: Միջազգային համայնքը պէտք է ճանչնայ հայ ժողովուրդի Ցեղասպանութիւնը եւ մեր ժողովուրդին իրաւունքները հատուցէ: Սա մեր ժողովուրդին արդար պահանջքն է: Վստահ ենք, որ Զուիցերիան, իր պետութեամբ, ժողովուրդով ու եկեղեցիներով պիտի շարունակէ զօարվիգ կանգնիլ հայ ժողովուրդի արդար դատին՚, եզրակացուց Վեհափառը եւ ապա Մեծի Տանն Կիլիկիոյ Կաթողիկոսութեան Ասպետի շքանշանով պարգեւատրեց Տոքթ. Լոխըրը:

 

Պատասխանելով Վեհափառ Հայրապետի խօսքին, Զուիցերիոյ Բողոքական եկեղեցիներու Նախագահ Տոքթ Լոխըր նախ շնորհակալութիւն յայտնեց Վեհափառ Հայրապետին ցուցաբերած ազնիւ հիւրասիրութեան ու գնահատանքին համար, ինչպէս նաեւ Ասպետի շքանշանի պարգեւատրման համար: Ան ըսաւ, որ ՙայս պարգեւատրումը ու գնահատանքը իմ անձիս ճամբով կ’երթայ մեր եկեղեցիներու ու Զուիցերիոյ ամբողջ ժողովուրդին՚: Տոքթ Լոխըր ըսաւ, թէ ՙԶուիցերիոյ նոր սերունդը իրենց ծնողներէն իմացած է Հայոց Ցեղասպանութեան մասին եւ թէ ինչպէս Զուիցերիոյ ժողովուրդը ու յատկապէս եկեղեցիները փութացած են հայ ժողողուրդի օգնութեան: Խօսելով Ցեղասպանութեան ու Հայ Դատին մասին Տոքթ. Լոխըր ըսաւ, որ ՙմենք պիտի շարունակենք միշտ ըլլալ Հայ Ժողովուրդի ու անոր դատին ու արդարութեան կողքին՚: Երկուշաբթի առաւօտ Տոքթ. Լոխըր Վեհափառ Հայրապետին հետ առանձին հանդիպում մը ունենալէ յետոյ մեկնեցաւ:

 

Տոքթ. Լոխըր Բողոքական եկեղեցիներու միջազգային յարաբերութեանց պատասխանատուին Դոկտ. Օլիվիէ Ֆորներոյին հետ միասին Անթիլիաս ժամանեց Շաբաթ երեկոյեան: Ժամանումէն անմիջապէս յետոյ ան առանձին հանդիպում մը ունեցաւ Վեհափառ Հայրապետին հետ: Ապա, Տոքթ Լոխըր Վեհափառ Հայրապետին ընթրիքի հիւրը եղաւ: Ընթրիքին ներկայ էին նաեւ Արմենօֆասի մարմնի Զուիցերիոյ անդամները: Կիրակի առաւօտ Տոքթ Լոխըր ներկայ եղաւ Սուրբ եւ անմահ Պատարագին Անթիլիասի Մայր Տաճարին մէջ: Կիրակի կէսօրէ յետոյ Վեհափառ Հայրապետը պաշտօնական ընդունելութիւն մը սարքեց ի պատիւ իր հիւրին: Ընդունելութեան ներկայ էին պետական հայ նախարարներ, երեսփոխաններ, Ազգ. Կեդրոնական Վարչութեան անդամներ, Մերձաւոր Արեւելքի Հայ Աւետարանական եկեղեցիներու միութեան Նախագահ Վեր. Մկրտիչ Գարակէօզեան, համայնքի պատասխանատուներ, ինչպէս նաեւ Լիբանանի Բողոքական համայնքի ներկայացուցիչներ:

 

Յայտնենք, որ Բողոքական եկեղեցիները Զուիցերիոյ բնակչութեան շուրջ յիսուն առ հարիւր համեմատութիւնը կը կազմեն եւ գործօն դերակատարութիւն ունին քաղաքական, հասարակական ու միջ-եկեղեցական մարզէն ներս: