ԱՆԹԻԼԻԱՍԻ ՏՊԱՐԱՆԷՆ ԼՈՅՍ ՏԵՍԱՒ
ՙՅԻՇԱՏԱԿԱՐԱՆ ԱՏԱՆԱՅԻ ԱՂԷՏԻ՚ ՄԱՏԵՆԱՇԱՐԻՆ Ա. ՀԱՏՈՐԸ
11/24/2009
Ատանայի կոտորածի 100-ամեակին առիթով Մեծի Տանն Կիլիկիոյ Կաթողիկոսութեան Մայրավանքէն ներս հաստատուած յատուկ մատենաշարի առաջին հատորը լոյս տեսաւ, որուն մեկենասն է Գալուստ Կիւլպէնկեան Հիմնարկութեան Հայկական Բաժանմունքը:
Սոյն մատենաշարով պիտի վերահրատարակուին այն բոլոր վաւերագրական արժէք ունեցող գիրքերն ու գրքոյկները, որոնք կը ներկայացնեն վերոյիշեալ աղէտին մանրամասնութիւնները: Հրատարակութեան այս շարքին մէջ պիտի ներառնուի նաեւ գեղարուեստական գրականութիւնը, որ նոյն աղէտին առիթով ստեղծագործուած է հայ գրագէտներու կողմէ:
Մատենաշարին այս առաջին հատորը կը ներկայացնէ Սուրէն Պարթեւեանի ՙԿիլիկեան Արհաւիրքը՚ գործը, որուն առաջին հրատարակութիւնը կատարուած է 1909-ին, Կ. Պոլսոյ մէջ:
Մատենաշարի իբրեւ ուղեցոյց-պատգամ, սոյն հրատարակութեան սկիզբը զետեղուած է Ն.Ս.Օ.Տ.Տ. Արամ Ա. Կաթողիկոսի Հայրապետական Խօսքը, Ատանայի Կոտորածին 100-ամեակի ազդանշանը տուող: Վերոյիշեալ պատգամով, Վեհափառ Հայրապետը կը հրաւիրէ մեր ժողովուրդի բոլոր զաւակները, իրենց ուշադրութիւնը կեդրոնացնելու Ատանայի Ջարդի ողբերգական անցուդարձերուն վրայ, որոնք հունաւորեցին թրքական հայաջինջ ծրագիրը, որ 1915-ի Ցեղասպանութեամբ արտայայտութիւն գտաւ:
ՙՀԱՍԿ ՀԱՅԱԳԻՏԱԿԱՆ ՏԱՐԵԳԻՐՔ՚Ի 2009-Ի ԹԻՒԸ՝
ՆՈՒԻՐՈՒԱԾ ՀԱՅԿԱԿԱՆ ԿԻԼԻԿԻՈՅ
1/24/2009
Ս. Աթոռոյս Հայագիտութեան բերած կարեւոր նպաստներէն կը համարուի ՙՀասկ Հայագիտական Տարեգիրք՚ը: Այս տարուան հատորը ամբողջութեամբ նուիրուած է Հայկական Կիլիկիոյ: Ընթացիկ տարուան սկզբնաւորութեան, Մայրավանքիս մէջ, Ն.Ս.Օ.Տ.Տ. Արամ Ա. Կաթողիկոսի նախաձեռնութեամբ գումարուած Հայկական Կիլիկիոյ նուիրուած գիտաժողովին բոլոր նիւթերը ամփոփուած են ներկայ տարեգիրքին մէջ:
Նիւթերը իրենց դասախօսական ձեւէն դուրս, ամբողջական վիճակով մատուցուած են, եւ կը բովանդակեն հայկական Կիլիկիոյ աշխարհագրական, կրօնական-աստուածաբանական, քաղաքական, զինուորական, մշակութային, ազգագրական, ընկերային, կենցաղային ու կեանքի այլ բնագաւառները: Հայերէն եւ օտար լեզուներով սոյն գիտական յօդուածները նոր լոյս կը սփռեն աշխարհագրական այդ տարածքի հայ կեանքին վրայ:
ՙՀասկ Հայագիտական Տարեգիրք՚ի այս թիւը լոյս տեսաւ Գալուստ Կիւլպէնկեան Հիմնարկութեան Հայկական Բաժանմունքին մեկենասութեամբ:
ՎԵՀԱՓԱՌ ՀԱՅՐԱՊԵՏԸ ԶՐՈՒՑԱԿԻՑ
ՀԱՅ ԵՐԻՏԱՍԱՐԴՈՒԹԵԱՆ
11/21/2009
Մոնթրէալի մէջ, հովանաւորութեամբ Գանատայի Հայոց Թեմին, լոյս տեսաւ Ն.Ս.Օ.Տ.Տ. Արամ Ա. Կաթողիկոսի Հայ Երիտասարդութեան հետ զրոյցի բնոյթ ունեցող յօդուածներու ժողովածուն, անգլերէն բնագրով ու ֆրանսերէն թարգմանութեամբ: Հատորին խմբագիրն է Մոնթրէալի Ս. Յակոբ Մայր Եկեղեցւոյ հոգեւոր հովիւ Արժ. Տ. Գառնիկ Քհնյ. Գոյունեան:
Հայ երիտասարդութեան նկատմամբ Վեհափառ Հայրապետին նախանձախնդրութիւնը, պատճառ դարձած էր անցնող երկու տարիներուն, որ Նորին Սրբութիւնը յաճախակիօրէն յօդուածներ հրապարակէր անգլերէն լեզուով: Անոնց ճամբով, հայ երիտասարդութիւնը յուզող բազմաթիւ հարցեր քննարկուած էին, ու երիտասարդական լայն շրջանակներու կողմէ, համացանցի ճամբով ընթերցուելով, վերլուծման առիթ հանդիսացեր էին:
Վեհափառ Հայրապետին նոյն նախանձախնդրութենէն մեկնած, Գառնիկ Քահանան ի մի խմբած էր վերոյիշեալ զրոյցները Վեհափառ Կաթողիկոսին, ու զանոնք նաեւ ֆրանսերէնի վերծանել տալով, հրատարակած մէկ հատորի ներքեւ:
Յոյժ գնահատելի սոյն նախաձեռնութիւնը առիթ պէտք է հանդիսանայ հայ երիտասարդութեան, անգամ մը եւս նայելու այդ գիրքին մէջ արծարծուած բազմաթիւ հարցերուն, որոնք կը վերաբերին մեր եկեղեցւոյ, մեր ազգին, մեր հայրենիքին, ու յատկապէս մեր երիտասարդութեան:
ՙՀԱՅ ԳԻՐՔԸ՝ Ի ՍՊԱՍ ՀԱՅ ՄՇԱԿՈՒԹԱՅԻՆ ԱՐԺԷՔՆԵՐՈՒ ԿԵՆՍԱԳՈՐԾՄԱՆ՚
ԱՐԱՄ Ա. ԿԱԹՈՂԻԿՈՍ
11/01/2009
Մեծի Տանն Կիլիկիոյ Կաթողիկոսութեան Մայրավանքէն ներս աւանդութիւն դարձած Հայ Գիրքի տարեկան Ցուցահանդէսին բացումը կատարուեցաւ Կիրակի 1 Նոյեմբեր 2009-ին, Ն.Ս.Օ.Տ.Տ. Արամ Ա. Կաթողիկոսի ձեռամբ Կաթողիկոսարանի շրջափակին մէջ, Անթիլիաս:
Մայր Տաճարին մէջ մատուցուած Ս. պատարագէն անմիջապէս ետք, Միաբան Հայրերու եւ Դպրեվանքի սաներու թափօրը, գլխաւորութեամբ Վեհափառ Հայրապետին, ուղղուեցաւ դէպի Կաթողիկոսարանի թանգարանի շրջափակը, ուր լրուած հսկայ տաղաւարի մը ներքեւ կազմակերպուած էր ցուցահանդէսը: Անցնող տարիներու նման, սոյն տաղաւարը սիրայօժար տրամադրած էին Խաչատուրեան եղբայրները:
Բացման հանդիսութեան ներկայ էին հոգեւոր հայրեր, մտաւորականներ, ուսանողներ, մշակութասէրներ, Մայր Տաճարին մէջ Ս. պատարագին ներկայ եղող հոծ բազմութիւնը եւ թղթակիցներ: Գեղարուեստական յայտագրով, տուտուկով ու սրինգով երգեր ներկայացուեցան մշակութասէր հասարակութեան, հայ մշակոյթի փառքը հիւսելով:
Ցուցահանդէսին կը մասնակցին լիբանանահայ եւ արտասահմանեան շարք մը հրատարակչատուներ, ինչպէս նաեւ անհատ հեղինակներ, եւ Կաթողիկոսարանէն ներս գործող բոլոր հրատարակչատուները:
Այս առիթով արտասանած իր պատգամով, Վեհափառ Հայրապետը անդրադարձաւ Հայ Գիրքին, հայ մարդուն կեանքէն ներս ունեցած առանցքային դերակատարութեան: Ան ըսաւ. ՙՀայ Գիրքը՝ ի սպաս հայ մշակութային արժէքներու կենսագործման: Հայ գիրքը ինքնակեդրոն, ինքնաբաւ ու ինքնանպատակ իրականութիւն մը չէ: Անոր նպատակն է մեր հոգեմտաւոր արժէքները, մեր մշակութային արժէքները տարածել, կենսագործել մեր ժողովուրդի կեանքէն ներս: Առաքելութեան մը լծուած է հայ գիրքը, զայն գրողը, զայն տպողը, զայն սիրողը՝ ի սպաս հայ մշակոյթի տարածման: Մշակոյթը ժողովուրդի մը ինքնութեան ամէնէն պերճախօս, ամէնէն շօշափելի ու վաւերական արտայայտութիւնն է: Անիկա ժողովուրդի ոգեղէն գոյութեան, մտքի յղացքներուն, հոգիի ճենճերումներուն, սրտի տրոփներուն, անոր ինքնաճանաչողութեան ամէնէն վաւերական արտայայտութիւնն է: Մանաւանդ մեր ժողովուրդին համար, մշակոյթը աւանդութիւն, սովորութիւն ու կենցաղակերպ չէ եղած, այլ մեր ժողովուրդի հոգեկան արժէքներուն ու հոգիի ձգտումներուն հարազատ պատկերը եղած է անիկա: Հայ մշակոյթի ծիրէն ներս մեր հոգեմտաւոր արժէքները՝ գիրն ու գրականութիւնը իրենց կարեւոր տեղը ու դերը ունեցած են՚ շեշտեց Վեհափառ Հայրապետը:
Ապա, Նորին Սրբութիւնը անդրադարձաւ հայ լեզուի կարեւորութեան, եւ մերժեց այն պարտուողական տեսակէտը, թէ հայ լեզուն Սփիւռքի մէջ նահանջ մէջ է: Ան ցոյց տուաւ Մեծի Տանն Կիլիկիոյ Կաթողիկոսութեան կոչին ընդառաջած հարիւրաւոր սփիւռքահայ աշակերտներու գրութիւնները հայ լեզուի մասին, որոնք մէկ հատորի մէջ խմբելու խոստում տուած էր, անցնող տարուան գիրքերու ցուցահանդէսին օրը: Վեհափառ Հայրապետը քանի մը հատուածներ ընթերցելով նշեալ գիրքէն, հայ աշակերտին վառ ապրումներուն հաղորդ դարձուց ներկաները: Տողեր՝ ուր հայ աշակերտը իր զօրեղ կամքով իր սէրն ու հոգածութիւնը ցոյց կու տայ հանդէպ իր մայրենիին: Այս առիթով Վեհափառ Հայրապետը գնահատեց մեր բոլոր վարժարաններու աշակերտները, Լիբանանէն մինչեւ Սուրիա, Եւրոպա ու Ամերիկաները, որոնք մասնակցած էին ՙԶհաց մեր հանապազորդ՚ այս գիրքի հրատարակութեան, իրենց մտածումները թուղթին յանձնելով ու Անթիլիասի Մայրավանքը ղրկելով:
Իր խօսքի վերջին բաժնով, Վեհափառ Հայրապետը յայտնեց, թէ Հայ Գիրքի Անթիլիասեան այս Ցուցահանդէսը յաջորդ տարիէն սկսեալ շատ աւելի ծաւալուն պիտի դառնայ, ընդգրկելով ամբողջ Սփիւռքի հրատարակչատուները եւ անհատները որոնք կը փափաքին մաս կազմել անոր:
Արամ Ա. Կաթողիկոս նաեւ գնահատեց Հայ Գիրքին զօրավիգ կանգնող բոլոր կազմակերպութիւնները եւ անհատները: Երաշխիք տուաւ, որ Կիլիկեան Ս. Աթոռը նոյն նախանձախնդրութեամբ պիտի շարունակէ իր առաքելութիւնը, ո՜չ միայն Անթիլիասի մէջ, այլ մեր բոլոր թեմերէն ներս, տէր կանգնելով մեր հոգեմտաւոր արժէքներուն ու հայրերու ժառանգութեան:
Վեհափառ Հայրապետին պատգամէն ու ներկայացուած գեղարուեստական յայտագրէն ետք, ներկայ մշակութասէր ժողովուրդը մօտեցաւ սեղաններուն, որոնց վրայ ցուցադրուած էին հոգեւոր, եկեղեցագիտական, իմաստասիրական, գրական, մանկապատանեկան, գրադատական, գրականագիտական, երաժշտական ու մշակոյթի այլ բնագաւառները շօշափող հրատարակութիւններ:
Ցուցահանդէսը բաց պիտի մնայ մինչեւ 22 Նոյեմբեր 2009, առաւօտեան ժամը 10-էն, երեկոյեան 7:
ՙՀԱՅ ԵՐԻՏԱՍԱՐԴՈՒԹԵԱՆ ՏԱՐԻ՚Ն ՅԱՏԿԱՆՇՈՂ
ՀԱՏՈՐ ՄԸ ԱՆԹԻԼԻԱՍԻ ՄԱՅՐԱՎԱՆՔԷՆ
07/21/2009
Մամուլի ճամբով մեր ժողովուրդը տեղեակ պահած ենք արդէն, թէ Մեծի Տանն Կիլիկիոյ Ն.Ս.Օ.Տ.Տ. Արամ Ա. Կաթողիկոս, Հայրապետական հռչակագրով 2009 տարին յայտարարած էր ՙՀայ Երիտասարդութեան Տարի՚: Խորապէս համոզուած մեր երիտասարդութեան այսօրուան ու վաղուան դերակատարութեան, Մեծի Տանն Կիլիկիոյ Կաթողիկոսութիւնը յատուկ բաժանմունքի աշխատանքով կը ջանայ մեր եկեղեցւոյ կեանքին շուրջ հաւաքել հայ երիտասարդութիւնը բոլոր թեմերէն ներս:
Զգալի է կրօնական վերազարթօնք մը մեր երիտասարդութեան մօտ, սակայն անոր դիմաց զգալի էր նաեւ պակասը կրօնագիտական աղբիւրներու, որոնք մեր եկեղեցւոյ աստուածաբանութեան, դաւանանքին, եկեղեցաբանութեան ու աւանդութեան հարազատ ըլլային: Անցեալ դարուն եղած են նման հրատարակութիւններ, անշուշտ այդ օրերուն գործածական եղող աշխարհաբարով, որ դժուար ըմբռնելի է այս օրերուն: Իսկ հին հայ գրականութեան մէջ գրաբար լեզուով բազմաթիւ մեկնութիւններ կան մեր մատենագիրներուն կողմէ հեղինակուած:
Անթիլիասի տպարանէն նոր լոյս տեսաւ հատոր մը, որ մեր երիտասարդութեան ցոյց պիտի տայ, թէ ի՞նչ ուղղութեան պէտք է հետեւի ճշմարիտ քրիստոնէական կեանք վարելու, եւ Աստուածահաճոյ վարքով արժանի դառնալու Անոր զաւակը կոչուելու պատիւին: Սոյն գիրքը՝ ՙԵրկինքի Ճամբան՚ խորագրով, վերահրատարակութիւն մըն է, որ 1907-ին իր չորրորդ հրատարակութեան արժանացած է: Կիւրինցի վարժապետ մը՝ Մանուկ Կակոսեան, իր Սուրբ Գրային հմտութիւնը ի սպաս կը դնէ նոր սերունդին բացատրելու թէ ի՞նչ է քրիստոնէութեան իսկութիւնը:
Գիրքին բովանդակութիւնը արդի աշխարհաբարով ընթեռնելի դարձնելու համար, Մեծի Տանն Կիլիկիոյ Կաթողիկոսութեան նորընծայ միաբաններէն Հոգշ. Տ. Վարանդ Աբղ. Քորթմոսեան լծուեցաւ այս աշխատանքին եւ հայ երիտասարդութեան ձեռքերուն մէջ կը դրուի այժմ սոյն հատորը իբրեւ վաւերական ուղեցոյց:
ԿՐՕՆՔԻ ԴԱՍԱԳԻՐՔԵՐՈՒ ՀՐԱՏԱՐԱԿՈՒԹԵԱՆ
ՇԱՐՈՒՆԱԿՈՒԹԻՒՆԸ ԱՆԹԻԼԻԱՍԻ ՄԷՋ
07/15/2009
