ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ԼԵՌՆԱԼԻԲԱՆԱՆԻ ԱՍՈՐԻ ՈՒՂՂԱՓԱՌ ԵԿԵՂԵՑՒՈՅ ՕԾՄԱՆ
08/08/2010
Կիրակի, 8 Օգոստոս 2010, յանուն Ն.Ս.Օ.Տ.Տ. Արամ Ա. Կաթողիկոսի, Գերշ. Տ. Կոմիտաս Արք. Օհանեան (Լուսարարապետ) եւ Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու) Աճալթունի մէջ մասնակցեցան Ասորի Ուղղափառներու Ս. Գաբրիէլ Եկեղեցւոյ օծման: Այս օրհնեալ եւ պատմական առթիւ, Սրբազանները Վեհափառ Հայրապետին շնորհաւորութիւնները փոխանցեցին Ասորի Ուղղափառ Եկեղեցւոյ Պետ Ն.Ս. Զագգա Ա. Պատրիարքին եւ լեռնալիբանանի Ուղղափառ Ասորիներու Առաջնորդ Ճորճ Սալիպա Մետրոպոլիտին:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ԲԱՐԵԿԱՐԳԵԱԼ ԵԿԵՂԵՑԻՆԵՐՈՒ ՀԱՄԱԺՈՂՈՎԻՆ
06/26/2010
18-26 Յունիս 2010, Կրանտ Ռափիտսի մէջ (Ամերիկայի Միացեալ Նահանգներ), 80 միլիոն հաւատացեալներ ունեցող Բողոքական Եկեղեցիներու ընտանիքին պատկանող երկու մեծ Միութիւններ (World Alliance of Reformed Churches եւ Reformed Ecumenical Council), գումարեցին պատմական նշանակութիւն ունեցող համաժողով մը եւ իրարու ընդելուզուելով ծնունդ տուին միացեալ նոր միութեան մը՝ Բարեկարգեալ Եկեղեցիներու Հաղորդակցութիւն անունով, որուն գրասենեակը պիտի հաստատուի Ժընեւի Միջ-եկեղեցական Կեդրոնին մէջ:
Սոյն համաժողովին Ն.Ս.Օ.Տ.Տ. Արամ Ա. Վեհափառ Հայրապետը ներկայացուց Գերշ. Տ. Անուշաւան Եպս. Դանիէլեան (Վարիչ Ամերիկայի Միացեալ Նահանգներու Միջ-Եկեղեցական Յարաբերութիւններու):
Նիստերուն գլխաւոր առանցքը հանդիսացաւ ծրագրումը Բարեկարգեալ Եկեղեցիներու Հաղորդակցութեան յառաջիկայ քայլերուն` ի խնդիր Բարեկարգեալ Եկեղեցւոյ ինքնութեան բիւրեղացման, Եկեղեցիներու երեւելի միութեան վերահաստատման, արդարութեան եւ մարդկային իրաւունքներու հետապնդման, տնտեսական տագնապի լուծման ու բնաշխարհի ապականումի եւ աղքատներու մնայուն աճի արգելման:
ՆԱՐԵԿ ՍՐԲԱԶԱՆԻ ՄԻՋ-ԵԿԵՂԵՑԱԿԱՆ
ՅԱՐԱԲԵՐՈՒԹԻՒՆՆԵՐԸ ՖՐԵԶՆՈՅԻ ՄԷՋ
06/24/2010
Հինգշաբթի, 24 Յունիս 2010, Ֆրեզնոյի (Ամերիկայի Միացեալ Նահանգներ) մէջ, Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու) հարցազրոյց մը ունեցաւ տեղւոյն Կաթոլիկ հեռատեսիլի կայանին հետ:
Մէկ ժամ տեւած հարցազրոյցին ընթացքին, Սրբազանը նախ ներկայացուց Հայ Եկեղեցւոյ պատմութիւնն ու ներկայ իրավիճակը՝ յատուկ կերպով ծանրանալով Մեծի Տանն Կիլիկիոյ Կաթողիկոսութեան բազմերես առաքելութեան վրայ: Ապա, խօսեցաւ մեր Ս. Աթոռին միջ-եկեղեցական, միջ-կրօնական եւ միջազգային յարաբերութիւններուն մասին ու մասնաւորաբար ընդծեց Ն.Ս.Օ.Տ.Տ. Արամ Ա. Կաթողիկոսի երախտարժան դերակատարութիւնը այս բնագաւառներէն ներս՝ յիշելով թէ այս օրերուն Վեհափառ Հայրապետը Գանատայի մէջ կը մասնակցի աշխարհի մեծ ութեակ երկիրներու գերաստիճանին առիթով գումարուող կրօններու հոգեւոր պետերու եւ ներկայացուցիչներու ժողովին: Վերջապէս, պատասխանեց իրեն ուղղուած հարցումներուն, որոնք առաւելաբար կը վերաբերէին Միջին Արեւելքէն ներս քրիստոնէական վկայութեան եւ իսլամ-քրիստոնեայ երկխօսութեան:
Յայտնենք, թէ Չորեքշաբթի, 16 Յունիս 2010, Նարեկ Սրբազան Ֆրեզնոյի Լուտերական Եկեղեցւոյ հովիւներուն կողմէ հրաւիրուած էր հանդիպումի մը, որուն ընթացքին դասախօսած էր Արեւելեան Ուղղափառ Եկեղեցիներու միջ-եկեղեցական շարժման մասնակցութեան մասին՝ յատկապէս լուսարձակի տակ բերելով Մեծի Տանն Կիլիկիոյ Կաթողիկոսութեան կարեւոր ներդրումը:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ՄԻՋ-ԵԿԵՂԵՑԱԿԱՆ
ԺՈՂՈՎՆԵՐՈՒ ԺԸՆԵՒԻ ՄԷՋ
05/20/2010
17-20 Մայիս 2010, Ժընեւի Միջ-եկեղեցական Կեդրոնատեղիին մէջ, Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու), երեք միջ-եկեղեցական կարեւոր ժողովներու մասնակցեցաւ:
17 Մայիսին գումարուեցաւ Քրիստոնէական Միջազգային Ֆորումի արժեւորման ժողովը, որ քննարկեց 2007էն մինչեւ այսօր Ֆորումին կատարած աշխատանքները եւ մշակեց յառաջիկայ երկու տարիներու գործունէութիւնը: Նարեկ Սրբազան այս ժողովին մասնակցեցաւ յանուն Ուղղափառ Եկեղեցիներուն եւ ներկայացուց Միջին Արեւելքի Եկեղեցիներուն պատկերացումը յարաբերաբար Ֆորումին՝ առաջարկելով յարգել շրջանէն ներս Եկեղեցիներուն իւրայատուկ դերակատարութիւնն ու զգայնութիւնները:
18 Մայիսին գումարուեցաւ Քրիստոնէական Եկեղեցական Ընտանիքներու Քարտուղարներու Գործադիր Մարմինին ժողովը, որ լուսարձակի տակ բերաւ 2009ի Նոյեմբերի լիակատար ժողովին որոշումները եւ համապատասխան որոշումներ առաւ:
19-20 Մայիսին Նարեկ Եպիսկոպոս ատենապետեց Քրիստոնէական Եկեղեցական Ընտանիքներու եւ Եկեղեցիներու Համաշխարհային Խորհուրդի Գործակցութեան Յանձնաժողովի նիստերուն: Օրակարգի նիւթերն էին.- Միջ-եկեղեցական շարժումին դիմագրաւած մարտահրաւէրները այսօր, Հաւատք եւ Կարգ Յանձնաժողովին աշխատանքները, միջ-եկեղեցական երկխօսութիւններու ընկալման հրամայականը Եկեղեցիներուն կողմէ, նախապատրաստութիւն Եկեղեցիներու Համաշխարհային Խորհուրդի 2013ի համաժողովին, եկեղեցիներուն մասնակցութիւնը 2011ի խաղաղութեան միջազգային համագումարին եւ 2012ի աստուածաբանական պաշտօնական երկխօսութիւններու հաւաքական քննարկումին նախաքայլերը:
ՀԱՅ ԵԿԵՂԵՑՒՈՅ ՄԱՍՆԱԿՑՈՒԹԻՒՆԸ ՄԻՋ-ԵԿԵՂԵՑԱԿԱՆ ՅԱՐԱԲԵՐՈՒԹԻՒՆՆԵՐՈՒ ՊԱՏԱՍԽԱՆԱՏՈՒՆԵՐՈՒ ԺՈՂՈՎԻՆ
05/06/2010
4-6 Մայիս 2010, Պոսէի Միջ-եկեղեցական Կազմաւորման Կեդրոնին մէջ (Զուիցերիա), գումարուեցաւ Եկեղեցիներու Համաշխարհային Խորհուրդի անդամ Եկեղեցիներու Միջ-եկեղեցական Յարաբերութիւններու Պատասխանատուներուն ժողովը:
Այս ժողովին Հայ Եկեղեցին մասնակցեցաւ իր երկու Հայրապետական Ս. Աթոռներով: Ս. Էջմիածնի Ամենայն Հայոց Կաթողիկոսութիւնը ներկայացուց Գերշ. Տ. Յովակիմ Եպս. Մանուկեան եւ Մեծի Տանն Կիլիկիոյ Կաթողիկոսութիւնը՝ Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու):
Ժողովականներ միասնաբար քննարկեցին միջ-եկեղեցական շարժումն ու Եկեղեցիներու Համաշխարհային Խորհուրդը յուզող կարեւոր հարցեր, ինչպէս՝ Հաւատք եւ Կարգ Բաժանմունքի, 2011ի Խաղաղութեան Միջազգային Հաւաքի եւ 2013ի ԵՀԽ-ի Համաժողովի մանրամասնութիւններն ու ասոնց մէջ Եկեղեցիներուն բերելիք գործօն մասնակցութիւնը:
ԵՀԽ-ի Ընդհ. Քարտուղար Դոկտ. Օլավ Ֆիսքէ Թվէյթ ներկայացուց ՙԵկեղեցիներու Համաշխարհային Խորհուրդը Այսօր՚ նիւթը, ապա ժողովականներ առիթ ունեցան Ժընեւի ԵՀԽ-ի Կեդրոնատեղիին մէջ հանդիպումներ ունենալու զանազան պատասխանատուներու հետ:
