Ն.Ս.Օ.Տ.Տ. Արամ Ա. Վեհափառ Հայրապետը, որպէս իր հայրական սիրոյն ու քրիստոնէական դաստիարակութեան նկատմամբ ցուցաբերած իր յատուկ նախանձախնդրութեան` գործնական արտայայտութիւն, յաճախակի կերպով կ’ընդունի Կիրակնօրեայ վարժարաններու աշակերտները, ուսուցիչներն ու պատասխանատուները: Այս հանդիպումներուն ընթացքին Նորին Սրբութիւնը իր գնահատանքը կը յայտնէ ու միաժամանակ կը կատարէ անհրաժեշտ ցուցմունքներ, բարելաւելու եւ ճիշդ ուղղութեան մէջ դնելու Կիրակնօրեայ վարժարաններու առաքելութիւնը:
Այս ծիրէն ներս, Կիրակի, 1 Նոյեմբեր 2015-ին, Ս. և Անմահ պատարագէն ետք, Վեհափառ Հայրապետը ընդունեց Անթիլիասի շրջանի Կիրակնօրեայ վարժարանի աշակերտները, իրենց ուսուցիչներով։ Վեհափառը իր հայրական թելադրութիւնները կատարեց փոքրիկներուն ու գնահատեց բոլոր ծնողները, որոնք իրենց զաւակները կը ղրկեն Կիրակնօրեայ վարժարան, որպէսզի անոնք դաստիարակուին մեր եկեղեցւոյ բարոյական ու հոգեւոր արժէքներով։