Մեծի Տանն Կիլիկիոյ Կաթողիկոսութեան հովանաւորութիւնը վայելող Կրօնքի նոր դասագիրքերու հրատարակութեան աշխատանքը, որ երկու տարիներ առաջ սկսած էր, իւրաքանչիւր տարի լոյս կ’ընծայէ նոր հատոր մը, բաւարարելու համար Սփիւռքահայ կրթական օճախներու պահանջը:
Ցարդ հրատարակուած հատորները տարիքային բաժանումով, կ’ընդգրկեն 8, 12, 14 տարիքի մէջ եղող աշակերտներու համար պատրաստուած կրօնական գիտելիքներ՝ Աստուածաշունչ մատեան, Հայ Եկեղեցւոյ սուրբեր, տօներ եւ աւանդութիւններ, աղօթքներ եւ մանկավարժական մօտեցումով պատրաստուած այլ դաստիարակչական աշխատանքներ ու խաղեր, հարուստ գունագեղ պատկերներով, շքեղ տպագրութեամբ: Նշենք թէ իւրաքանչիւր դասագիրք ունի նաեւ իր ուսուցչի ուղեցոյցը, որուն վերջին՝ 14 տարեկանի յատուկ գիրքը լոյս տեսաւ անցնող շաբաթ:
Այս հանգրուանին, արդէն իսկ մամուլի տակ է, 6 տարեկանի կրօնքի դասագիրքը, իր ուսուցչի ուղեցոյցով, ինչպէս նաեւ 10 տարեկանի դասագիրքը, դարձեալ իր ուսուցչի ուղեցոյցով:
Ն.Ս.Օ.Տ.Տ. Արամ Ա. Կաթողիկոս իր հայրական օրհնութիւնը տալով լոյս տեսնող սոյն դասագիրքերու շարքին, անդրադարձաւ Ազգ. Կեդրոնական Վարչութեան Կրօնական Ժողովի անցնող շրջանի օրակարգերուն վրայ կարեւոր տեղ գրաւող սոյն ծրագրին, որ հայկական վարժարաններու եւ կիրակնօրեայ դպրոցներու աշակերտութեան մօտ զգացուող մեծ բաց մը կը լրացնէ:
ՀԱՅԱՍՏԱՆԻ ԱԶԳԱՅԻՆ ԳՐԱԴԱՐԱՆԸ ԿԸ ԳՆԱՀԱՏԷ
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ
ՀՐԱՏԱՐԱԿՉԱԿԱՆ ԳՈՐԾՈՒՆԷՈՒԹԻՒՆԸ
07/10/2009
Հայաստանի Գրողներու Միութեան եւ Հայաստանի Ազգային Գրադարանի միացեալ նախաձեռնութեամբ, Հինգշաբթի, 10 Յուլիս 2009, կէսօրէ ետք ժամը 3-ին, Ազգային Գրադարանի սրահին մէջ տեղի ունեցաւ ՙԳէորգ Մելիտինեցի գրական մրցանակ՚ի 68-րդ հրատարակութիւնը հանդիսացող ՙՕրհներգութիւն Մեծասքանչին՚ հաստափոր ժողովածուին շնորհահանդէսը, ներկայութեամբ շուրջ 100 հայրենի գրողներու, գրականագէտներու, մտաւորականներու եւ գրադարանի անձնակազմին:
Ձեռնարկին բացումը կատարելով՝ Հայաստանի Ազգային Գրադարանի տնօրէն, Հ.Գ.Մ.ի վարչութեան անդամ եւ հանրածանօթ մտաւորական Դաւիթ Սարգսեան ողջունեց ՙԱզգային Գրադարանի մեծն բարեկամ՚ Արամ Ա. Վեհափառի գլխաւորութեամբ Մեծի Տանն Կիլիկիոյ Կաթողիկոսութեան հրատարակչական բեղուն գործունէութիւնը, ՙՄայր գրադարանի հաւաքածոյի համալրման զօրակցելու նպատակով՚ ցուցաբերած հայրապետական գուրգուրանքը եւ Վեհափառ Հայրապետին հեղինակած թանկարժէք աշխատասիրութիւնները: Յայտնելէ ետք, թէ Գրողներու Համահայկական Դ. Համագումարի առիթով, տարի մը առաջ Արամ Ա. Կաթողիկոսի Ազգային Գրադարանի նուիրած աւելի քան 70 անուն հատորներէն ետք, քանի մը օր առաջ ուրախութեամբ ստացան Վեհափառ Հայրապետին անգլերէնով եւ ֆրանսերէնով վերջերս լոյս տեսած ՙFor a Church Beyond its Walls՚ եւ ՙPour un Monde Transformé՚ հատորները, հանգամանօրէն անդրադարձաւ Մեծի Տանն Կիլիկիոյ Կաթողիկոսութեան գրահրատարակչական բեղուն գործունէութեան:
Ապա՝ Դաւիթ Սարգսեան բարձր գնահատեց ՙՕրհներգութիւն Մեծասքանչին՚ի համայնագիտարանային բացառիկ արժէքը, զայն կազմած եւ խմբագրած լիբանանահայ գրագէտ Սարգիս Կիրակոսեանի գրական, խմբագրական եւ մշակութային աշխոյժ գործունէութիւնը՝ յատկապէս Հայաստան-Սփիւռք գրական կապերու սերտացման եւ զարգացման ուղղութեամբ եւ, ՙհայ մշակոյթին մատուցած ծառայութիւնների համար՚՝ մեծարեալ հատորին հեղինակը պարգեւատրեց ՙՅակոբ Մեղապարտ՚ յուշամետալով:
