News

ՄԵԾԻ ՏԱՆՆ ԿԻԼԻԿԻՈՅ ՆԵՐԿԱՅԱՑՈՒՑԻՉԸ ՍԵՐՊԻԱՅԻ ՄԷՋ

23 September 2015

Ն.Ս.Օ.Տ.Տ. Արամ Ա. Վեհափառ Հայրապետին օրհնութեամբ, Գերպ. Տ. Յուսիկ Ծ. Վրդ. Մարտիրոսեան յատուկ առաքելութեամբ ուղղուեցաւ Սերպիա, Խրուաթիա եւ Պոսնիա ներկայացնելու Մեծի Տանն Կիլիկիոյ Կաթողիկոսութիւնը:

 

            Հայր Սուրբը իր մասնակցութիւնը բերաւ 13-14 Սեպտեմբեր 2015-ին, Եասենովադզ քաղաքի ցեղասպանութեան նահատականերու կեդրոնին մէջ, «Նահատակութեան» նուիրուած համագումարին: Եասենովադզ քաղաքը Համաշխարհային Բ. պատերազմի ընթացքին եղած էր կեդրոնացման հաւաքավայր, ուր Ուսթաշի Կուսակցութիւնը շուրջ 700,000 սերպեր ջարդած է: Համագումարը կազմակերպուած էր Սլավոնիոյ շրջանի Եպիսկոպոս Եովան Սրբազանին կողմէ: Համագումարին իրենց մասնակցութիւնը բերին Եւրոպայէն եւ Միջին Արեւելքէն զանազան դասախօսներ եւ եկեղեցիներու ներկայացուիչներ: Հայր Յուսիկ խօսեցաւ Հայոց Ցեղասպանութեան նահատակներուն սրբադասման մասին:

 

            16 Սեպտեմբեր 2015-ին Պոսնիայի, Րիբուպլիքա Սրպսքայի գիտութիւններու ակադեմիայի սրահէն ներս Հայր Սուրբը դասախօսութիւն մը տուաւ նուիրուած Հայոց Ցեղասպանութեան: Իսկ յաջորդ օրը, Սերպիոյ մէջ՝ Պէլկրատի հանրային գրադարանի սրահէն ներս, դասախօսեց Հայոց Ցեղասպանութեան եւ «Կիլիկիա» Թանգարանին մասին, շեշտը դնելով հայ ժողովուրդի մշակութային կորուստին վրայ:

 

            Սոյն ճամբորդութեան ընթացքին Հայր Սուրբը հանդիպումներ ունեցաւ Սերպ Ուղղափառ Եկեղեցւոյ Պատրիարքի ընդհանուր փոխանորդ Արսէնի Եպիսկոպոսին եւ Խրուաթիոյ Պոզէքա շրջանի Կաթոլիկ Եպիսկոպոս Անթուն Սքորսեվիչ Սրբազանին հետ: Զոյգ Սրբազանները մտահոգութիւն յայտնեցին վերջին շրջանին Եւրոպա ժամանած Սուրիացի գաղթականներուն մասին եւ Միջին Արեւելքէն ներս քրիստոնեայ համայնքներուն իրենց զօրակցութիւնը արտայայտեցին: Հայր Սուրբը նաեւ այցելեց Սերպիոյ Ցեղասպանութեան թանգարանը ուր հանդիպում ունեցաւ թանգարանի տնօրէնին հետ: