Կիրակի, 23 Նոյեմբեր 2014-ին, միօրեայ այցելութեամբ Անթիլիասի Մայրավանք ժամանեց հանրածանօթ ազգային բարերար և գործարար Ռուբէն Վարդանեան։ Մոսկուայի մէջ կայք հաստատած Ռուբէն Վարդանեան նաեւ կեդրոնատեղիներ ունի Լոնտոնի, Երեւանի ու Նիւ Եորքի մէջ և ձեռնարկած է Հայաստանի ու Ղարաբաղի զարգացման մեծ ծրագիրներու իրագործման։
Ռուբէն Վարդանեան Անթիլիաս ժամանած էր միօրեայ այցելութեամբ հանդիպում ունենալու Ն.Ս.Օ.Տ.Տ. Արամ Ա. Կաթողիկոսին հետ։ Առաւօտեան ան ներկայ գտնուեցաւ Ս. և Անմահ պատարագին, ապա ճաշի հիւրը եղաւ Վեհափառ Հայրապետին։ Ռուբէն Վարդանեանը Վեհափառ Հայրապետին պարզեց իր ծրագիրները և ուզեց իմանալ Նորին Սրբութեան տեսակէտը։ Վեհափառ Հայրապետը բարձր գնահատեց Ռուբէն Վարդանեանի հայրենակերտումի եւ ազգաշինութեան ի նպաստ բոլոր նախաձեռնութիւնները, և կոչ ուղղեց մեր ունեւոր բոլոր ազգայիններուն ու գործարարներուն, նոյն յանձնառութեամբ ու տեսլականով մասնակից դառնալու հայրենիքին ու ազգին հզօրացման աշխատանքներուն։