Այնուհետեւ խօսք առին Հ.Գ.Մ.ի նախագահ Լեւոն Անանեան, գրականագէտներ՝ Դաւիթ Գասպարեան, Սուրէն Դանիէլեան, հանրածանօթ մտաւորական Լեւոն Լաճիկեան, բանաստեղծներ՝ Եդուարդ Միլիտոնեան, Արմէն Մարտիրոսեան, Յովհաննէս Գրիգորեան, Վարդան Վանատուր եւ ուրիշներ, որոնք, բոլորն ալ, մեծապէս գնահատեցին հատորին ՙհամահայկական՚, ՙկոթողական՚ եւ ՙհամայնագիտարանային եզակի արժէքը՚, եւ շեշտեցին, որ ՙՕրհներգութիւն Մեծասքանչին՚ի երկրորդ հրատարակութիւնը պէտք է լոյս տեսնէ Երեւանի մէջ եւ դառնայ ամէնօրեայ օժանդակ գիրքը հայ լեզուի եւ գրականութեան բոլոր ուսուցիչ-ուսուցչուհիներուն:
ՙԽԱՉԻԿ ՊԱՊԻԿԵԱՆ ՀՐԱՏԱՐԱԿՉԱԿԱՆ ՀԻՄՆԱԴՐԱՄ՚Ի
ԱՌԱՋԻՆ ՀԱՏՈՐԸ ՆԵՐԿԱՅԱՑՈՒԵՑԱՒ ՀԱՆՐՈՒԹԵԱՆ
06/05/2009
Ուրբաթ 5 Յունիս 2009-ի երեկոյեան ժամը 7-ին, Անթիլիասի Մայրավանքին մէջ տեղի ունեցաւ գինեձօնը, ՙԽաչիկ Պապիկեան Հրատարակչական Հիմնադրամ՚ի հասոյթով հրատարակուած առաջին հատորին, հովանաւորութեամբ Ն.Ս.Օ.Տ.Տ. Արամ Ա. Կաթողիկոսի: Գիրքը որուն խորագիրն է ՙՀայ բնակչութեան էթնոկրօնական վերակերպումները Թուրքիայի հանրապետութիւնում (1923-2005թթ. )՚ հեղինակած է իրանահայ Կարէն Խանլարեան, որ զայն իբրեւ թէզ ներկայացուցած է, ստանալու համար պատմական գիտութիւններու թեկնածուի գիտական աստիճան, ղեկավարութեամբ Դոկտ. Աշոտ Մելքոնեանի:
Անթիլիասի մէջ կայացած սոյն հանդիսութեան ներկայ գտնուեցան ազգ. կեդրոնական վարչութեան հոգեւորական եւ աշխարհական անդամներ, մտաւորականներ, ինչպէս նաեւ հանգուցեալ Մեթր Պապիկեանի երեք դուստրերը:
Գիրքը հանդիսականներուն ներկայացուց, զայն հրատարակութեան պատրաստող Երուանդ Բամպուքեան, որ մանրամասնօրէն անդրադարձաւ անոր բովանդակութեան հիմնական մասերուն: Ե. Բամպուքեան խօսեցաւ նաեւ անոր այժմէականութեան ու արժէքին մասին, յատկապէս ներկայ Թուրքիոյ վարած քաղաքականութեան լոյսին տակ:
Հուսկ խօսք առաւ Վեհափառ Հայրապետը, իր կարգին անդրադառնալով Մեծի Տանն Կիլիկիոյ Կաթողիկոսութեան կողմէ կատարուած այս նախաձեռնութեան: Նորին Սրբութիւնը ոգեկոչեց յիշատակը Մեթր Պապիկեանին, ՙորուն նախասիրութիւններէն մին էր քաղաքական գիտութիւնը՚ ըսաւ Ան, եւ աւելցուց, որ յարգելով իր յիշատակը, իր փափաքով հաստատուած հիմնադրամը առաւելաբար պիտի հրատարակէ քաղաքական գիտութիւններու վերաբերող աշխատասիրութիւններ:
Նշենք, որ այս հիմնադրամը կը վայելէ Մեծի Տանն Կիլիկիոյ Կաթողիկոսութեան հովանաւորութիւնը եւ յատուկ յանձնախումբի մը ճամբով իր աշխատանքները յառաջ կը տանի, հրատարակութեան պատրաստելով նոր հատորներ:
ԱՐԱՄ Ա. ԿԱԹՈՂԻԿՈՍ ՖՐԱՆՍԵՐԷՆ ԼԵԶՈՒՈՎ ԿԸ ՀՐԱՏԱՐԱԿԷ ՆՈՐ ԳԻՐՔ ՄԸ
ՙԱՅԼԱԿԵՐՊՈՒԱԾ
ԱՇԽԱՐՀԻ
ՄԸ
ՀԱՄԱՐ՚
ԽՈՐԱԳՐՈՎ
12/24/2008
Ն.Ս.Օ.Տ.Տ. Արամ Ա. Կաթողիկոս Մեծի Տանն Կիլիկիոյ վերջերս լոյս ընծայեց ֆրանսերէն լեզուով նոր հատոր մը ՙԱյլակերպուած Աշխարհի Մը Համար՚ “Pour Un Monde Transformé”:
Շուրջ 350 էջ պարունակող յիշեալ գիրքին մէջ Վեհափառ Հայրապետը կը քննարկէ աստուածաբանական, միջ-եկեղեցական, միջ-կրօնական, եկեղեցի-ընկերութիւն փոխ-յարաբերութեան ու մարդկային իրաւանց առնչուած այժմէական հարցեր: Գիրքին մէջ ներառնուած գրութիւններուն մէկ կարեւոր մասը անգլերէն լեզուով անցեալ տարի լոյս տեսած է “For a Church Beyond Its Walls” Վեհափառին հեղինակած անգլերէն լեզուով գիրքին մէջ: Ֆրանսերէն հատորին յառաջաբանը գրուած է Եւրոպայի Եկեղեցիներու Խորհուրդի Նախագահ Դոկտ. Ժան Արնոլտ Տը Քլերմոնի կողմէ: Գիրքը հրատարակուած է Գալուստ Կիւլպէնկեան Հիմնարկութեան Հայկական Բաժնի կողմէ ու ձօնուած՝ հայ երիտասարդութեան:
Ստորեւ կուտանք մի քանի հատուածներ գիրքի վերջին յօդուածէն.-
Un autre monde est-il possible?
