News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԺԸՆԵՒԻ ՄԷՋ ՍՈՒՐԻՈՅ ՏԱԳՆԱՊԻ ԳԾՈՎ ՀԱՆԴԻՊՈՒՄ ՈՒՆԵՑԱՒ Մ.Ա.Կ.-Ի ՆԵՐԿԱՅԱՑՈՒՑԻՉՆԵՐՈՒՆ ՀԵՏ

06 March 2016

Երէկ երեկոյեան, Ն.Ս.Օ.Տ.Տ. Արամ Ա. Վեհափառ Հայրապետը Ժընեւի իր իջեւանած պանդոկին մէջ հանդիպում մը ունեցաւ Սուրիոյ տագնապի լուծման աշխատանքները համակարգող Միացեալ Ազգերու Կազմակերպութեան ենթաքարտուղար Նիքոլաս Միշէլի եւ Սուրիական տագնապի բանագնաց Սթեֆան Տը Միսթուրայի (անոր քաղաքէն բացակայութեան պատճառաւ) փոխանորդին հետ։ Նշենք, որ Սուրիոյ տագնապին գծով Վեհափառ Հայրապետը Տը Միսթուրայի հետ հանդիպում մը ունեցած էր 20 Հոկտեմբեր 2015-ին, Աթէնքի մէջ։ Իրենց առաջարկով տեղի ունեցած այս աշխատանքային հանդիպման նպատակն էր ունենալ Նորին Սրբութեան տեսակէտը՝ տագնապի լուծման առաջնորդող գործընթացքին մէջ քրիստոնեայ համայնքներու մասնակցութեան առնչութեամբ։

 

Շուրջ երկու ժամ տեւող խորհրդակցութիւններու ընթացքին, Վեհափառ Հայրապետը լսելէ ետք Մ.Ա.Կ.-ի ներկայացուցիչներուն արժեւորումը Սուրիոյ տագնապի ներկայ հանգրուանին, ինչպէս նաեւ անոնց պատկերացումը յառաջիկայ հանգրուաններուն, ընդառաջելով Մ.Ա.Կ.-ի պատասխանատուներու փափաքին, ան ներկայացուց իր տեսակէտը՝ ընդհանրապէս խաղաղութեան գործընթացքին ու մասնաւորաբար քրիստոնեայ համայնքներու մասնակցութեան շուրջ։ Առաջին հերթին Վեհափառ Հայրապետը շեշտեց, թէ խաղաղութեան գործընթացքին պէտք է մասնակից դառնան Սուրիոյ ժողովուրդը բաղկացնող բոլոր համայնքները, բնականաբար ներառեալ քրիստոնեայ համայնքները։ Որպէս նոյն պարտաւորութիւնները եւ իրաւունքները ունեցող համահաւասար քաղաքացիներ, քրիստոնեաները գործօն մասնակցութիւն պէտք է բերեն Սուրիոյ քաղաքական կեանքին, յիշեցուց Նորին Սրբութիւնը։ Ապա, Վեհափառ Հայրապետը կարգ մը գործնական առաջարկներ ներկայացուց՝ յատկապէս Ժընեւի մէջ տեղի ունենալիք բանակցութիւններու յառաջիկայ հանգրուանին համայնքային ներկայացուցիչներու մասնակցութեան ուղղութեամբ։ Ներկաները համաձայն գտնուելով Նորին Սրբութեան, առաջարկեցին որ այս հարցին շուրջ իր հետ խորհրդակցութիւնները շարունակուին՝ շուտով սկսուելիք բանակցութիւններու արդիւնքներուն լոյսին տակ։