News

Հաղորդագրութիւն

08 May 2013

Մեծ Եղեռնի Զոհերու Սրբադասման Հարցի շուրջ Հայաստանեայց Առաքելական Սբ. Եկեղեցւոյ Յանձնաժողովի Հինգերորդ Ժողովի (7-8 Մայիս 2013, Մայր Աթոռ Սբ. Էջմիածին)

 

Սոյն թուականի Մայիս 7-ին եւ 8-ին Մայր Աթոռ Սբ Էջմիածնի մէջ գումարուեցաւ Մեծ Եղեռնի զոհերու սրբադասման հարցի շուրջ Հայց. Առաքելական Սբ. Եկեղեցւոյ յանձնաժողովի հինգերորդ ժողովը: Ժողովի ներկայ էին.

 

1. Գերշ. Տ. Եզնիկ Արք. Պետրոսեան (Համաատենապետ, Ամենայն Հայոց Կաթողիկոսութիւն),

2. Գերշ. Տ. Սեպուհ Արք. Սարգիսեան (Համաատենապետ, Մեծի Տանն Կիլիկիոյ Կաթողիկոսութիւն),

3. Գերշ. Տ. Նաթան Արք. Յովհաննիսեան (Ամենայն Հայոց Կաթողիկոսութիւն),

4. Գերշ. Տ. Մուշեղ Արք. Մարտիրոսեան (Մեծի Տանն Կիլիկիոյ Կաթողիկոսութիւն),

5. Տ. Վազգէն Եպս. Միրզախանեան (Ամենայն Հայոց Կաթողիկոսութիւն),

6. Գերշ. Տ. Արմաշ Եպս. Նալպանտեան (Ատենադպիր, Ամենայն Հայոց Կաթողիկոսութիւն),

7. Գերշ. Տ. Բաբգէն Եպս. Չարեան (Ատենադպիր, Մեծի Տանն Կիլիկիոյ Կաթողիկոսութիւն),

Ժողովէն կը բացակայէր Գերշ. Տ. Անուշաւան Եպս. Դանիէլեանը: (Մեծի Տանն Կիլիկիոյ Կաթողիկոսութիւն):

 

Յանձնաժողովը իր աշխատանքները սկսաւ, առաւօտեան, Մայր Աթոռ Սբ. Էջմիածնի Դիւանատան ժողովասրահին մէջ աղօթքով: Ատենապետ Սրբազան Հայրերը բարի գալուստ մաղթեցին յանձնաժողովի անդամներուն, ապա փոխանցեցին Ն.Ս.Օ.Տ.Տ. Գարեգին Բ Ամենայն Հայոց Կաթողիկոս եւ Ն.Ս.Օ.Տ.Տ. Արամ Ա Մեծի Տանն Կիլիկիոյ Կաթողիկոս Վեհափառ Հայրապետներու օրհնութիւնները եւ բարեմաղթանքները յանձնաժողովի աշխատանքներուն կապակցութեամբ:

 

Ժողովականները վերանայեցան նախորդ շրջանին կատարուած աշխատանքները եւ անոնց հիման վրայ եզրահանգումներու եկան: Նկատի ունենալով Վեհափառ Հայրապետներու յանձնարարականը, ժողովականները զբաղուեցան Մեծ Եղեռնի տարիներուն նահատակներու սրբադասման հարցով:

 

Ժողովը որոշեց յետագային թողել Մեծ Եղեռնէն առաջ նախկին դարերու հայ նահատակներու սրբադասման հարցը: Ժողովը իր աշխատանքները աւարտեց Չորեքշաբթի, 8 Մայիս 2013-ի երեկոյեան:

 

Հինգշաբթի առաւօտ, Համբարձման տօնի օրը, որ զուգադիպեցաւ յաղթանակի օրուայ տօնակատարութեան, ժողովի անդամները մասնակցեցան Երեւանի յաղթանակի յուշարձանին մօտ տեղի ունեցող տօնակատարութեան:

 

Յանձնաժողովի դիւան 8 Մայիս 2013, Մայր Աթոռ Սբ. Էջմիածին