Un autre monde est possible lorsque les églises articulent concrètement leur fidélité aux impératifs de l'Évangile en détruisant tous “murs de séparation” (Eph. 2:14) et en devenant signe et anticipation de l'unité de l'humanité, au sein de la fragmentation et de la polarisation, lorsqu'ils deviennent un phare d'espérance dans un monde de désespérance et d'incertitude; lorsqu'ils se font l'écho, dans leur vie et leur témoignage, de la voix des sans voix, donnant des moyens aux impuis-sants et incarnant Jésus Christ comme Lumière et Vie du monde.
Un autre monde est possible lorsque la force ne prime pas le droit, lorsque les religions s'engagent les unes avec les autres dans un dialogue franc et une collaboration étroite; lorsqu'elles s'acceptent et se respectent mutuellement comme partie intégrante d'une seule humanité dans un seul monde; lorsqu'elles rejettent toutes expressions d'exclusion et tout fon-damentalisme, et embrassent la tolérance, consolidant la confiance mutuelle pour bâtir des communautés de diversités réconciliées; lorsqu'elles promouvoient la non-violence et les valeurs morales communes pour soutenir et gouverner la vie de nos sociétés.
Un autre monde est possible, lorsque les nations luttent contre l'injustice, la pauvreté et le racisme sous toutes leurs formes; lorsqu'elles investissent dans l'éducation plutôt que dans l'armement, dans les droits de l'homme plutôt que dans la sécurité nationale, dans le développement socio-économique plutôt que dans la consommation, dans des politiques de prévention multilatérales plutôt que dans des interventions militaires unilatérales; lorsqu'elles développent une gouvernance globale soutenue par des principes éthiques et par les droits de l'homme; lorsqu'elles travaillent ensemble pour une paix juste et complète enracinée dans la justice.
La transformation du monde appelle à la repentance et au pardon; elle appelle à une réconciliation basée sur l'acceptation de la vérité et la restauration de la justice.
Aram I
30-ԱՄԵԱԿ ՀԱՅ ԳԻՐՔԻ ՑՈՒՑԱՀԱՆԴԷՍԻ
ՙՀԱՅ ԳԻՐՔԸ ՄԵՐ ՀՈԳԵՄՏԱՒՈՐ ՀԱՑՆ Է՚
ԸՍԱՒ ԱՐԱՄ Ա. ԿԱԹՈՂԻԿՈՍ
11/31/2008
Երեք տասնամեակներու աւանդութիւն ունեցող Հայ Գիրքի տարեկան Ցուցահանդէսին բացումը կատարուեցաւ Կիրակի 30 Նոյեմբեր 2008-ին, Ն.Ս.Օ.Տ.Տ. Արամ Ա. Կաթողիկոսի ձեռամբ Կաթողիկոսարանի շրջափակին մէջ, Անթիլիաս:
Մայր Տաճարին մէջ մատուցուած Ս. պատարագէն անմիջապէս ետք, Միաբան Հայրերու եւ Դպրեվանքի սաներու թափօրը, գլխաւորութեամբ Վեհափառ Հայրապետին, ուղղուեցաւ դէպի Կաթողիկոսարանի թանգարանի շրջափակը, ուր լրուած հսկայ տաղաւարի մը ներքեւ կազմակերպուած էր ցուցահանդէսը: Անցնող տարիներու նման, սոյն տաղաւարը սիրայօժար տրամադրած էին Խաչատուրեան եղբայրները:
Բացման հանդիսութեան ներկայ էին հոգեւոր հայրեր, մտաւորականներ, ուսանողներ, մշակութասէրներ, Մայր Տաճարին մէջ Ս. պատարագին ներկայ եղող հոծ բազմութիւնը եւ թղթակիցներ: Գեղարուեստական յայտագրով, Դպրեվանքի սաներ եւ Մայրավանքի Կիրակնօրեայ վարժարանի փոքրիկ աշակերտներ երգեր ներկայացուցին մշակութասէր հասարակութեան, հայ մշակոյթի փառքը հիւսելով:
Ցուցահանդէսին կը մասնակցին լիբանանահայ եւ արտասահմանեան շարք մը հրատարակչատուներ, ինչպէս նաեւ անհատ հեղինակներ, եւ Կաթողիկոսարանէն ներս գործող զանազան հրատարակչատուներ:
