News

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԱՊՈՒ ՏԱՊԻԻ ԼԻԲԱՆԱՆԵԱՆ ԴԵՍՊԱՆԱՏԱՆ ՄԷՋ

09 December 2014
Արաբական Միացեալ Էմիրութեանց տուած իր հովուապետական այցելութեան ընթացքին եւ իր ունեցած հանդիպումներու շարքին, Երկուշաբթի, 8 Դեկտեմբեր 2014-ին, Ն.Ս.Օ.Տ.Տ. Արամ Ա. Վեհափառ Հայրապետը պաշտօնական այցելութիւն մը տուաւ Ապու Տապիի Լիբանանեան դեսպանատան, ուր ջերմօրէն դիմաւորուեցաւ դեսպան Հասան Սաըտի կողմէ։ Վեհափառ Հայրապետին կ’ընկերանային Արաբական Միացեալ էմիրութեանց եւ Քաթարի Թեմի Կաթողիկոսական Փոխանորդ Հոգշ. Տ. Մեսրոպ Վրդ. Սարգիսեան, Սպահանի Թեմի Առաջնորդ Գերշ. Տ. Բաբգէն Եպս. Չարեան, միաբան հայրեր, Արաբական Միացեալ Էմիրութեանց մօտ Հայաստանի դեսպան Գեղամ Ղարիպջանեան, Թեմի Ազգային Երեսփոխանական Ժողովը եւ Ազգային Վարչութիւնը ներկայացնող հետեւեալ անձերը.- Հրայր Սողոմոնեան, Գօգօ Մահսերէճեան, Արա Խանոյեան, Վարուժան Նարկիզեան, Տօքթ. Վարդգէս Արզումանեան, Վահէ Երէցեան եւ Սեդրակ Տէր Մելքոնեան։

Ողջունելով Արամ Ա. Կաթողիկոսին այցելութիւնը, դեսպանը գնահատանքով խօսեցաւ Վեհափառ Հայրապետին ի նպաստ հայութեան, ինչպէս նաեւ Լիբանանին համար արտաքին աշխարհին մէջ կատարած աշխատանքներուն մասին։ Իր կարգին Նորին Սրբութիւնը շեշտեց Լիբանանի կարեւորութիւնը սփիւռքահայութեան կեանքէն ներս եւ անդրադարձաւ Հայոց Ցեղասպանութենէն ետք արաբ ժողովուրդին ու մանաւանդ լիբանանին ցուցաբերած զօրակցութեան՝ հայ ժողովուրդին ու անոր դատին նկատմամբ։

Այս առիթով Նորին Սրբութեան ու դեսպանին միջեւ փոխանակուած նուէրներէն ետք, դեսպանը ճաշկերոյթ մը տուաւ ի պատիւ Վեհափառ Հայրապետին։

Յայտնենք, որ Կիրակի, 7 Դեկտեմբեր 2014-ին, Արամ Ա. Կաթողիկոս Տուպայէն ժամանած էր Ապու Տապի ու անմիջապէս այցելած նորակառոյց Սրբոց Նահատակաց եկեղեցին եւ ապա, հանդիպում ունեցած Ազգային Վարչութեան անդամներուն հետ։