Ժողովը նաեւ կարելիութիւն ընծայեց իւրաքանչիւր ներկայացուցիչի խօսելու իր Եկեղեցւոյ միջ-եկեղեցական գործունէութեան կարեւոր երեսներուն մասին: Այս ծիրէն ներս, Նարեկ Սրբազան ընդհանուր գիծերով ներկայացուց Ն.Ս.Օ.Տ.Տ. Արամ Ա. Վեհափառ Հայրապետի Հնդկաստան եւ Յունաստան կատարած այցելութիւնները, իր Կիպրոսի Ուղղափառ Եկեղեցւոյ հետ ունեցած շփումները, Մայիսին Անթիլիասի մէջ Մեծի Տանն Կիլիկիոյ Կաթողիկոսութեան եւ Իրանի Պետութեան միջեւ կայանալիք միջ-կրօնական երկխօսութիւնն ու Ապրիլին Անթիլիասի մէջ տեղի ունեցած Լիբանանի Եկեղեցական Ընտանիքներու ներկայացուցիչներուն ժողովը:
7 Մայիսին, Նարեկ Սրբազան միջ-եկեղեցական հանդիպումներ ունեցաւ ԵՀԽ-ի Ընդհ. Քարտուղարին եւ կարգ մը պատասխանատուներուն հետ՝ Մեծի Տանն Կիլիկիոյ Կաթողիկոսութեան միջ-եկեղեցական ծրագիրներուն առնչութեամբ:
ՄԻՋ-ԵԿԵՂԵՑԱԿԱՆ ԱՌԱՔԵԼՈՒԹԵԱՄԲ
ՆԱՐԵԿ ՍՐԲԱԶԱՆ ԿԻՊՐՈՍԻ ՄԷՋ
05/03/2010
Ն.Ս.Օ.Տ.Տ. Արամ Ա. Վեհափառ Հայրապետի օրհնութեամբ եւ Կիպրահայոց Կաթողիկոսական Փոխանորդ Գերշ. Տ. Վարուժան Արք. Հերկելեանի հրաւէրով, 26 Ապրիլէն 2 Մայիս 2010ին, Միջ-եկեղեցական Յարաբերութիւններու Վարիչ Գերշ. Տ. Նարեկ Եպս. Ալեէմէզեան Կիպրոս այցելեց՝ միջ-եկեղեցական հանդիպումներ ունենալու Կիպրոսի Ուղղափառ Եկեղեցւոյ Հոգեւոր Պետ Ամենապատիւ Խրիսոստոմոս Բ. Արքեպիսկոպոսին եւ այլ պատասխանատուներու հետ:
Երկուշաբթի, 26 Ապրիլ, Վարուժան Արքեպիսկոպոս, Նարեկ Եպիսկոպոս եւ Կիպրոսի Հայոց Թեմի Վարչական Ժողովի Ատենապետ Տոքթ. Անդրանիկ Աշճեան այցելեցին Կիպրոսի Ուղղափառ Եկեղեցւոյ Միջ-եկեղեցական Յարաբերութիւններու Վարիչ Գրիգորիոս Եպիսկոպոսին: Տեսակցութեան ընթացքին արծարծուեցան միջ-եկեղեցական ընդհանրական հարցեր եւ Մեծի Տանն Կիլիկիոյ Կաթողիկոսութեան ու Կիպրոսի Ուղղափառ Եկեղեցւոյ միջ-եկեղեցական գործակցութիւնը առաւել ամրապնդող բնագաւառներ:
Նոյն գիշերը, Կիպրոսի Հայոց Առաջնորդարանին մէջ, Խրիսոստոմոս Բ. Արքեպիսկոպոս Վարուժան Սրբազանին եւ Ազգային Իշխանութեան ընթրիքի հիւրը եղաւ: Նարեկ Սրբազան Արքեպիսկոպոսին փոխանցեց Արամ Ա. Վեհափառ Հայրապետի եղբայրական ողջոյնները: Արքեպիսկոպոսը ուրախութեամբ անդրադարձաւ Վեհափառին հետ իր ունեցած ջերմ կապերուն եւ բարձրօրէն գնահատեց Կիպրոսի Հայոց Թեմն ու կիպրահայութիւնը:
Չորեքշաբթի, 28 Ապրիլ, Վարուժան Արքեպիսկոպոս, Նարեկ Եպիսկոպոս եւ Տոքթ. Անդրանիկ Աշճեան հանդիպում մը ունեցան Կիպրոսի Ուղղափառ Եկեղեցւոյ Կրօններու եւ Մշակոյթներու Ֆորումի Նախագահ Նիկիֆորոս Մետրոպոլիտին հետ, որ փափաք յայտնեց միջ-կրօնական եւ միջազգային գետիններու վրայ գործակցիլ Մեծի Տանն Կիլիկիոյ Կաթողիկոսութեան հետ:
Հինգշաբթի, 29 Ապրիլ, Վարուժան Արքեպիսկոպոս, Նարեկ Եպիսկոպոս եւ Տոքթ. Անդրանիկ Աշճեան այցելեցին Եկեղեցիներու Համաշխարհային Խորհուրդի Կիպրոսի Ուղղափառ Եկեղեցւոյ ներկայացուցիչ Վասիլիոս Մետրոպոլիտին եւ քննարկեցին Խորհուրդէն ներս Ուղղափառ Եկեղեցիներուն առաւել գործօն մասնակցութեան կարելիութիւնները:
Ապա, անոնք այցելութիւն մը տուին Ուղղափառ Եկեղեցիներու եւ Արեւելեան Ուղղափառ Եկեղեցիներու Աստուածաբանական Երկխօսութեան Յանձնախումբի Կիպրոսի Ուղղափառ Եկեղեցւոյ ներկայացուցիչ Վառնաւաս Մետրոպոլիտին, ուր Նարեկ Սրբազան ընդգծեց Արամ Ա. Վեհափառ Հայրապետի այս երկխօսութեան վերսկսման համար նախաձեռնած քայլերը:
Ուրբաթ, 30 Ապրիլ, Վարուժան Արքեպիսկոպոս, Նարեկ Եպիսկոպոս եւ Տոքթ. Անդրանիկ Աշճեան այցելութիւն տուին Կիպրոսի Ուղղափառ Եկեղեցւոյ իսլամ-քրիստոնեայ երկխօսութեան ներկայացուցիչ Նէոֆիտոս Մետրոպոլիտին, ուր խօսակցութիւնը կեդրոնացաւ Մեծի Տանն Կիլիկիոյ Կաթողիկոսութեան վարած միջ-կրօնական բազմածալ յարաբերութիւններուն եւ Կիպրոսի Ուղղափառ Եկեղեցւոյ բռնագրաւեալ Կիպրոսի շրջանի իսլամ թուրքերու հետ ունեցած երկխօսութեան իւրայատկութեան վրայ: Այս ծիրին մէջ, մասնաւորաբար ընդգծուեցան Հայ Դատի եւ Կիպրական Դատի արդարութիւնն ու անժամանցելի պահանջատիրութիւնը:
Ապա, անոնք այցելեցին Կիքքոյի պատմական վանքը եւ տեսակցեցան Աղաթոնիկոս վանահօր հետ:
Նոյն գիշերը, Նարեկ Սրբազան, Առաջնորդարանի ՙԻւթիւճեան՚ սրահին մէջ, ժողովրդային դասախօսութիւն մը տուաւ ՙԵկեղեցիները, Հայ Եկեղեցին եւ Միջ-եկեղեցական Շարժումը՚ նիւթին շուրջ, յատկապէս վերբերելով Մեծի Տանն Կիլիկիոյ Կաթողիկոսութեան միջ-եկեղեցական եւ միջ-կրօնական գործունէութիւնը:
Շաբաթ, 1 Մայիս, Կիքքոյի վանքի Կրօններու եւ Մշակոյթներու Ֆորումի Տնօրէն Փրօֆ. Խարիս Հոճաքօղլու Առաջնորդարան այցելեց եւ աշխատանքային հանդիպում մը ունեցաւ Նարեկ Սրբազանին հետ, ուր Մեծի Տանն Կիլիկիոյ Կաթողիկոսութեան եւ Կիպրոսի Ուղղափառ Եկեղեցւոյ միջեւ միջ-կրօնական ու միջ-մշակութային գործակցութեան ծրագիրներ մշակուեցան:
Նոյն երեկոյեան, Վարուժան Արքեպիսկոպոս, Նարեկ Եպիսկոպոս եւ Տոքթ. Անդրանիկ Աշճեան այցելեցին Կիպրոսի Ուղղափառ Եկեղեցւոյ Բողոքական Եկեղեցիներու հետ յարաբերութիւններու պատասխանատու Իսաիաս Եպիսկոպոսին եւ շօշափեցին Մեծի Տանն Կիլիկիոյ Կաթողիկոսութեան եւ Կիպրոսի Ուղղափառ Եկեղեցւոյ երկողմանի յարաբերութիւններուն վերաբերեալ հարցեր:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ՄԱՍՆԱԿՑՈՒԹԻՒՆԸ ՄԻՋԻՆ ԱՐԵՒԵԼՔԻ ԵԿԵՂԵՑԻՆԵՐՈՒ ԽՈՐՀՈՒՐԴԻ ԳՈՐԾԱԴԻՐ ՎԱՐՉՈՒԹԵԱՆ ԺՈՂՈՎԻՆ
04/19/2010
19 Ապրիլ 2010-ին, Յորդանանի մայրաքաղաք՝ Ամմանի մէջ տեղի ունեցաւ Միջին Արեւելքի Եկեղեցիներու Խորհուրդի Գործադիր Վարչութեան ժողովը:
Ն.Ս.Օ.Տ.Տ. Արամ Ա. Կաթողիկոս, իբրեւ Խորհուրդի նախագահ, հրաւէր ստացած էր ներկայ գտնուելու, սակայն այլ առաքելութեամբ երկրէն դուրս գտնուելու պատճառաւ չկրցաւ իր մասնակցութիւնը բերել:
Յանուն Մեծի Տանն Կիլիկիոյ Կաթողիկոսութեան, սոյն ժողովին մասնակցեցաւ Գործադիր Վարչութեան անդամ Գերշ. Տ. Գեղամ Եպս. Խաչերեան, Առաջնորդ Լիբանանահայոց:
Ժողովը հերթական նիստերով քննարկեց Խորհուրդի զանազան բաժանմունքներուն կողմէ կատարուած աշխատանքներուն զեկոյցը, զոր ժողովականներուն ներկայացուց Ընդհ. Քարտուղար Կրկէս Սալեհ: Իր քննարկումներու ընթացքին, ժողովը նաեւ զբաղեցաւ Միջին Արեւելքի մէջ Խորհուրդի առաքելութիւնը վերանորոգելու հարցով, ինչպէս նաեւ վերատեսութեան ենթարկեց կարգ մը ծրագիրներու առնչուող նիւթական դժուարութիւնները:
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԻՒՆԸ ԻԲՐԵՒ ԱՆԴԱՄ
ՄԱՍՆԱԿՑԵՑԱՒ ԱՍԻՈՅ ԵԿԵՂԵՑԻՆԵՐՈՒ 13-ՐԴ ՀԱՄԱԺՈՂՈՎԻՆ
ՔՈՒԱԼԱ-ԼԱՄՓՈՒՐԻ ՄԷՋ – ՄԱԼԷԶԻԱ
04/15/2010
Ասիոյ Քրիստոնեայ Եկեղեցիներու 13-րդ համաժողովը իր աշխատանքներուն սկսաւ Քուալա-Լամփուրի մէջ, Մալէզիա, 15 Ապրիլ 2010-ին: Համաժողովին կը մասնակցին շրջանի եկեղեցիներու ներկայացուցիչները, որոնց ընդհանուր գումարը շուրջ 250 հոգի է:
Ն.Ս.Օ.Տ.Տ. Արամ Ա. Կաթողիկոսի տնօրինումով, յանուն Մեծի Տանն Կիլիկիոյ Կաթողիկոսութեան, սոյն համաժողովին մասնակցեցաւ Իրանի երեք թեմերը ներկայացնող պատուիրակութիւն մը, գլխաւորութեամբ Թեհրանի Հայոց Թեմի առաջնորդ Գերշ. Տ. Սեպուհ Արք. Սարգիսեանի: Պատուիրակութեան մաս կը կազմէին նաեւ Դոկտ. Վաչիկ Հայրապետեան եւ Օրդ. Սելին Թորոսեան:
Համաժողովի բացման առաւօտուն, ժողովական աշխատանքները ընթացան ըստ օրակարգի: Ապա, յետ միջօրէին, համաժողովը յատուկ արարողակարգով, Մեծի Տանն Կիլիկիոյ Կաթողիկոսութիւնը ընդունեց իբրեւ մնայուն անդամ Ասիոյ Քրիստոնեայ Եկեղեցիներու Խորհուրդին, նկատի ունենալով իր հովանաւորութիւնը վայելող Իրանի տարածքին գտնուող Հայոց Եկեղեցական երեք Թեմերը՝ Թեհրան, Սպահան եւ Ատրպատական:
Ընդունման պաշտօնական արարողութեան ընթացքին, Սեպուհ Սրբազան խօսք առնելով, յանուն Վեհափառ Հայրապետին շնորհակալութիւն յայտնեց, ու գործակցութեան նոր հորիզոններու ընդառաջ, Հայ Եկեղեցւոյ յանձնառու պատրաստակամութեան երաշխիք տուաւ: Այս առիթով Սրբազանը խօսեցաւ հայ եկեղեցւոյ մասին, զայն ներկայացնելով իբրեւ աշխարհի հնագոյն ու հարուստ եկեղեցիներէն մէկը, իր դաւանութեամբ, աւանդութեամբ ու մշակոյթով:
Յայտնենք, որ այս առիթով, Սրբազանը հանդիպում ունեցաւ նաեւ Եկեղեցիներու Համաշխարհային Խորհուրդի Ընդհ. Քարտուղար Դոկտ. Օլաւ Ֆիքս Թուէյթին հետ: Նոյն օրը, երեկոյեան, Հայ Եկեղեցւոյ պատուիրակութիւնը պաշտօնական հանդիպում ունեցաւ Ասիոյ Քրիստոնեայ Եկեղեցիներու Խորհուրդի նորընտիր Ընդհ. Քարտուղար Դոկտ. Հենրիեթա Հութապարաթ Լիպանկի հետ:
ԱՆԹԻԼԻԱՍԻ ՄԷՋ ՔՐԻՍՏՈՆԵԱՅ
ԵԿԵՂԵՑԱԿԱՆ ԸՆՏԱՆԻՔՆԵՐՈՒ ԺՈՂՈՎ
04/06/2010
Երեքշաբթի, 6 Ապրիլ 2010ին, Անթիլիասի Մայրավանքին մէջ, գումարուեցաւ Լիբանանի քրիստոնեայ եկեղեցական ընտանիքներու ներկայացուցիչներու ժողովը:
Ժողովը հրաւիրուած էր Գերշ. Տ. Նարեկ Եպս. Ալեէմէզեանի (Վարիչ Միջ-եկեղեցական Յարաբերութիւններու) կողմէ եւ կը նպատակադրէր ի մի բերել Լիբանանի պատմական եւ նոր եկեղեցիներու հովիւները:
Իւրաքանչիւր ժողովական իր եկեղեցւոյ պատմականը կատարեց եւ անդրադարձաւ եկեղեցիներու ի Քրիստոս ունեցած միութեան հրամայականին տակ իրարու հետ գործակցութեան անհրաժեշտութեան:
Որոշուեցաւ այսպիսի հանդիպումներ պարբերաբար ունենալ եւ Սեպտեմբերին դարձեալ հաւաքուիլ Անթիլիասի մէջ:
ԱՐԱՄ Ա. ԿԱԹՈՂԻԿՈՍԻ ՆԵՐԿԱՅԱՑՈՒՑԻՉ
ՆԱՐԵԿ ՍՐԲԱԶԱՆ ՏՈՒՊՐՈՎՆԻՔԻ ՄԷՋ
02/07/2010
1-7 Փետրուար 2010, Ն.Ս.Օ.Տ.Տ. Արամ Ա. Կաթողիկոսի ներկայացուցիչ Գերշ. Տ. Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու) Խրուաթիոյ Տուպրովնիք քաղաքը այցելեց:
Վեհափառ Հայրապետը պաշտօնական հրաւէր ստացած էր Կաթոլիկ Առաջնորդ Ժելիմիր Փուլիճ Եպիսկոպոսէն Տուպրովնիքի մէջ մասնակցելու քաղաքին պաշտպան սուրբին՝ Ս. Վլաս Հայրապետի տօնակատարութեան հանդիսութիւններուն:
Յայտնենք, թէ Ս. Վլաս Հայրապետ Սեբաստիա ծնած հայազգի սուրբ մըն է եւ նահատակուած է 316ին: Սուրբին մասունքները կը գտնուին Տուպրովնիքի մէջ: Առաւել, Կիլիկեան շրջանին Տուպրովնիք մասնաւոր յարաբերութիւններ մշակած է հայութեան եւ Հայ Եկեղեցւոյ հետ:
Երեքշաբթի, 2 Փետրուար, Ս. Վլաս Հայրապետի տօնակատարութեան բացման հանդիսութեան, Նարեկ Սրբազան կարդաց Արամ Ա. Վեհափառ Հայրապետին պատգամը, որուն մէջ Նորին Սրբութիւնը կ’ըսէր.- ՙՍ. Վլաս Հայրապետ ամբողջ քրիստոնէութեան մէջ ամէնէն ժողովրդական եւ մեծարուած սուրբերէն մին է, որ ձեր քաղաքին՝ Տուպրովնիքին մէջ ամէն տեղ կենդանի ներկայութիւն է: Ս. Վլասի ծագումը առնչուած է Հայկական Կիլիկիոյ եւ Հայ Եկեղեցւոյ հետ ու այդ իսկ պատճառաւ երկարատեւ կապեր գոյութիւն ունեցած են մեր երկու Եկեղեցիներուն եւ ազգերուն միջեւ: Ս. Վլասի համար քրիստոնէական հաւատքը եղաւ աւետարանական արժէքներու ցոլացում եւ ամբողջանուէր ծառայութիւն աղքատին, զրկեալին եւ հիւանդին: Աստուած օրհնէ Տուպրովնիքի հաւատացեալ բնակիչները՚:
Չորեքշաբթի, 3 Փետրուար, 6 եպիսկոպոսներու, 70 վարդապետներու եւ 15 հազար հաւատացեալներու հետ, Նարեկ Սրբազան մասնակցեցաւ Ս. Վլաս Հայրապետի տարեկան տօնակատարութեան կրօնական եւ աշխարհիկ հանդիսութիւններուն, ու եկեղեցական մեծահանդէս թափօրին, որուն ընթացքին ծխական եկեղեցիներու աւելի քան հարիւր դրօշներ կը ծածանէին, կրեց Ս. Վլասի գլուխն ու աջը:
Միւս օրերուն, Սրբազանը առանձին հանդիպումներ ունեցաւ Տուպրովնիքի Կառավարիչ Նիգոլա Տոպպոսլաւիչին, Քաղաքապետ Անտրօ Վլահուսիչին, Առաջնորդ Ժելիմիր Փուլիճ Գերապայծառին եւ Ֆրանչիսկեան ու Տոմինկեան վարդապետներու եւ մայրապետներու Միաբանութիւններուն ու Թեմի հոգեւորականութեան հետ: Ան ներկայ գտնուեցաւ Քաղաքապետին հիւրընկալած ճաշկերոյթին, ՙՎերափոխումն Ս. Աստուածածնի՚ Մայր Տաճարին մէջ տեղի ունեցած Ս. Վլասի նուիրուած հոգեւոր համերգին եւ Տուպրովնիքի Խրուաթական եւ Հայկական Բարեկամութեան Միութեան կազմակերպած Արամ Խաչատուրեանի նուագահանդէսին:
Նարեկ Եպիսկոպոս այցելեց Մայր Տաճարի մասունքներու մատուռը, ուր դարերէ ի վեր աւելի քան 200 մասունքներ խոր երկիւղածութեամբ ի պահ դրուած են, ու Տուպրովնիքի եւ Սթոնի վանքերն ու եկեղեցիները:
Սրբազանը հարցազրոյցներ ունեցաւ Խրուաթիոյ հեռատեսիլի ու ձայնասփիւռի կայաններուն եւ օրաթերթերուն հետ, ընդգծելով այն պատմական իրողութիւնը թէ առաջին անգամ ըլլալով Հայ Առաքելական Եկեղեցիէն եպիսկոպոս մը կը մասնակցի Տուպրովնիքի Ս. Վլասի տօնախմբութեան: Առաւել, ան շեշտեց թէ փոխանակ Ս. Վլասի ծննդավայր Կիլիկիայէն՝ կու գայ Լիբանանէն, ուր 1930էն ի վեր հաստատուած է Մեծի Տանն Կիլիկիոյ Կաթողիկոսութեան Ս. Աթոռը՝ 1915ի Հայկական Ցեղասպանութեան զոհը դառնալէ ետք:
Կիրակի, 7 Փետրուար, Ս. Վլաս Եկեղեցւոյ մէջ Նարեկ Սրբազան մասնակցեցաւ Ս. Վլաս Հայրապետի տօնի փակման եկեղեցական արարողութեան եւ անգամ մը եւս Արամ Ա. Վեհափառ Հայրապետի օրհնութիւնները փոխանցեց Տուպրովնիքի հաւատացեալներուն:
ԱՆԹԻԼԻԱՍԻ ՄԷՋ ԳՈՒՄԱՐՈՒՈՂ
ԱՍՏՈՒԱԾԱԲԱՆԱԿԱՆ ԵՐԿԽՕՍՈՒԹԻՒՆԸ
ԵԶՐԱՓԱԿՈՒԵՑԱՒ ՊԱՇՏՕՆԱԿԱՆ ՀԱՂՈՐԴԱԳՐՈՒԹԵԱՄԲ
01/30/2010
Չորս օրերու վրայ տարածուած աստուածաբանական երկխօսութիւնը, որ սկսած էր Չորեքշաբթի 27 Յունուար 2010-ին, Անթիլիասի Մայրավանքին մէջ, Շաբաթ 30 Յունուարին աւարտեց իր նիստերը, եւ պաշտօնական հաղորդագրութիւն մը հրապարակուեցաւ:
7-րդ այս նստաշրջանին համար առաջադրուած օրակարգի հիմնական հարցը՝ ՙԵկեղեցիներ ինչպէ՞ս ընդունեցին Տիեզերական Ժողովները եւ ինչպէ՞ս արտայայտեցին իրենց իրարու հետ հաղորդութեան մէջ ըլլալը, եւ այս երկու պարագաներուն Հռոմ մասնաւոր դերակատարութիւն մը ունեցա՞ւ՚ ընդհանուր արժեւորման ենթարկուեցաւ, տրուած բոլոր դասախօսութիւններու լոյսին տակ: Ապա, Ժողովը աւարտեցաւ ժողովական աշխատանքներու զեկոյցին որդեգրումով եւ յաջորդ ժողովին թուականին եւ վայրին ճշդումով՝ 24-29 Յունուար 2011-ին, Վատիկանի մէջ:
Յայտնենք, որ լիբանանեան ՙԹելէ Լիւմիէր՚ պատկերասփիւռի կայանը հարցազրոյց ունեցաւ մասնակցողներուն հետ, որոնք իրենց տպաւորութիւնները փոխանցեցին ո՜չ միայն ժողովական աշխատանքներուն գծով, այլ նաեւ ընդհանրապէս Հայ Եկեղեցւոյ ու յատկապէս Մեծի Տանն Կիլիկիոյ Կաթողիկոսութեան մասին, որու կողմէ հիւրընկալուած էր սոյն նստաշրջանը:
Կիրակի 31 Յունուարին, Անթիլիասի Մայր Տաճարին մէջ, յընթացս Սուրբ եւ Անմահ պատարագի, քարոզեց Կարտինալ Ուլթըր Գասբար, ընդգծելով այն նոր իրավիճակը որ ստեղծուած է այսօր եկեղեցիներու միջեւ, որ զանոնք կ’առաջնորդէ դէպի եղբայրական սերտ յարաբերութիւններ մշակելու եւ առաւել եւս ամրապնդելու գործակցութիւնը:
Կարտինալը նաեւ Վեհափառ Հայրապետին փոխանցեց Ն.Ս. Պենետիք 16-րդ պապի եղբայրական ողջոյնները, եւ ուրախութիւնը՝ ստեղծուած այս գեղեցիկ պատեհութեան համար: Քարոզը մաս առ մաս հայերէնի թարգմանուեցաւ միջ-եկեղեցական յարաբերութեան բաժանմունքի վարիչ՝ Գերշ. Տ. Նարեկ Եպս. Ալեէմէզեանի կողմէ:
ԱՐԵՒԵԼԵԱՆ ՈՒՂՂԱՓԱՌ ԵԿԵՂԵՑԻՆԵՐՈՒ ԵՒ ԿԱԹՈԼԻԿ ԵԿԵՂԵՑՒՈՅ ԱՍՏՈՒԱԾԱԲԱՆԱԿԱՆ ԵՐԿԽՕՍՈՒԹԻՒՆԸ ԿԸ ՇԱՐՈՒՆԱԿՈՒԻ ԱՆԹԻԼԻԱՍԻ ՄԷՋ
01/27/2010
Չորեքշաբթի 27 Յունուար 2010-ին Անթիլիասի Մայրավանքին մէջ սկսած աստուածաբանական երկխօսութեանց 7-րդ նստաշրջանը Արեւելեան Ուղղափառ Եկեղեցիներու ընտանիքին եւ Հռոմէական Կաթոլիկ եկեղեցւոյ միջեւ, չորրորդ օրն ըլլալով շարունակեց իր օրակարգի հարցերուն քննարկումը:
Վերոյիշեալ օրերու ընթացքին շարունակուեցաւ քննարկումը սոյն նստաշրջանի գլխաւոր հարցին.- Եկեղեցիներ ինչպէ՞ս ընդունեցին Տիեզերական Ժողովները եւ ինչպէ՞ս արտայայտեցին իրենց իրարու հետ հաղորդութեան մէջ ըլլալը, եւ այս երկու պարագաներուն Հռոմ մասնաւոր դերակատարութիւն մը ունեցա՞ւ:
Հայր Մաթիու Վելանիքալ ներկայացուց Հնդկաստանի քրիստոնեաներուն կողմէ Տիեզերական Ժողովներու ընդունումը, Դոկտ. Տիթմըր Ուինգլըր ներկայացուց Պարսկաստանի Եկեղեցւոյ կողմէ Տիեզերական Ժողովներու ընդունումը եւ Հայր Ճոն Մաթիու ներկայացուց երեք Տիեզերական Ժողովներու ընդունումը Հնդկաստանի Ուղղափառ Եկեղեցւոյ կողմէ:
Ապա, ընդհանուր քննարկում կատարուեցաւ ժողովականներուն կողմէ: Իւրաքանչիւր եկեղեցւոյ պատմութեան էջերէն վկայութիւններ բերուեցան, աստուածաբանական խորքը շեշտելով հարցին:
Կէսօրին, երկխօսութեան յանձնախումբի համա-ատենապետներ՝ Կարտինալ Ուոլթըր Գասպար եւ Մետրոպոլիտ Պիշոյ, եւ Նարեկ Եպս. Ալեէմէզեան (Վարիչ Միջ-եկեղեցական Յարաբերութիւններու) մամլոյ ասուլիս մը տուին եւ կատարեցին երկխօսութեան պատմականն ու բացատրեցին անոր նպատակը: Անոնք մասնաւոր շնորհակալութիւն յայտնեցին Արամ Ա. Վեհափառ Հայրապետին ջերմ հիւրընկալութեան համար:
Ուրբաթ 29 Յունուարի երեկոյեան, Մետրոպոլիտ Ճորճ Սալիպա (Առաջնորդ Լեռնալիբանանի Ասորի Ուղղափառ Եկեղեցւոյ) ընթրիքով պատուեց երկխօսութեան յանձնախումբի անդամները:
ՀՆԴԿԱՍՏԱՆԻ ՈՒՂՂԱՓԱՌ ԵԿԵՂԵՑՒՈՅ ԿԱԹՈՂԻԿՈՍԻՆ
ՆԵՐԿԱՅԱՑՈՒՑԻՉՆԵՐԸ ՎԵՀԱՓԱՌ ՀԱՅՐԱՊԵՏԻՆ ՄՕՏ
01/29/2010
Ուրբաթ 29 Յունուար 2010-ին, Հնդկաստանի Մալապար Ուղղափառ Եկեղեցւոյ պետ՝ Ն.Ս. Պասիլիոս Մարթոմա Տիտմոս Ա. Կաթողիկոսի ներկայացուցիչ երկու եպիսկոպոսներ՝ Կապրիէլ Մար Կրէկորիոս եւ Մաթիու Վելանիքալ, հանդիպում ունեցան Ն.Ս.Օ.Տ.Տ. Արամ Ա. Կաթողիկոսին հետ, պաշտօնական նամակ մը յանձնելու Նորին Սրբութեան: Երկու հոգեւորականները Անթիլիասի Մայրավանքը ժամանած էին մասնակցելու համար Արեւելեան Ուղղափառ Եկեղեցիներուն եւ Կաթոլիկ Եկեղեցւոյ միջեւ կայացող աստուածաբանական երկխօսութեանց 7-րդ նստաշրջանին:
Հանդիպման ընթացքին քննարկուեցան Հնդկաստանի Ուղղափառ եկեղեցւոյ դիմագրաւած դժուարութիւնները, ինչպէս նաեւ երկու՝ հայ եւ հնդիկ քոյր եկեղեցիներուն գործակցութիւնը առաւել եւս սերտացնելու հեռանկարները:
Յայտնենք, որ Հնդկաստանի Մալապար Ուղղափառ Եկեղեցւոյ Կաթողիկոսը իր նամակով հրաւէր կ’ուղղէ Վեհափառ Հայրապետին, պաշտօնական այցելութիւն տալու Հնդկաստանի քոյր եկեղեցւոր:
ԱՐԵՒԵԼԵԱՆ ՈՒՂՂԱՓԱՌ ԵԿԵՂԵՑԻՆԵՐՈՒ ԵՒ ԿԱԹՈԼԻԿ ԵԿԵՂԵՑՒՈՅ ԱՍՏՈՒԱԾԱԲԱՆԱԿԱՆ ԵՐԿԽՕՍՈՒԹԵԱՆ 7-ՐԴ ՀԱՆԴԻՊՈՒՄԸ
01/27/2010
Չորեքշաբթի 27 Յունուար 2010-ին, Մեծի Տանն Կիլիկիոյ Կաթողիկոսութեան Անթիլիասի Մայրավանքին մէջ բացումը կատարուեցաւ Արեւելեան Ուղղափառ (ոչ-քաղկեդոնական) եկեղեցիներու ընտանիքին եւ Հռոմէական Կաթոլիկ եկեղեցւոյ միջեւ տեղի ունեցող աստուածաբանական երկխօսութեանց 7-րդ նստաշրջանին:
Անթիլիասի մէջ սոյն հանդիպումը կայացնելու հրաւէր տրուած ըլլալով Ն.Ս.Օ.Տ.Տ. Արամ Ա. Կաթողիկոսի կողմէ, ժողովականներ հիւրընկալուեցան Մեծի Տանն Կիլիկիոյ Կաթողիկոսութեան Մայրավանքին մէջ:
Առաւօտուն, Մայր Տաճարին մէջ կատարուած եկեղեցական արարողութենէն ետք, ՙԿիլիկիա՚ թանգարանի ժողովասրահին մէջ տեղի ունեցաւ վերոյիշեալ ժողովի 7-րդ նստաշրջանին բացումը:
Առաջին երկու օրերու իրերայաջորդ նիստերով քննարկուեցաւ հետեւեալ հարցը.- Եկեղեցիներ ինչպէ՞ս ընդունեցին Տիեզերական Ժողովները եւ ինչպէ՞ս արտայայտեցին իրենց իրարու հետ հաղորդութեան մէջ ըլլալը, եւ այս երկու պարագաներուն Հռոմ մասնաւոր դերակատարութիւն մը ունեցա՞ւ: Գերշ. Տ. Եզնիկ Արք. Պետրոսեան եւ Հայր Լեւոն Զէքիեան առանձին դասախօսութիւններով ներկայացուցին հայկական աղբիւրները տուեալ նիւթին վերաբերեալ, իսկ Մետրոպոլիտ Պիշոյ ներկայացուց ղպտական աղբիւրները: Դասախօսական ելոյթներէն ետք տեղի ունեցաւ ընդհանուր քննարկում, որու ընթացքին ներկայ ժողովականներ պատմական տուեալներու վրայ հիմնուած, իրենց տեսակէտները պարզեցին, առաւել եւս լուսաբանելով տիեզերական ժողովներու պատմական անցեալը:
Ժողովականներ առիթ ունեցան նաեւ պաշտօնապէս հանդիպելու Ն.Ս.Օ.Տ.Տ. Արամ Ա. Կաթողիկոսին հետ Վեհարանի դահլիճին մէջ, ուր Նորին Սրբութիւնը իր պատկերացումը