Բացման խօսքը բանաստեղծ մտաւորական եւ Դպրեվանքի դասախօս Սարգիս Կիրակոսեան, որ անդրադարձաւ Մեծի Տանն Կիլիկիոյ Կաթողիկոսութեան կողմէ անցնող տասնամեակներուն կատարուած մշակութային առաքելութեան, հայ գիրքի հրատարակման ու տարածման բնագաւառէն ներս:
Այս առիթով արտասանած իր պատգամով, Վեհափառ Հայրապետը մեր մշակութային արժէքներուն, ու յատկապէս Հայ Գիրքին հանդէպ մեր ունենալիք նախանձախնդրութեան անդրադարձաւ: Նորին Սրբութիւնը աններելի որակեց նման մշակութային ձեռնարկներու պարագային հայ մարդուն բացակայութիւնը, զայն նկատելով հայութենէն ու իր արմատներէն հեռացման տխուր իրավիճակ: Համագաղութային բնոյթ ունեցող սոյն Ցուցահանդէսին տարուէ տարի արձանագրած յառաջդիմութիւնը գնահատեց Վեհափառ Հայրապետը, Մեծի Տանն Կիլիկիոյ Կաթողիկոսութեան առաքելութեան անբաժան մասնիկ իբրեւ ներկայացնելով Սփիւռքի կեանքէն ներս հայ մշակոյթի անաղարտ պահպանումը: Նորին Սրբութիւնը յիշեց երջ. Գարեգին Բ. Մեծի Տանն Կիլիկիոյ Կաթողիկոսի նախաձեռնութեամբ սկսած Հայ Գիրքի Ցուցահանդէսը, զոր այնքան խանդավառութեամբ տարուէ տարի քաջալերեց ան: Նոյն աշխատանքի շղթային 30-րդ օղակը նկատեց Վեհափառը Հայ Գիրքի ցուցահանդէսը:
Անդրադառնալով հոգեմտաւոր մեր արժէքներուն, Արամ Ա. Կաթողիկոս Հայ Գիրքը նկատեց մեր հոգեմտաւոր հացը: Պատկերային ոճով ներկայացուց այն խիտ շարքերը որոնք թարմ հացի փուռերուն առջեւ կը խճողուէին, սակայն ան ըսաւ, որ այսօր մեր հոգեմտաւոր արժէքներու ՙփուռերուն՚ դիմաց սկսած են նօսրանալ շարքերը, սկսած են պակսիլ Հայ Գիրք ընթերցող ու Հայ Գիրքով տագնապող անձերը:
Արամ Ա. Կաթողիկոս նաեւ գնահատեց Հայ Գիրքին զօրավիգ կանգնող բոլոր կազմակերպութիւնները եւ անհատները: Երաշխիք տուաւ, որ Կիլիկեան Ս. Աթոռը նոյն նախանձախնդրութեամբ պիտի շարունակէ իր առաքելութիւնը, ո՜չ միայն Անթիլիասի մէջ, այլ մեր բոլոր թեմերէն ներս, տէր կանգնելով մեր հոգեմտաւոր արժէքներուն ու հայրերու ժառանգութեան:
Վեհափառ Հայրապետին պատգամէն ու ներկայացուած գեղարուեստական յայտագրէն ետք, ներկայ մշակութասէր ժողովուրդը մօտեցաւ սեղաններուն, որոնց վրայ ցուցադրուած էին հոգեւոր, եկեղեցագիտական, իմաստասիրական, գրական, մանկապատանեկան, գրադատական, գրականագիտական, երաժշտական ու մշակոյթի այլ բնագաւառները շօշափող հրատարակութիւններ:
Ցուցահանդէսը բաց պիտի մնայ մինչեւ 21 Դեկտեմբեր 2008, առաւօտեան ժամը 9-էն, երեկոյեան 7:
ՀՐԱՊԱՐԱԿԻ ՎՐԱՅ Է՝
ՄԻՒՌՈՆՕՐՀՆԷՔԻ ՏԵՍԱՊՆԱԿԸ (DVD)
09/01/2008
Կաթողիկոսութեան Տեղեկատուական Բաժանմունքը կը ծանուցէ, թէ 7 Յունիս 2008-ին, Մեծի Տանն Կիլիկիոյ Կաթողիկոսութեան Մայրավանքին մէջ տեղի ունեցած ՄԻՒՌՈՆՕՐՀՆԷՔի տեսապնակը (DVD) հրապարակի վրայ է արդէն:
Ն.Ս.Օ.Տ.Տ. Արամ Ա. Կաթողիկոսի ձեռամբ կատարուած սոյն պատմական Միւռոնօրհնութեան մասնակցեցան Հայ Եկեղեցւոյ Նուիրապետական Ս. Աթոռներուն ներկայացուցիչները՝ Ս. Էջմիածնի Ամենայն Հայոց Կաթողիկոսութեան, Երուսաղէմի Առաքելական Աթոռի, եւ Կոստանդնուպոլսոյ պատրիարքութեան ներկայացուցիչ եպիսկոպոսները: Վեհափառ Հայրապետին կողքին ներկայ էին նաեւ Մեծի Տանն Կիլիկիոյ Կաթողիկոսութեան թեմակալ առաջնորդները ու միաբան հայրեր:
Վեհափառ Հայրապետը այս առիթով իր պատգամը յղեց համայն հայութեան, Անթիլիասի Միւռոնաբոյր վեհավայրէն ողջունելով մեր ժողովուրդի ներկայ թէ բացակայ բոլոր զաւակները: Ժողովրդային ծովածաւալ բազմութեան մէջ կային նաեւ պաշտօնական հրաւիրեալներ՝ քոյր եկեղեցիներու ներկայացուցիչներ ինչպէս նաեւ պետական ու դիւանագիտական անձնաւորութիւններ:
Յաւելեալ
մանրամասնութեանց համար կարդալ հոս
ՀԱՅ ԼԵԶՈՒԻ ՆՈՒԻՐՈՒԱԾ ՄԵԾԱՍՔԱՆՉ
ՀԱՏՈՐ ՄԸ ԼՈՅՍ ՏԵՍԱՒ ԱՆԹԻԼԻԱՍԻ ՏՊԱՐԱՆԷՆ
04/08/2008
Մեծի Տանն Կիլիկիոյ Կաթողիկոսութեան հովանաւորութեան ներքեւ հաստատուած ՙԳէորգ Մելիտինեցի՚ Գրական Մրցանակի հրատարակութեամբ, Անթիլիասի տպարանէն լոյս տեսաւ ՙՕրհներգութիւն Մեծասքանչին՚ հատորը: Հայ Լեզուին նուիրուած զանազան բանաստեղծութիւններ, արձակ էջեր եւ վկայութիւններ պարունակող հատորը 632 էջերէ կը բաղկանայ: Հայ Լեզուին տարուան առիթով հաւաքուած սոյն գիրքը, երկար ժամանակէ ի վեր մամուլի տակ էր, նոր գրութիւններու յաւելումներուն պատճառով: Ոսկեդարէն սկսեալ մինչեւ նոր ժամանակներ եւ ժամանակակից հեղինակներու գրութիւններ՝ նուիրուած հայ լեզուին, տեղ գտած են մեծասքանչ այս հատորին մէջ: Գիրքը խմբագրած է լիբանանահայ մտաւորական եւ Դպրեվանքի հայերէն լեզուի ու գրականութեան դասախօս Սարգիս Կիրակոսեան: Ան իր երկու խօսքին մէջ գիրքին հրատարակութեան առիթով ներկայացնելուն առընթեր, հայ լեզուի փառաբանանքը կը կատարէ, Ոսկեդարէն սկսեալ մինչեւ արդի ժամանակներ:
Հատորին սկզբնաւորութեան զետեղուած է Ն.Ս.Օ.Տ.Տ. Արամ Ա. Կաթողիկոսի հայրապետական այն Գիրը, որով Վեհափառ Հայրապետը 2006 տարին կը հռչակէր ՙՀայ Լեզուի Տարի՚: Նոյն Գիրին ճամբով, Նորին Սրբութիւնը հայ լեզուի ներկայ իրավիճակին մասին իրապաշտ մօտեցումով տեսակէտ կը յայտնէ, Արեւելահայ թէ Արեւմտահայ անոր տարբերակներուն խաթարման վտանգները ներկայացնելով: Միաժամանակ, Վեհափառ Հայրապետը ախտաճանաչումէն կ’անցնի բուժումին՝ նոր ծրագիրներու առաջարկներով, ի խնդիր հայ լեզուի առողջ պահպանումին, իբրեւ կռուան մեր լինելութեան:
Հայ ուսուցիչներուն, հայ աշակերտներուն ու հայ ժողովուրդի բոլոր զաւակներուն ձեռքերուն մէջ կը դնէ Անթիլիաս, հայ լեզուի ներբողեան հանք մը, վայելելու զայն եւ անով աւելիով զօրացնելու մեր հայկական արմատները:
Յաւելեալ մանրամասնութեանց համար կարդալ հոս:
ՙԱՐԵՒԱԳԱԼԻ ԵՒ ՀՍԿՈՒՄԻ ԵՐԳԵՐ՚
ԽՏԱՍԱԼԻԿ ԵՒ ՏԵՍԱՊՆԱԿ
02/28/2008
Մեծի Տանն Կիլիկիոյ Կաթողիկոսութեան Քրիստոնէական Դաստիարակութեան Բաժանմունքը հրապարակած է ՙԱրեւագալի եւ Հսկումի Երգեր՚ խտասալիկը (CD) եւ տեսապնակը (DVD), յատկապէս Մեծ Պահոց Քառասնօրեայ ժամանակաշրջանին համար:
Մեր ժողովուրդին կողմէ այնքան սիրուած ու երգուած այս երգերը, որոնք Ս. Ներսէս Շնորհալիի ու Ս. Գրիգոր Նարեկացիի կողմէ հոգեգրուած տողեր ու երաժշտութիւն են, այնքան հոգեթով եղանակներով, հոգեպէս կը բաւարարեն հաւատացեալները:
Հայ եկեղեցական երաժշտութեան ժառանգութիւնը անաղարտ պահելու մտահոգութենէն մեկնած, Քրիստոնէական Դաստիարակութեան Բաժանմունքը Միաբան Հայրերու հաւաքական ջանքով լոյս ընծայեց այս զոյգ մը լսատեսողական վաւերագրերը: Անոնցմէ առաջինը միայն ձայնային տարբերակը կը պարունակէ, (CD), իսկ երկրորդը՝ (DVD), կը պարուանկէ երգուող երգերուն բառային ամբողջութիւնը, սորվիլ փափաքողներուն համար հետեւելու դիւրութիւն ընծայելով (karaoke): Ներկայ դարու պահանջքին համեմատ, երգերէն մին նաեւ ունի տեսահոլովակ (video clip), յատկապէս Կիրակնօրեայ Վարժարաններու մանուկներուն համար պատրաստուած: Բոլոր երգերուն պարագային, բառային բնագրին հետեւելու ընթացքին, ենթապաստառի վրայ նաեւ կարելի է դիտել հայկական ձեռագիրներէ վերցուած մանրանկարներ, եւ հայկական ճարտարապետութեան կոթողներ:
Կաթողիկոսարանի Գրատան ճամբով, սոյն խտասալիկն ու տեսապնակը կը մատուցուի մեր ժողովուրդի բարեպաշտ զաւակներուն: